రాజ్యసభ బరిలో కూటమి అభ్యర్థులు…

రాజ్యసభ బరిలో కూటమి అభ్యర్థులు.
* నామినేషన్లు దాఖలు చేసిన సానా సతీష్, చింతకాయల విజయ్, భాష్యం రామకృష్ణ.
* మిత్రపక్షం జనసేన తరఫున లింగమనేని రమేష్ సైతం నామినేషన్ దాఖలు.
* శనివారమే అభ్యర్థులను ప్రకటించి బీ-ఫారాలు అందించిన చంద్రబాబు.
*సామాజిక సమీకరణాలు, విధేయతకే పెద్దపీట వేసిన తెలుగుదేశం అధినాయకత్వం.
అమరావతి, మహా.
ఆంధ్రప్రదేశ్‌లో ఖాళీగా ఉన్న రాజ్యసభ స్థానాల భర్తీకి సంబంధించిన ఎన్నికల ప్రక్రియ ఊపందుకుంది. తెలుగుదేశం పార్టీ (టీడీపీ) తరఫున ఎంపికైన ముగ్గురు అభ్యర్థులు సోమవారం అమరావతిలో తమ నామినేషన్ పత్రాలను అత్యంత ఉత్సాహభరిత వాతావరణంలో దాఖలు చేశారు. టీడీపీ అభ్యర్థులుగా ఖరారైన సానా సతీష్, చింతకాయల విజయ్, భాష్యం రామకృష్ణ మంగళగిరిలోని పార్టీ కేంద్ర కార్యాలయంలో తెలుగుజాతి ఆరాధ్యదైవం, నందమూరి తారకరామారావు విగ్రహానికి పూలమాలలు వేసి ఘనంగా నివాళులర్పించారు. అనంతరం పార్టీ ముఖ్య నేతలు, మంత్రులు, భారీ సంఖ్యలో తరలివచ్చిన కార్యకర్తలతో కలిసి అసెంబ్లీ ప్రాంగణంలోని రిటర్నింగ్ అధికారి కార్యాలయానికి చేరుకుని తమ నామినేషన్లను అధికారికంగా సమర్పించారు.
**సామాజిక సమతుల్యత, విధేయతలకు చంద్రబాబు గుర్తింపు**
రాజ్యసభ రేసులో నిలిచే ఈ ముగ్గురు అభ్యర్థుల పేర్లను శనివారమే ఖరారు చేసిన టీడీపీ జాతీయ అధ్యక్షుడు, ముఖ్యమంత్రి నారా చంద్రబాబు నాయుడు వారికి పార్టీ తరఫున బీ-ఫారాలను అందజేశారు. అభ్యర్థుల ఎంపికలో సామాజిక సమీకరణాలు, పార్టీ పట్ల ఉన్న సుదీర్ఘ విధేయత, క్రమశిక్షణను అధినాయకత్వం ప్రధానంగా పరిగణనలోకి తీసుకుంది. వెనుకబడిన వర్గాలకు (బీసీ) సముచిత స్థానం కల్పించాలనే ఆలోచనతో కాకినాడకు చెందిన ప్రస్తుత రాజ్యసభ సభ్యుడు సానా సతీష్‌కు చంద్రబాబు మళ్లీ అవకాశం కల్పించారు. అలాగే, పార్టీలో యువతకు సముచిత ప్రాతినిధ్యం కల్పించాలనే ఉద్దేశంతో చింతకాయల విజయ్‌ను, కష్టకాలంలోనూ పార్టీకి వెన్నెముకలా నిలిచిన ప్రముఖ విద్యావేత్త భాష్యం రామకృష్ణను పెద్దల సభకు అభ్యర్థులుగా ఎంపిక చేసి సర్ప్రైజ్ ఇచ్చారు.
**అభ్యర్థుల నేపథ్యాలు ఇవే..**
ప్రస్తుతం రాజ్యసభ సభ్యుడిగా కొనసాగుతున్న సానా సతీష్ కాకినాడ ప్రాంతంలో బలమైన నేతగా గుర్తింపు పొందారు. ఇక భాష్యం విద్యాసంస్థల అధినేతగా ఉన్న రామకృష్ణ, గత ఐదేళ్ల కాలంలో పార్టీ తీవ్రమైన ప్రతికూల పరిస్థితులను ఎదుర్కొంటున్న తరుణంలో ఆర్థికంగా, నైతికంగా పార్టీ శ్రేణులకు కొండంత అండగా నిలిచారు. మరో అభ్యర్థి చింతకాయల విజయ్.. ప్రస్తుత అసెంబ్లీ స్పీకర్, టీడీపీ రాష్ట్ర ప్రధాన కార్యదర్శి చింతకాయల అయ్యన్నపాత్రుడి కుమారుడు. గత సాధారణ ఎన్నికల సమయంలోనే ఆయన లోక్‌సభ టికెట్ ఆశించినప్పటికీ, కూటమి పొత్తులు మరియు పార్టీ అంతర్గత సమీకరణాల దృష్ట్యా అధిష్ఠానం ఆదేశాలను శిరసావహించి క్రమశిక్షణ గల కార్యకర్తగా పనిచేశారు. ఆయన చూపిన ఈ క్రమశిక్షణకు, నిబద్ధతకు గుర్తింపుగా చంద్రబాబు ఇప్పుడు రాజ్యసభకు పంపేందుకు మొగ్గు చూపారు.
**జనసేన అభ్యర్థిగా లింగమనేని రమేష్.. కూటమి విజయం లాంఛనమే**
ఇదే సమయంలో కూటమిలోని మరో మిత్రపక్షమైన జనసేన తరఫున ప్రముఖ పారిశ్రామికవేత్త లింగమనేని రమేష్ కూడా తన నామినేషన్ పత్రాలను దాఖలు చేశారు. టీడీపీ, జనసేన అభ్యర్థుల నామినేషన్ల దాఖలు కార్యక్రమం విజయవంతంగా ముగియడంతో అసెంబ్లీ ప్రాంగణంలో కోలాహలం నెలకొంది. అయితే, తెలుగుదేశం పార్టీ ప్రకటించిన అభ్యర్థుల జాబితాలో మహిళలకు కనీస స్థానం కల్పించలేదంటూ ప్రతిపక్ష వైకాపా విమర్శల దాడికి దిగింది. జూన్ 18న ఈ రాజ్యసభ స్థానాలకు పోలింగ్ జరగనుండగా, ఏపీ అసెంబ్లీలో ప్రస్తుతం అధికార ఎన్డీఏ కూటమికి ఉన్న తిరుగులేని, భారీ సంఖ్యాబలం దృష్ట్యా కూటమి అభ్యర్థులందరి విజయం కేవలం లాంఛనమేనని రాజకీయ విశ్లేషకులు స్పష్టం చేస్తున్నారు.