ఎంపీ ఈటలపై ఫ్లెక్సీల కలకలం.
* ఎస్వోటీ వలలో నలుగురు నిందితులు.
* తెరవెనుక అసలు సూత్రధారులను తేల్చాలని బీజేపీ శ్రేణుల డిమాండ్.
హైదరాబాద్, మహా.
మల్కాజిగిరి పార్లమెంట్ సభ్యుడు ఈటల రాజేందర్కు వ్యతిరేకంగా వివాదాస్పద ఫ్లెక్సీలు ఏర్పాటు చేసిన వ్యవహారంలో పోలీసుల దర్యాప్తు ముమ్మరమైంది. ఈ కేసుకు సంబంధించి మాదాపూర్ ఎస్వోటీ (స్పెషల్ ఆపరేషన్స్ టీమ్) పోలీసులు నలుగురు నిందితులను అదుపులోకి తీసుకున్నారు. ఇటీవలి కాలంలో ఎంపీ ఈటల రాజేందర్ను తీవ్రంగా విమర్శిస్తూ మల్కాజిగిరి పార్లమెంట్ నియోజకవర్గ పరిధిలోని కొంపల్లి, సుచిత్ర, కేపీహెచ్బీ కాలనీ తదితర ప్రాంతాల్లో కొందరు గుర్తుతెలియని వ్యక్తులు రాత్రికి రాత్రే ఫ్లెక్సీలు ఏర్పాటు చేసిన విషయం విదితమే. ఈ ఘటన స్థానికంగా తీవ్ర కలకలం రేపడమే కాకుండా, రాజకీయంగానూ దుమారానికి దారితీసింది.
తమ నేతను కించపరిచేలా ఉద్దేశపూర్వకంగా ఫ్లెక్సీలు ఏర్పాటు చేయడంపై తీవ్ర ఆగ్రహం వ్యక్తం చేసిన భారతీయ జనతా పార్టీ నాయకులు.. వెంటనే సైబరాబాద్ పోలీస్ కమిషనర్ను కలిసి ఫిర్యాదు చేశారు. దీనిపై కేసు నమోదు చేసుకున్న పోలీసులు దర్యాప్తును వేగవంతం చేశారు. ఈ క్రమంలోనే సీసీటీవీ ఫుటేజీలు, ఇతర సాంకేతిక ఆధారాల సహాయంతో ఫ్లెక్సీలు కట్టినవారిని గుర్తించిన మాదాపూర్ ఎస్వోటీ పోలీసులు పక్కా వ్యూహంతో నలుగురిని అరెస్టు చేశారు. అనంతరం తదుపరి లోతైన విచారణ నిమిత్తం ఆ నలుగురు నిందితులను కేపీహెచ్బీ పోలీసులకు అప్పగించారు.
మరోవైపు, నిందితుల అరెస్టు విషయం తెలుసుకున్న కూకట్పల్లి ప్రాంతానికి చెందిన పలువురు బీజేపీ నాయకులు, కార్యకర్తలు వెంటనే కేపీహెచ్బీ పోలీస్ స్టేషన్కు చేరుకున్నారు. ఈ సందర్భంగా వారు పోలీసుల దర్యాప్తుపై స్పందిస్తూ కీలక డిమాండ్లు ముందుంచారు. కేవలం ఫ్లెక్సీలు కట్టిన వారిని మాత్రమే పట్టుకుంటే సరిపోదని, అసలు ఏ ఉద్దేశంతో ఈ ఫ్లెక్సీలను ఏర్పాటు చేయించారో నిగ్గు తేల్చాలని పట్టుబట్టారు. పార్లమెంటు సభ్యుడిపై ఇంతటి దుష్ప్రచారానికి ఒడిగట్టిన వారి వెనుక ఉన్న అసలు సూత్రధారులు ఎవరన్నది విచారణలో బయటపెట్టి, వారిపై కూడా కఠిన చర్యలు తీసుకోవాలని బీజేపీ శ్రేణులు డిమాండ్ చేశాయి.
