సమగ్ర వ్యవసాయ ప్రణాళికతో ముందడుగు!

సమగ్ర వ్యవసాయ ప్రణాళికతో ముందడుగు!
* సాఫీగా సాగేలా ఉన్నతాధికారుల కమిటీ ఏర్పాటు.
* రైతు వేదికల్లో సబ్సిడీపై 7 రకాల సన్న వడ్ల విత్తనాలు.
* యాప్‌ ద్వారానే ఎరువుల బుకింగ్‌కు సీఎం రేవంత్‌రెడ్డి ఆదేశం.
హైదరాబాద్, మహా.
రాష్ట్రంలో విత్తనాల సరఫరా మొదలుకొని పండించిన పంట ఉత్పత్తుల కొనుగోళ్ల వరకు ప్రతి దశలోనూ సమగ్ర ప్రణాళిక, నిర్దిష్ట కార్యాచరణతో ముందుకు వెళ్లాలని ముఖ్యమంత్రి ఎ. రేవంత్‌రెడ్డి అధికారులను ఆదేశించారు. రానున్న వ్యవసాయ సీజన్‌ను అత్యంత సాఫీగా నిర్వహించేందుకు వీలుగా ప్రభుత్వం ఒక ఉన్నతాధికారుల కమిటీని ఏర్పాటు చేసింది. హైదరాబాద్‌లోని ఎంసీఆర్‌హెచ్‌ఆర్‌డీ బోధి పెవిలియన్‌లో రానున్న వ్యవసాయ సీజన్‌ సన్నద్ధతపై ముఖ్యమంత్రి ఉన్నతస్థాయి సమీక్షా సమావేశం నిర్వహించారు. ఈ సందర్భంగా ధాన్యం కొనుగోళ్లలో రైతులు ఎలాంటి ఇబ్బందులు పడకుండా చేపట్టాల్సిన చర్యలపై రైతు కమిషన్‌, అగ్రికల్చర్‌ యూనివర్సిటీ, వ్యవసాయ నిపుణులు ఇచ్చిన వివిధ కీలక సూచనలను ఆయన పరిశీలించారు.
**ప్రతి దశపై వ్యవసాయ శాఖకు పూర్తి అవగాహన ఉండాలి**
రైతులకు సంబంధించిన ప్రతి చిన్న అంశంపై ప్రభుత్వం ప్రత్యేక శ్రద్ధ వహిస్తుందని సీఎం స్పష్టం చేశారు. పంట వేసిన నాటి నుంచే రైతుల వివరాల నమోదు, పంటల రికార్డుల నిర్వహణ, దిగుబడి అంచనాలు, ధాన్యం కొనుగోళ్ల వరకు ప్రతి దశలోనూ వ్యవసాయ శాఖకు పూర్తి అవగాహన ఉండాలని తేల్చిచెప్పారు. వచ్చే సీజన్‌లో కొనుగోళ్లు నిరంతరాయంగా సాగేలా వ్యవసాయ శాఖ కార్యదర్శి ఆధ్వర్యంలో వ్యవసాయ శాఖ డైరెక్టర్, పౌరసరఫరాల శాఖ ఎండీ, ప్రణాళిక శాఖ కార్యదర్శి సభ్యులుగా ఉన్నతస్థాయి కమిటీని ఏర్పాటు చేస్తున్నట్లు ప్రకటించారు. కేంద్ర ప్రభుత్వం నిర్దేశించిన కోటాకు అనుగుణంగా రాష్ట్రంలో పంట ఉత్పత్తుల కొనుగోళ్లు జరగాలని, ధాన్యం కొనుగోళ్ల సమయంలో అకాల వర్షాలు, తూకం, రవాణా, నిల్వ, మార్కెటింగ్‌ వంటి సవాళ్లను ఎదుర్కొనేందుకు ముందుగానే కార్యాచరణ సిద్ధం చేసుకోవాలని సూచించారు.
