తమిళనాట విజయ్ ‘బల’ ప్రదర్శన.
* రెబల్ ఎమ్మెల్యేలతో సీఎం వ్యూహాత్మక భేటీ!
* మద్దతు తెలిపినందుకు ఏఎంఎంకే ఎమ్మెల్యేపై బహిష్కరణ వేటు.
*జయలలిత ‘ఆస్థాన జ్యోతిష్యుడికి’ కీలక పదవి.
* విజయ్ రాజకీయంలో వెట్రివేల్ ముద్ర.
* ప్రజలకు ఇబ్బంది కలిగిస్తే సొంత శ్రేణులకైనా వార్నింగ్.
హైదరాబాద్, మహా.
వెండితెరపై తన నటనతో కోట్లాది మందిని మెప్పించిన ‘దళపతి’ విజయ్, ఇప్పుడు ముఖ్యమంత్రి హోదాలో అసెంబ్లీలో తన తొలి రాజకీయ పరీక్షకు సిద్ధమయ్యారు.
బుధవారం అసెంబ్లీలో జరగనున్న బలపరీక్షలో నెగ్గి తన ప్రభుత్వాన్ని సుస్థిరం చేసుకోవాలని ముఖ్యమంత్రి విజయ్ కృతనిశ్చయంతో ఉన్నారు. ఇందులో భాగంగా అన్నాడీఎంకే రెబల్ ఎమ్మెల్యేల మద్దతు కూడగట్టేందుకు ఆయన స్వయంగా రంగంలోకి దిగారు. అన్నాడీఎంకే నేత, రెబల్ ఎమ్మెల్యేల వర్గానికి నాయకత్వం వహిస్తున్న షణ్ముగం నివాసానికి వెళ్లిన విజయ్, ఆయనతో సుదీర్ఘంగా చర్చలు జరిపారు. ఇప్పటికే విజయ్ ప్రభుత్వానికి తమ మద్దతు ఉంటుందని షణ్ముగం బహిరంగంగా ప్రకటించిన నేపథ్యంలో, ఈ భేటీ రాజకీయ ప్రాధాన్యత సంతరించుకుంది. అన్నాడీఎంకేలో అసమ్మతి గళం వినిపిస్తున్న నేతలతో ముఖ్యమంత్రి నేరుగా చర్చలు జరపడం విపక్షాల్లో ఆందోళన కలిగిస్తోంది.
**ఏఎంఎంకేలో ముసలం.. ఎమ్మెల్యే కామరాజ్పై వేటు**
విజయ్ ప్రభుత్వానికి మద్దతు ప్రకటించినందుకు గాను టీటీవీ దినకరన్ నేతృత్వంలోని ఏఎంఎంకే పార్టీలో తీవ్ర పరిణామాలు చోటుచేసుకున్నాయి. ఆ పార్టీ నుంచి ఎన్నికైన ఏకైక ఎమ్మెల్యే కామరాజ్ను పార్టీ ప్రాథమిక సభ్యత్వం నుంచి తొలగిస్తూ దినకరన్ సంచలన నిర్ణయం తీసుకున్నారు. పార్టీ క్రమశిక్షణను ఉల్లంఘించి, ఏకపక్షంగా టీవీకే ప్రభుత్వానికి మద్దతు తెలిపినందుకు ఈ కఠిన చర్య తీసుకున్నట్లు ఆయన వెల్లడించారు. తనను నమ్మి ఓటు వేసిన ప్రజలకు, గెలుపు కోసం శ్రమించిన కార్యకర్తలకు కామరాజ్ ద్రోహం చేశారని దినకరన్ తీవ్రంగా మండిపడ్డారు. ముఖ్యమంత్రికి మద్దతు తెలిపిన కొన్ని గంటల్లోనే ఎమ్మెల్యేను పార్టీ నుంచి బహిష్కరించడం తమిళ రాజకీయాల్లో చర్చనీయాంశమైంది.
**కీలక పదవిలో ‘జయలలిత’ జ్యోతిష్యుడు**
రాజకీయ నిర్ణయాల విషయంలో ముఖ్యమంత్రి విజయ్ తన ఆస్థాన జ్యోతిష్యుడు రాధన్ పండిట్ వెట్రివేల్కు అత్యంత ప్రాధాన్యత ఇస్తున్నారు. తాజాగా వెట్రివేల్ను ముఖ్యమంత్రి రాజకీయ వ్యవహారాల ‘ఆఫీసర్ ఆన్ స్పెషల్ డ్యూటీ’ (OSD)గా నియమిస్తూ ప్రభుత్వం ఉత్తర్వులు జారీ చేసింది. గతంలో దివంగత ముఖ్యమంత్రి జయలలితకు సైతం ఈయన అత్యంత సన్నిహితుడిగా ఉండేవారు. మే 10న విజయ్ ప్రమాణ స్వీకార ముహూర్తాన్ని కూడా వెట్రివేల్ సూచనల మేరకే మార్చడం గమనార్హం. మధ్యాహ్నం అనుకున్న ముహూర్తాన్ని శుభ గడియల కోసం ఉదయానికి మార్పించిన వెట్రివేల్, ఇప్పుడు ప్రభుత్వంలో కీలక బాధ్యతలు చేపట్టనున్నారు. అన్ని ప్రధాన పార్టీల నేతలకు జ్యోతిష్యుడిగా ఉన్న ఈయన, విజయ్ జాతకం బలంగా ఉందని జోస్యం చెప్పడంతో ఆయనపై నమ్మకంతో విజయ్ ఈ పదవిని కట్టబెట్టినట్లు తెలుస్తోంది.
**ప్రజా హితమే ముఖ్యం.. బ్యానర్లపై నిషేధం**
అధికారంలోకి వచ్చిన వెంటనే విజయ్ తన పార్టీ శ్రేణులకు కఠిన ఆదేశాలు జారీ చేశారు. బహిరంగ ప్రదేశాల్లో ట్రాఫిక్కు అంతరాయం కలిగించేలా లేదా ప్రజలకు అసౌకర్యం కలిగించే విధంగా పార్టీ బ్యానర్లు, ఫ్లెక్సీలు ఏర్పాటు చేయడాన్ని టీవీకే పార్టీ పూర్తిగా నిషేధించింది. ఎవరైనా ఈ నిబంధనలను అతిక్రమిస్తే సొంత పార్టీ వారైనా సరే కఠిన చర్యలు తప్పవని విజయ్ హెచ్చరించారు. కేవలం పార్టీ ప్రచారం కోసమే కాకుండా, ప్రజల సంక్షేమానికి, సౌకర్యానికి ప్రాధాన్యత ఇవ్వాలని ఆయన పిలుపునిచ్చారు. ఈ నిర్ణయంతో విజయ్ ప్రభుత్వం ప్రజల మనసు గెలుచుకునే ప్రయత్నం చేస్తోంది. బలపరీక్ష గండం గట్టెక్కితే, రాబోయే రోజుల్లో వెట్రివేల్ సలహాలు, రెబల్ నేతల అండతో విజయ్ ఎలాంటి మార్పులు తీసుకువస్తారో అన్నది వేచి చూడాలి.
