బెల్జియం రేసింగ్‌లో అజిత్ కుమార్ సంచలనం: త్రివర్ణ పతాకాన్ని సగర్వంగా ఎగురవేసిన ‘తలా’

బెల్జియం గడ్డపై రెపరెపలాడిన త్రివర్ణ పతాకం..
* 24 గంటల ఎండ్యూరెన్స్ రేసులో అజిత్ జట్టుకు అద్భుత విజయం.
* సినిమాల్లోనే కాదు.. రేసింగ్ ట్రాక్‌పైనా ‘తలా’ అదరహో.
* మోటార్ స్పోర్ట్స్‌లో భారత కీర్తిపతాకను ఎగరేసిన స్టార్ హీరో అజిత్.

బెల్జియం,మహా.

వెండితెరపై అద్భుతమైన యాక్షన్ దృశ్యాలతో ప్రేక్షకులను ఉర్రూతలూగించే కోలీవుడ్ స్టార్ హీరో అజిత్ కుమార్, తనకిష్టమైన మోటార్ స్పోర్ట్స్‌లోనూ సత్తా చాటుతూ అంతర్జాతీయ స్థాయిలో దేశ కీర్తి ప్రతిష్టలను ఇనుమడింపజేస్తున్నారు. సినిమాలతో పాటు రేసింగ్ అంటే ప్రాణమిచ్చే ఈ యాక్షన్ హీరో, తాజాగా యూరప్ గడ్డపై అద్భుతమైన విజయాన్ని నమోదు చేసి భారతీయ మోటార్ స్పోర్ట్స్ అభిమానులను గర్వపడేలా చేశారు. బెల్జియంలోని అత్యంత ప్రఖ్యాతి గాంచిన సర్క్యూట్ డి స్పా-ఫ్రాంకోర్‌చాంప్స్ ట్రాక్‌పై జరిగిన 24 గంటల సిరీస్ రేసులో అజిత్ నేతృత్వంలోని రేసింగ్ టీమ్ అద్భుతమైన ప్రదర్శన కనబరిచి, ప్రతిష్టాత్మకమైన రెండో స్థానాన్ని కైవసం చేసుకుంది. ప్రపంచంలోనే అత్యంత కఠినమైన, ప్రతికూల వాతావరణ పరిస్థితుల్లో సాగే ఎండ్యూరెన్స్ రేసులలో ఒకటైన ఈ పోటీలో, అంతర్జాతీయ స్థాయి జట్లను దీటుగా ఎదుర్కొని అజిత్ జట్టు ఈ అరుదైన ఘనతను సాధించడం ఇప్పుడు క్రీడా వర్గాల్లో తీవ్ర చర్చనీయాంశంగా మారింది.
నిరంతరాయంగా 24 గంటల పాటు సాగే ఈ ఎండ్యూరెన్స్ రేసులో పాల్గొనాలంటే అపారమైన క్రీడా నైపుణ్యంతో పాటు, కళ్లు చెదిరే వేగం, ఏమాత్రం చెక్కుచెదరని ఏకాగ్రత, జట్టు సభ్యుల మధ్య అద్భుతమైన సమన్వయం ఎంతో అవసరం. ఇన్ని సవాళ్లను అధిగమిస్తూ, అనుభవజ్ఞులైన విదేశీ రేసర్లతో పోటీ పడి మరీ అజిత్ కుమార్ రేసింగ్ టీమ్ పోడియం ఫినిష్ చేయడం వారి శ్రమకు, పట్టుదలకు నిదర్శనమని విశ్లేషకులు కొనియాడుతున్నారు. ఈ అద్భుత విజయానంతరం పోడియంపైకి చేరుకున్న అజిత్ కుమార్.. సగర్వంగా భారత జాతీయ జెండాను చేతబూని ఎగురవేస్తూ చేసిన సంబరాలు ప్రతి భారతీయుడి గుండె ఉప్పొంగేలా చేశాయి. చేతిలో ట్రోఫీ, త్రివర్ణ పతాకంతో తన జట్టు సభ్యులతో కలిసి ఆయన ఉత్సాహంగా చేసుకున్న సెలబ్రేషన్స్ కు సంబంధించిన ఫోటోలు, వీడియోలు ప్రస్తుతం సామాజిక మాధ్యమాల్లో విపరీతంగా వైరల్ అవుతున్నాయి. కేవలం ఒక నటుడిగా మాత్రమే కాకుండా, ఒక అంకితభావం గల క్రీడాకారుడిగా దేశ ప్రతిష్టను ఖండాంతరాలకు చాటిన ఆయనపై అటు సినీ, ఇటు క్రీడా అభిమానులు ప్రశంసల వర్షం కురిపిస్తున్నారు.
ఇటీవల ‘గుడ్ బ్యాడ్ అగ్లీ’ సినిమా షూటింగ్ అనంతరం, అజిత్ కుమార్ తన పూర్తి సమయాన్ని, దృష్టిని రేసింగ్‌పైనే కేంద్రీకరించారు. ఎవరి మీదా ఆధారపడకుండా ఏకంగా తన సొంత రేసింగ్ టీమ్‌ను ఏర్పాటు చేసుకున్న ఆయన, యూరప్ ఖండంలోని పలు దేశాల్లో జరుగుతున్న ప్రతిష్టాత్మక రేసింగ్ ఛాంపియన్‌షిప్‌లలో క్రమం తప్పకుండా పాల్గొంటున్నారు. ఫ్రాన్స్, జర్మనీ, స్పెయిన్, ఇటలీ, యూకే, పోర్చుగల్ తదితర దేశాల్లో ఆయన రేసింగ్ షెడ్యూల్ నిరంతరాయంగా కొనసాగుతోంది. ఇప్పటికే పలు యూరోపియన్ సిరీస్‌లలో తనదైన శైలిలో దూకుడు ప్రదర్శించిన అజిత్ కుమార్ రేసింగ్ టీమ్, తాజా విజయంతో అంతర్జాతీయ మోటార్‌స్పోర్ట్స్‌లో తమకంటూ ఒక సుస్థిరమైన, ప్రముఖ స్థానాన్ని పదిలం చేసుకుంది. రాబోయే రోజుల్లో మోటార్ స్పోర్ట్స్ వేదికగా భారత్ కు మరిన్ని విజయాలు అందించే దిశగా అజిత్ బృందం అడుగులు వేస్తోంది.