అయోధ్య రాముడికి రూ. లక్ష విలువైన ‘మియాజాకి’ మామిడి నైవేద్యం.
* తొలి కాపు ఫలాన్ని స్వామివారికి సమర్పించిన స్థానిక రైతు.
* కిలో ధర రూ. 3 లక్షల వరకు పలికే అరుదైన విదేశీ రకం.
* అయోధ్య పుణ్యభూమిపై తొలిసారిగా పండిన ‘ఎగ్ ఆఫ్ ది సన్’.
అయోధ్య, మహా.
రామజన్మభూమి అయోధ్యలో ఒక అరుదైన, భక్తిపూర్వక ఘట్టం ఆవిష్కృతమైంది. ప్రపంచంలోనే అత్యంత ఖరీదైన మామిడి రకంగా పేరొందిన జపాన్కు చెందిన ‘మియాజాకి’ పండును అయోధ్య రాముడికి నైవేద్యంగా సమర్పించారు. అంతర్జాతీయంగా ‘ఎగ్ ఆఫ్ ది సన్’ (సూర్యుడి అండం) అని కూడా పిలిచే ఈ అత్యంత అరుదైన పండును స్థానిక రైతు ఒకరు తన తోటలో పండించి, అందులో కాసిన తొలి ఫలాన్ని బాలరాముడికి అర్పించి తన భక్తిని చాటుకున్నారు.
అయోధ్యకు చెందిన ఓంప్రకాశ్ సింగ్ అనే రైతు సుమారు రెండేళ్ల క్రితం ప్రయోగాత్మకంగా ఈ మియాజాకి మొక్కను తన తోటలో నాటారు. అయోధ్య వాతావరణ పరిస్థితుల్లో ఈ జపాన్ రకం పెరుగుతుందో లేదోనని ఆయన చేసిన ప్రయోగం అద్భుతంగా విజయవంతమైంది. ఈ సీజన్లో ఆయన తోటలోని సదరు చెట్టుకు సుమారు డజను మామిడి పండ్లు కాశాయి. ఈ క్రమంలోనే స్థానిక సంప్రదాయాన్ని పాటిస్తూ, తోటలో పండిన తొలి పండును విక్రయించడానికి కానీ, తాము తినడానికి కానీ ఇష్టపడకుండా, పవిత్ర తులసి దళంతో కలిపి భగవంతుడికి నైవేద్యంగా అర్పించారు.
అంతర్జాతీయ మార్కెట్లో ఈ మియాజాకి మామిడి పండ్ల ధర కిలోకు రూ. 2.5 లక్షల నుంచి రూ. 3 లక్షల వరకు పలుకుతుంది. ఆ లెక్కన చూస్తే ఒక్కో పండు విలువ సుమారు లక్ష రూపాయల వరకు ఉంటుందని అంచనా. చూడటానికి ముదురు రూబీ ఎరుపు రంగులో మెరిసిపోయే ఈ పండు, అద్భుతమైన తీపితో పాటు లోపల ఎలాంటి పీచు లేకుండా నోట్లో వేస్తే కరిగిపోయేలా ఉండటం దీని ప్రత్యేకత.
ఈ విశేష ఘట్టంపై మహంత్ సీతారాం దాస్ జీ మహారాజ్ స్పందిస్తూ, పండ్లలో మామిడి రారాజు అని కొనియాడారు. ఈ పండు వర్ణం సాక్షాత్తు సూర్య భగవానుడిని పోలి ఉంటుందని, అయోధ్య పవిత్ర భూమిపై ఈ తరహా విశిష్ట ఫలం పండటం ఇదే తొలిసారి అని హర్షం వ్యక్తం చేశారు. ఇంతటి అరుదైన, ఖరీదైన పండును మొట్టమొదటగా భగవంతుడికి సమర్పించడం ఎంతో సంతోషదాయకమని పేర్కొన్నారు. కాగా, రైతు ఓంప్రకాశ్ సింగ్ తోటలో కేవలం మియాజాకి మాత్రమే కాకుండా, థాయ్లాండ్కు చెందిన ‘బనానా మ్యాంగో’, ఆస్ట్రేలియాకు చెందిన ‘R2E2’ వంటి మరికొన్ని విదేశీ మామిడి రకాలు కూడా విజయవంతంగా సాగవుతుండటం గమనార్హం.
