రేవంత్ సర్కార్ రైతు హంతక ప్రభుత్వం..
* యూరియా అమ్మకాలపై అనధికార బ్యాన్ దుర్మార్గం!
* కొనుగోళ్లలో ఫెయిల్.. వారోత్సవాలతో సంబరాలా?
* కాంగ్రెస్ పాలనపై నిప్పులు చెరిగిన హరీశ్ రావు
హైదరాబాద్, మహా.
తెలంగాణ రాష్ట్రంలో రైతాంగం తీవ్ర సంక్షోభాన్ని ఎదుర్కొంటున్న వేళ కాంగ్రెస్ ప్రభుత్వం అనుసరిస్తున్న తీరుపై మాజీ మంత్రి, బీఆర్ఎస్ డిప్యూటీ ఫ్లోర్ లీడర్ హరీశ్ రావు తీవ్ర స్థాయిలో మండిపడ్డారు. రాష్ట్రవ్యాప్తంగా యూరియా అమ్మకాలపై ప్రభుత్వం అనధికారికంగా బ్యాన్ విధించడం చరిత్రలో ఎన్నడూ లేని దిక్కుమాలిన చర్య అని ఆయన ధ్వజమెత్తారు. రేవంత్ రెడ్డి నాయకత్వంలోని కాంగ్రెస్ ప్రభుత్వం ముమ్మాటికీ రైతు హంతక ప్రభుత్వమేనని విమర్శించారు. కాంగ్రెస్ అధికారంలోకి వచ్చిన వెంటనే ఎరువుల పంపిణీపై ఆంక్షలు మొదలయ్యాయని, యూరియా అమ్మకాలను నిలిపివేస్తూ మౌఖిక ఆదేశాలు జారీ చేయడం ఈ ప్రభుత్వ వ్యవసాయ వ్యతిరేక విధానాలకు నిలువెత్తు నిదర్శనమని ఆయన ఆగ్రహం వ్యక్తం చేశారు.
**స్టాక్ ఉన్నా.. రైతులకు దక్కని యూరియా**
రాష్ట్రంలోని అగ్రో సెంటర్లు, డీలర్లు, సొసైటీల వద్ద సరిపడా యూరియా స్టాక్ అందుబాటులో ఉన్నప్పటికీ రైతులకు ఎందుకు ఇవ్వడం లేదో ప్రభుత్వం తక్షణమే సమాధానం చెప్పాలని హరీశ్ రావు నిలదీశారు. పంటల సాగు కోసం యూరియా బస్తాల కోసం రైతులు అరిగోస పడుతూ సెంటర్ల చుట్టూ తిరుగుతుంటే ప్రభుత్వం చోద్యం చూస్తోందని దుయ్యబట్టారు. యూరియా అమ్మకాలను అకస్మాత్తుగా నిలిపివేయడంతో రాష్ట్రవ్యాప్తంగా చెరకు, పండ్ల తోటలు, కూరగాయలు పండించే రైతులు తీవ్ర ఇబ్బందులు ఎదుర్కొంటున్నారని, వారి కష్టాలు ఈ పాలకులకు కనిపించడం లేదా అని ఆయన ప్రశ్నించారు. రైతుల ముంగిట ఎరువులను అందుబాటులో ఉంచాల్సిన ప్రభుత్వం, ఏవేవో యాప్లు తీసుకువచ్చి వారి పాలిట శాపంగా మారుస్తోందని విమర్శించారు.
