* కేసీఆర్పై చేసిన కుట్రలు.
* అబద్ధానికి ఆయుష్షు తక్కువ.
* నిప్పులాంటి నిజం బయటపడింది.
* అది పీసీ ఘోష్ రిపోర్ట్ కాదు.
* బీఆర్ఎస్ వర్కింగ్ ప్రెసిడెంట్ ధ్వజం.
హైదరాబాద్, మహా.
కాళేశ్వరం ప్రాజెక్టు విషయంలో గత కొంతకాలంగా కాంగ్రెస్ ప్రభుత్వం చేస్తున్న ప్రచారంపై బీఆర్ఎస్ వర్కింగ్ ప్రెసిడెంట్ కల్వకుంట్ల తారక రామారావు (కేటీఆర్) తీవ్ర స్థాయిలో విరుచుకుపడ్డారు. బుధవారం తెలంగాణ భవన్లో ఏర్పాటు చేసిన విలేకరుల సమావేశంలో ఆయన మాట్లాడుతూ, హైకోర్టు తీర్పు నేపథ్యంలో కాంగ్రెస్ పార్టీ వైఖరిని ఎండగట్టారు. కక్ష కట్టినట్టుగా కాంగ్రెస్ ప్రభుత్వం చేస్తున్న చిల్లర ప్రచారం ఈ రోజుతో అభాసుపాలైందని ఆయన మండిపడ్డారు. ఈ వ్యవహారంలో కుంగింది కాళేశ్వరం ప్రాజెక్టు కాదు.. కేసీఆర్పై కాంగ్రెస్ నాయకులు చేసిన కుట్రలే కుంగాయని ఆయన ఎద్దేవా చేశారు. తమ ప్రభుత్వంపై బురద చల్లాలని ఎంత ప్రయత్నించినా, అంతిమంగా నిప్పులాంటి నిజం బయటకు వచ్చిందని ఆయన స్పష్టం చేశారు.
అబద్ధానికి ఆడంబరం ఎక్కువ ఉన్నా, దానికి ఆయుష్షు మాత్రం చాలా తక్కువ అని కేటీఆర్ వ్యాఖ్యానించారు. అబద్ధాలతో అద్భుతమైన నిజాలను చాలా కాలం పాటు దాచలేరని, కాళేశ్వరం ప్రాజెక్టు మహత్యాన్ని కనబడకుండా చేయడం ఎవరి తరము కాదని ఆయన ఉద్ఘాటించారు. ఈ రోజు గెలిచింది కేవలం బీఆర్ఎస్ పార్టీ మాత్రమే కాదని, తెలంగాణ ప్రజలు మరియు రైతులు గెలిచారని ఆయన కొనియాడారు. ఎన్ని కమిషన్లు వేసి కుట్రలు చేసినా, ఎన్ని అబద్ధాలు చెప్పినా.. తెలంగాణ గడ్డపై పారుతున్న ప్రతి నీటి చుక్క కేసీఆర్ పట్టుదల వల్ల వచ్చిందేనని, అది కాదనలేని వాస్తవమని ఆయన పునరుద్ఘాటించారు. జస్టిస్ పీసీ ఘోష్ కమిషన్ నివేదికను ఆయన విమర్శిస్తూ.. అది నిష్పాక్షికమైన నివేదిక కాదని, పీసీసీ (ప్రదేశ్ కాంగ్రెస్ కమిటీ) ఆఫీసులో తయారైన రిపోర్ట్ లాగా ఉందని విమర్శించారు.
కాళేశ్వరం ప్రాజెక్టు తెలంగాణకు వరప్రదాయిని అన్నది ఎంత నిజమో.. కాంగ్రెస్ పార్టీ తెలంగాణకు శనేశ్వరం అన్నది అంతే నిజమని కేటీఆర్ ఘాటుగా విమర్శించారు. మేడిగడ్డ అనేది కేవలం ఒక బ్యారేజ్ మాత్రమే కాదని, అది లక్షలాది ఎకరాలకు నీరందించే ఒక నీటిగడ్డ అని ఆయన అభివర్ణించారు. మేడిగడ్డ వద్ద రెండు పిల్లర్లు కుంగడం వెనుక లోతైన కుట్ర దాగి ఉందని, అది కచ్చితంగా ప్రస్తుత పాలకుల పనే అయి ఉండొచ్చని ఆయన అనుమానం వ్యక్తం చేశారు. కాళేశ్వరం అంటే కేవలం ఒక బ్యారేజీ లేదా రెండు పిల్లర్లు కాదని, అది ఒక అద్భుతమైన ఇంజనీరింగ్ వ్యవస్థ అని ఆయన వివరించారు. ప్రాజెక్టును రాజకీయంగా దెబ్బతీయడం కోసం ప్రభుత్వం కావాలనే దాని మరమ్మతులను పక్కన పెట్టిందని ఆరోపించారు.
నిధుల దుర్వినియోగంపై కాంగ్రెస్ చేస్తున్న ప్రచారాన్ని కేటీఆర్ గణాంకాలతో తిప్పికొట్టారు. కాళేశ్వరం ప్రాజెక్టుకు అయిన మొత్తం ఖర్చు రూ. 94 వేల కోట్లు అయితే.. ఏకంగా రూ. లక్ష కోట్ల కుంభకోణం జరిగిందని ప్రచారం చేయడం కాంగ్రెస్ నేతల అవివేకానికి పరాకాష్ట అని ఆయన దుయ్యబట్టారు. స్వయంగా రాహుల్ గాంధీ సైతం ఈ ప్రాజెక్టును ‘ఏటీఎం’ అని ప్రచారం చేయడం ద్వారా తెలంగాణ ప్రజలను అవమానించారని మండిపడ్డారు. ప్రాజెక్టు వ్యయం కంటే ఎక్కువ అవినీతి జరిగిందని చెప్పడం ద్వారా కాంగ్రెస్ తన మేధోశూన్యాన్ని చాటుకుందని ఎద్దేవా చేశారు. రాజకీయ లబ్ధి కోసం రాష్ట్ర ప్రయోజనాలను పణంగా పెడుతున్న రేవంత్ రెడ్డి సర్కారుకు రాబోయే రోజుల్లో ప్రజలు తగిన బుద్ధి చెబుతారని కేటీఆర్ హెచ్చరించారు.
