దేశవ్యాప్తంగా టెలిగ్రామ్ యాప్పై తాత్కాలిక నిషేధం.
* నీట్ రీ-ఎగ్జామ్ నేపథ్యంలో కేంద్ర ప్రభుత్వ సంచలన నిర్ణయం.
* జూన్ 22 వరకు సేవలు బంద్.. ప్లేస్టోర్ల నుంచి తొలగింపు.
* పేపర్ లీక్ వదంతులను అరికట్టేందుకే ఉక్కుపాదం.
ఢిల్లీ, మహా.
దేశవ్యాప్తంగా వైద్య విద్య కోర్సుల్లో ప్రవేశాలకు నిర్వహించే నీట్-యూజీ 2026 రీ-ఎగ్జామినేషన్ నేపథ్యంలో కేంద్ర ప్రభుత్వం సంచలన నిర్ణయం తీసుకుంది. ప్రముఖ మెసేజింగ్ యాప్ ‘టెలిగ్రామ్’పై భారత్లో తాత్కాలిక నిషేధం విధిస్తూ కీలక ఉత్తర్వులు జారీ చేసింది. ఈ ఆదేశాల మేరకు జూన్ 22 వరకు దేశవ్యాప్తంగా టెలిగ్రామ్ సేవలు ఏమాత్రం అందుబాటులో ఉండవని స్పష్టం చేసింది. నీట్ పరీక్షల సమయంలో అక్రమాలకు పాల్పడే ముఠాలను అరికట్టడంతో పాటు, పేపర్ లీక్ వంటి తప్పుడు సమాచార వ్యాప్తికి చెక్ పెట్టే పకడ్బందీ చర్యల్లో భాగంగానే కేంద్రం ఈ కఠిన నిర్ణయం తీసుకుంది.
నేషనల్ టెస్టింగ్ ఏజెన్సీ (ఎన్టీఏ) చేసిన అత్యవసర సిఫార్సుల మేరకు ఇన్ఫర్మేషన్ టెక్నాలజీ యాక్ట్-2000లోని సెక్షన్ 69ఏ కింద కేంద్రం ఈ నిషేధ ఉత్తర్వులను జారీ చేసింది. ప్రభుత్వ ఆదేశాల ఫలితంగా గూగుల్ ప్లే స్టోర్ నుంచి టెలిగ్రామ్ యాప్ను తక్షణమే తొలగించారు. అలాగే యాపిల్ యాప్ స్టోర్లో సైతం ఈ యాప్ను తాత్కాలికంగా అందుబాటులో లేకుండా చేయాలని ప్రభుత్వం టెక్ దిగ్గజాలకు స్పష్టమైన ఆదేశాలు జారీ చేసింది. మే 2026లో జరిగిన నీట్ పరీక్షలో భారీ ఎత్తున పేపర్ లీక్ ఆరోపణలు వెల్లువెత్తిన సంగతి తెలిసిందే. ఈ ఆరోపణల నేపథ్యంలో జూన్ 21న ఎన్టీఏ పకడ్బందీగా రీ-ఎగ్జామ్ నిర్వహిస్తోంది.
ఈ ప్రతిష్ఠాత్మక పరీక్ష సమయంలో పలు టెలిగ్రామ్ ఛానెళ్లు, గ్రూపుల ద్వారా చీటింగ్ ముఠాలు విద్యార్థులను తప్పుదోవ పట్టిస్తున్నట్లు ఎన్టీఏ గుర్తించింది. అక్రమాలకు పాల్పడుతున్న కొన్ని ఛానెళ్లను బ్లాక్ చేసినప్పటికీ సమస్య తీవ్రత ఏమాత్రం తగ్గలేదు. దీంతో ఏకంగా టెలిగ్రామ్ యాప్పైనే దేశవ్యాప్త నిషేధానికి ఎన్టీఏ సిఫార్సు చేయగా, ప్రభుత్వం వెంటనే స్పందించి ఈ చర్యలు చేపట్టింది. యాప్ నిషేధంతో పాటుగా.. జూన్ 30 వరకు టెలిగ్రామ్లో ఉండే ‘మెసేజ్ ఎడిటింగ్’ ఫీచర్ను కూడా పూర్తిగా నిలిపివేయాలని కేంద్రం ఆదేశించింది. పాత మెసేజ్లను తమకు అనుకూలంగా ఎడిట్ చేస్తూ, పరీక్షకు ముందే పేపర్ లీక్ అయినట్లు కొందరు కృత్రిమ ఆధారాలు సృష్టిస్తున్న ఉదంతాలను తీవ్రంగా పరిగణించిన ప్రభుత్వం ఈ మేరకు పకడ్బందీ చర్యలకు ఉపక్రమించింది.
