చంద్రబాబు సైకిల్ సవారీ….

చంద్రబాబు సైకిల్ సవారీ.
* విశాఖ తీరంలో 5.5 కిలోమీటర్ల దూరం ఉత్సాహంగా ప్రయాణం.
* ఏయూ మైదానం నుంచి నోవాటెల్ వరకు సాగిన ర్యాలీ.
* ఎండను లెక్కచేయకుండా 21 నిమిషాల్లోనే ముగించిన సీఎం.
* పెద్ద ఎత్తున తరలివచ్చిన అధికారులు, ప్రజాప్రతినిధులు.
విశాఖపట్నం , మహా.
ప్రపంచ పర్యావరణ దినోత్సవాన్ని పురస్కరించుకుని ఆంధ్రప్రదేశ్ ముఖ్యమంత్రి నారా చంద్రబాబు నాయుడు విశాఖపట్నంలో ఉత్సాహంగా సైకిల్ సవారీ చేశారు. పర్యావరణ పరిరక్షణ, కాలుష్య నివారణపై ప్రజల్లో అవగాహన కల్పించే లక్ష్యంతో నగరంలో నిర్వహించిన భారీ సైకిల్ ర్యాలీలో ఆయన స్వయంగా పాల్గొని అందరికీ ఆదర్శంగా నిలిచారు. నగరంలోని ఆంధ్ర యూనివర్సిటీ (ఏయూ) గ్రౌండ్స్ నుంచి నోవాటెల్ హోటల్ వరకు జరిగిన ఈ ర్యాలీలో సీఎం ఆద్యంతం ఉత్సాహంగా ముందుకు సాగారు. మొత్తం 5.5 కిలోమీటర్ల సుదీర్ఘ దూరాన్ని ఆయన కేవలం 21 నిమిషాల 18 సెకన్ల వ్యవధిలోనే పూర్తి చేయడం విశేషం.
ఈ సైకిల్ యాత్ర ఏయూ మైదానంలో అత్యంత వైభవంగా ప్రారంభమైంది. అక్కడ నుంచి త్రీ టౌన్ పోలీస్ స్టేషన్, పోలమాంబ గుడి, వాల్తేరు జంక్షన్ మరియు ఆర్కే బీచ్ రోడ్డు మీదుగా సాగుతూ చివరికి నోవాటెల్ హోటల్ వద్ద ముగిసింది. ర్యాలీ సమయంలో ఎండ తీవ్రత ఎక్కువగా ఉన్నప్పటికీ, 70 ఏళ్ల వయసులోనూ చంద్రబాబు ఏమాత్రం అలసట చెందకుండా యువకుడిలా అత్యంత వేగంగా సైకిల్ తొక్కుతూ ముందుకు సాగారు. దారిపొడవునా రోడ్డుకు ఇరువైపులా నిలబడి హర్షధ్వానాలు చేస్తున్న అభిమానులకు, స్థానిక ప్రజలకు చిరునవ్వుతో అభివాదం చేస్తూ ఆయన తన ప్రయాణాన్ని కొనసాగించారు.
ముఖ్యమంత్రి చేపట్టిన ఈ పర్యావరణ చైతన్య యాత్రలో విశాఖ జిల్లాకు చెందిన పలువురు ప్రజాప్రతినిధులు, ఉన్నతాధికారులు, స్వచ్ఛంద సంస్థల ప్రతినిధులు మరియు స్థానిక ప్రజలు, విద్యార్థులు పెద్ద సంఖ్యలో పాల్గొని చంద్రబాబుతో కలిసి సైకిళ్లు తొక్కారు. పచ్చదనం-పరిశుభ్రతతో పాటు శారీరక ఫిట్‌నెస్ కోసం, ఇంధన పొదుపు కోసం ప్రతి ఒక్కరూ తమ దైనందిన జీవితంలో సైకిలింగ్‌ను ఒక అలవాటుగా మార్చుకోవాలనే సందేశాన్ని ఈ ర్యాలీ ద్వారా చాటిచెప్పారు. విశాఖ తీర ప్రాంతంలో సాగిన ఈ వినూత్న కార్యక్రమం నగరవాసులను విశేషంగా ఆకట్టుకుంది.