**ధరల పెంపుతో మూలిగే నక్కపై తాటిపండు**
ఒకవైపు యూరియాపై అనధికార బ్యాన్ విధించి రైతుల కడుపు కొడుతున్న ప్రభుత్వం, మరోవైపు అడ్డగోలుగా ఎరువుల ధరలను పెంచి మూలిగే నక్కపై తాటిపండు పడ్డట్లుగా రైతులపై పెనుభారాన్ని మోపుతోందని హరీశ్ రావు ఆవేదన వ్యక్తం చేశారు. రైతు సంక్షోభం విషయంలో కాంగ్రెస్, జాతీయ పార్టీలది ఒకే విధానంలా కనిపిస్తోందని విమర్శించారు. రైతులకు అవసరమైన యూరియా సరఫరాపై దృష్టి సారించడం మానేసి, యూరియా వినియోగాన్ని తగ్గించాలంటూ ప్రజల సొమ్ముతో ప్రచారాలు చేయడం ప్రభుత్వ హాస్యాస్పద చర్యలకు అద్దం పడుతోందన్నారు.
**చేతకాని దద్దమ్మ ప్రభుత్వం.. సిగ్గులేకుండా వారోత్సవాలు**
రాష్ట్రంలో ధాన్యం కొనుగోలు చేయడంలో రేవంత్ ప్రభుత్వం దారుణంగా విఫలమైందని, ఇది పూర్తిగా చేతగాని దద్దమ్మ ప్రభుత్వమని హరీశ్ రావు తీవ్ర పదజాలంతో విమర్శించారు. ఒకవైపు రైతులు పండించిన పంట అమ్ముకోలేక, సరైన మద్దతు ధర రాక తీవ్ర ఆందోళనలో ఉంటే, ప్రభుత్వం మాత్రం సిగ్గులేకుండా వారోత్సవాలు జరుపుకోవడం రైతాంగాన్ని ఘోరంగా అవమానించడమేనని మండిపడ్డారు. రైతులు కన్నీరు పెడుతుంటే ఏ ముఖం పెట్టుకుని ఈ సంబరాలు చేస్తున్నారని ఆయన సూటిగా ప్రశ్నించారు. ఈ వైఫల్యాలను కప్పిపుచ్చుకునేందుకే ప్రభుత్వం వారోత్సవాల పేరిట కొత్త డ్రామాలకు తెరతీసిందని విమర్శించారు.
**హామీల అమలులో అట్టర్ ఫ్లాప్.. నిలదీస్తున్న రైతులు**
రైతు డిక్లరేషన్ పేరిట ఆచరణ సాధ్యంకాని హామీలు ఇచ్చి అధికారంలోకి వచ్చిన కాంగ్రెస్ ప్రభుత్వం వాటిని అమలు చేయడంలో పూర్తిగా అట్టర్ ఫ్లాప్ అయిందని హరీశ్ రావు ఎద్దేవా చేశారు. రైతుబంధు పంపిణీ, పంటలకు బోనస్ చెల్లింపు, పంట బీమా పథకం అమలు, రుణమాఫీ, యూరియా సరఫరా, ధాన్యం కొనుగోళ్లు, కొన్న పంటకు బోనస్ పైసలు ఇవ్వడం.. ఇలా ప్రతి అడుగులోనూ రేవంత్ ప్రభుత్వం ఘోరంగా విఫలమైందని ఆయన స్పష్టం చేశారు. రైతుల ఉసురు తీసుకుంటున్న పాపం ముఖ్యమంత్రికి తగలకుండా పోదని హెచ్చరించారు. రైతుల ఆగ్రహం కట్టలు తెంచుకోవడంతో, వారు అడిగే ప్రశ్నలకు సమాధానం చెప్పలేక అధికారులు రైతు వేదికల నుంచి పారిపోవాల్సిన పరిస్థితి తలెత్తడం ఈ ప్రభుత్వ పాలనా వైఫల్యానికి పరాకాష్ట అని పేర్కొన్నారు. తక్షణమే బీఆర్ఎస్ ప్రభుత్వ హయాంలో మాదిరిగా నిరంతర యూరియా అమ్మకాలను పునరుద్ధరించాలని, విధించిన అనధికార బ్యాన్ను ఎత్తివేయాలని హరీశ్ రావు ప్రభుత్వాన్ని డిమాండ్ చేశారు.
