ధర్మేంద్ర ప్రధాన్‌ను వెంటనే ఆ పదవి నుంచి తొలగించాల్సిందే….రాహుల్ గాంధీ ధ్వజం.

ఢిల్లీ, మహా.
దేశంలో వైద్య విద్య ప్రవేశాల పరీక్ష ‘నీట్-యూజీ’ ఫలితాలపై వెల్లువెత్తుతున్న తీవ్ర వివాదం, పేపర్ లీకేజీ ఆరోపణల నేపథ్యంలో కేంద్ర విద్యాశాఖ మంత్రి ధర్మేంద్ర ప్రధాన్ పదవికి తక్షణమే రాజీనామా చేయాలని, లేదా ప్రధాని ఆయనను మంత్రివర్గం నుంచి తొలగించాలని లోక్‌సభ ప్రతిపక్ష నాయకుడు రాహుల్ గాంధీ డిమాండ్ చేశారు. దేశవ్యాప్తంగా పరీక్షలు రాసిన 18.5 లక్షల మంది విద్యార్థుల భవిష్యత్తును ఈ ప్రభుత్వం అంధకారంలోకి నెట్టేసిందని ఆయన తీవ్ర ఆగ్రహం వ్యక్తం చేశారు. దేశ రాజధానిలో ఏర్పాటు చేసిన ప్రత్యేక విలేకరుల సమావేశంలో రాహుల్ గాంధీ మాట్లాడుతూ కేంద్ర ప్రభుత్వ వైఫల్యాలను, ఎన్‌టీఏ తీరును ఎండగట్టారు. ప్రతిభావంతులైన విద్యార్థులకు జరిగిన అన్యాయంపై తాము రాజీలేని పోరాటం చేస్తామని స్పష్టం చేశారు.
దేశంలో అత్యంత ప్రతిష్టాత్మకమైన ఎగ్జామినేషన్ వ్యవస్థను ఈ ప్రభుత్వం పూర్తిగా భ్రష్టు పట్టించిందని రాహుల్ గాంధీ ఆరోపించారు. ఒకవైపు పరీక్షల్లో అవకతవకలు జరిగాయని దేశమంతా కోడైకూస్తున్నా, గుజరాత్, బీహార్, హర్యానా వంటి రాష్ట్రాల్లో పేపర్ లీక్ ముఠాలు అరెస్ట్ అవుతున్నా కేంద్ర మంత్రి ధర్మేంద్ర ప్రధాన్ మాత్రం ఏమీ జరగనట్లే కప్పిపుచ్చుకునే ప్రయత్నం చేస్తున్నారని మండిపడ్డారు. విద్యార్థులు రేయింబగళ్లు కష్టపడి చదివితే, ధనబలం ఉన్న కొందరు అక్రమార్కులు పేపర్లను ముందే కొనుగోలు చేసి ర్యాంకులు సాధిస్తుంటే చూస్తూ ఊరుకోబోమని హెచ్చరించారు. “ఇది కేవలం ఒక పరీక్షకు సంబంధించిన సమస్య కాదు.. లక్షలాది మంది విద్యార్థుల కన్నీళ్లు, వారి తల్లిదండ్రుల జీవితకాల శ్రమను హరించడమే” అని ఆవేదన వ్యక్తం చేశారు.
తమ వైఫల్యాలను ప్రశ్నిస్తున్నందుకు ప్రతిపక్షాలపై బురదజల్లే రాజకీయాలకు కేంద్ర ప్రభుత్వం తెరతీసిందని, అయితే నన్ను ఎంత విమర్శించినా, ఎన్ని రకాలుగా వేధించినా కేంద్రం చేసిన తప్పులను దాచలేరని రాహుల్ గాంధీ తేల్చిచెప్పారు. విద్యా వ్యవస్థను కాషాయీకరణ చేసే క్రమంలో భాగంగానే అసమర్థులను కీలక పీఠాలపై కూర్చోబెట్టారని, దీని ఫలితంగానే వరుసగా పేపర్ లీకేజీలు, పరీక్షల రద్దులు జరుగుతున్నాయని విమర్శించారు. విద్యా శాఖకు నాయకత్వం వహించే అర్హత ధర్మేంద్ర ప్రధాన్‌కు లేదని, బాధ్యతారాహిత్యంగా వ్యవహరిస్తున్న ఆయన వెంటనే గద్దె దిగాలని డిమాండ్ చేశారు.
దేశ భవిష్యత్తును నిర్దేశించే 18.5 లక్షల మంది విద్యార్థుల పక్షాన తాము నిలబడతామని, పార్లమెంట్ లోపలా, వెలుపలా ఈ అన్యాయంపై గట్టిగా ప్రశ్నిస్తామని రాహుల్ గాంధీ పునరుద్ఘాటించారు. సుప్రీంకోర్టు పర్యవేక్షణలో ఈ నీట్ కుంభకోణంపై సమగ్ర విచారణ జరిపించాలని, బాధ్యులైన ఎంతటివారినైనా కఠినంగా శిక్షించాలని డిమాండ్ చేశారు. విద్యార్థులకు న్యాయం జరిగే వరకు, ఎన్‌టీఏ వ్యవస్థలో సమూల మార్పులు తెచ్చే వరకు కాంగ్రెస్ పార్టీ ఈ పోరాటాన్ని ఆపబోదని స్పష్టం చేశారు.