ప్రధాని మోదీ సేవా స్ఫూర్తితో ‘మన బడి – మన బాధ్యత’.

• ప్రధాని మోదీ సేవా స్ఫూర్తితో ‘మన బడి – మన బాధ్యత’.
• ప్రభుత్వ పాఠశాలల్లో ముమ్మరంగా స్వచ్ఛతా కార్యక్రమాలు.

కరీంనగర్, మహా.

ప్రభుత్వ పాఠశాలలను పరిశుభ్రంగా ఉంచుతూ విద్యార్థులకు ఆహ్లాదకరమైన విద్యా వాతావరణాన్ని అందించాలనే సదుద్దేశంతో కరీంనగర్ పార్లమెంట్ నియోజకవర్గ పరిధిలో ‘మన బడి – మన బాధ్యత’ కార్యక్రమం ఉత్సాహంగా కొనసాగుతోంది. ‘కరీంనగర్ సేవలో’ అనే బృహత్తర కార్యక్రమంలో భాగంగా సిరిసిల్లలోని ప్రసిద్ధ కుసుమ రామయ్య ప్రభుత్వ పాఠశాలలో భారీ ఎత్తున శ్రమదానం, పారిశుద్ధ్య కార్యక్రమాలను నిర్వహించారు. సెలవుల అనంతరం విద్యార్థులు తిరిగి బడులకు వస్తున్న నేపథ్యంలో.. వారు అడుగుపెట్టే సమయానికి పాఠశాల ఆవరణ అంతా పరిశుభ్రంగా, సురక్షితంగా, వారిని ఆహ్వానించేలా ఉండాలన్న ఉన్నత లక్ష్యంతో సామాజిక కార్యకర్తలు, స్థానికులు ఈ మహాకార్యంలో భాగస్వాములయ్యారు.

ప్రధానమంత్రి నరేంద్ర మోదీ నిస్వార్థంగా సాగిస్తున్న 12 ఏళ్ల సుదీర్ఘ ప్రజా సేవ (12 ఇయర్స్ ఆఫ్ సేవ) స్ఫూర్తితో భారతీయ జనతా పార్టీ నాయకులు, కార్యకర్తలు ఈ కార్యక్రమానికి శ్రీకారం చుట్టారు. కరీంనగర్ పార్లమెంట్ నియోజకవర్గ పరిధిలోని పలు ప్రభుత్వ పాఠశాలల్లో బీజేపీ శ్రేణులు పార, చీపురు పట్టి స్వచ్ఛతా కార్యక్రమాలను ముమ్మరంగా చేపట్టారు. కుసుమ రామయ్య పాఠశాలలో జరిగిన ఈ కార్యక్రమంలో స్థానిక నాయకులు, యువత, స్వచ్ఛంద సంస్థల ప్రతినిధులు ఉత్సాహంగా పాల్గొని పాఠశాల ఆవరణలోని పిచ్చిమొక్కలు, చెత్తాచెదారాన్ని తొలగించారు. తరగతి గదులు, పరిసరాలను శుభ్రం చేసి విద్యార్థులకు సీజనల్ వ్యాధులు ప్రబలకుండా ముందస్తు జాగ్రత్తలు తీసుకున్నారు. బడి బాగుపడితేనే భావితరం బాగుపడుతుందని, కేవలం ప్రభుత్వమే కాకుండా సమాజంలోని ప్రతి ఒక్కరూ ప్రభుత్వ పాఠశాలల పరిరక్షణలో భాగస్వాములు కావాలన్న సందేశాన్ని ఈ కార్యక్రమం ద్వారా బలంగా చాటిచెప్పారు.

కరీంనగర్ లోక్‌సభ నియోజకవర్గ వ్యాప్తంగా ఉన్న ప్రభుత్వ బడుల్లో పరిశుభ్రతను పెంపొందించేందుకు కమలనాథులు నడుంబిగించారు. విద్యార్థులకు నాణ్యమైన విద్యతో పాటు ఆరోగ్యకరమైన వాతావరణం కల్పించడం మనందరి సామాజిక బాధ్యత అని, ఈ దిశగా ‘మన బడి – మన బాధ్యత’ కార్యక్రమం ప్రతి ఒక్కరిలో అవగాహన కల్పిస్తోందని నిర్వాహకులు తెలిపారు. ప్రధానమంత్రి నరేంద్ర మోదీ సేవా దృక్పథాన్ని, ఆదర్శాలను పుణికిపుచ్చుకుని, రాబోయే రోజుల్లోనూ విద్యాసంస్థల బలోపేతానికి ఇలాంటి సామాజిక కార్యక్రమాలు నిరంతరాయంగా కొనసాగిస్తామని పార్టీ శ్రేణులు స్పష్టం చేశాయి. పాలకుల చిత్తశుద్ధికి, ప్రజల భాగస్వామ్యం తోడైతే ప్రభుత్వ పాఠశాలలు ఎలా రూపుదిద్దుకుంటాయో ఈ కార్యక్రమం ద్వారా కళ్లకు కట్టినట్లు చూపించారు.