**సబ్సిడీపై 7 రకాల సన్న వడ్ల విత్తనాలు**
రాష్ట్ర ప్రభుత్వం సన్న వడ్లు పండించే రైతులకు బోనస్ అందిస్తున్న నేపథ్యంలో, అందుకు అనుగుణంగా రైతులకు మేలు చేసేలా కీలక నిర్ణయం తీసుకుంది. బోనస్ లభించే **7 రకాల సన్న వడ్ల విత్తనాలను** రైతు వేదికల్లో సబ్సిడీ ధరలకే రైతులకు అందుబాటులో ఉంచాలని ముఖ్యమంత్రి ఆదేశించారు. రైతు వేదికలను కేవలం భవనాలుగా కాకుండా, రైతుల అవసరాలను తీర్చే సంపూర్ణ సేవా కేంద్రాలుగా తీర్చేదిద్దాలన్నారు. రైతులు తమ వివరాలను అక్కడే నమోదు చేసుకుని, తమకు కావలసిన విత్తనాలు, ఎరువులను నేరుగా కొనుగోలు చేసేలా అన్ని వసతులు కల్పించాలని అధికారులను ఆదేశించారు.
**సాంకేతిక పరిజ్ఞానం, ఏఐ విధానాల అనుసంధానం**
వ్యవసాయ రంగంలో ఆధునిక సాంకేతిక పరిజ్ఞానం వినియోగాన్ని మరింత పెంచాల్సిన అవసరం ఉందని ముఖ్యమంత్రి రేవంత్‌రెడ్డి అభిప్రాయపడ్డారు. ముఖ్యంగా **ఏఐ (కృత్రిమ మేధ) ఆధారిత విధానాలను** వ్యవసాయంలో సమర్థంగా అమలు చేయాలని పిలుపునిచ్చారు. ప్రొఫెసర్ జయశంకర్ అగ్రికల్చర్ యూనివర్సిటీని నోడల్ ఏజెన్సీగా నియమించి, విత్తన సరఫరా నుంచి కొనుగోళ్ల వరకు మొత్తం వ్యవస్థను సాంకేతికతతో అనుసంధానించాలని ఆదేశించారు. ఇందుకోసం వ్యవసాయ శాఖ, సివిల్ సప్లైస్, అగ్రికల్చర్ యూనివర్సిటీ పరస్పర సమన్వయంతో పనిచేయాలన్నారు. భద్రాద్రి కొత్తగూడెం జిల్లా దమ్మపేట మండలంలో ఇప్పటికే ప్రారంభించిన ఏఐ పైలట్ ప్రాజెక్ట్ ఫలితాలను క్షుణ్ణంగా అధ్యయనం చేసి, తదుపరి చర్యలు చేపట్టాలని సూచించారు.
**యాప్‌ ద్వారానే ఎరువుల బుకింగ్‌.. జిల్లా అదనపు కలెక్టర్లకు పర్యవేక్షణ**
ఎరువుల పంపిణీ వ్యవస్థలో పారదర్శకతను పెంచడంతో పాటు వేగంగా రైతులకు అందించేందుకు వీలుగా ప్రభుత్వం సరికొత్త విధానాన్ని ప్రవేశపెట్టనుంది. ఇకపై అన్ని రకాల ఫెర్టిలైజర్లను **ప్రత్యేక యాప్‌ ద్వారానే బుక్ చేసే** విధానాన్ని తీసుకురావాలని సీఎం ఆదేశించారు. యూరియా పంపిణీ బాధ్యతలను జిల్లా అదనపు కలెక్టర్లకు అప్పగించాల్సిందిగా స్పష్టం చేశారు. రామగుండం కర్మాగారంలో ఉత్పత్తి అయ్యే ఎరువులను అత్యధికంగా తెలంగాణ రాష్ట్రానికే కేటాయించేలా కేంద్ర ప్రభుత్వంపై ఒత్తిడి తీసుకురావాలని అధికారులకు దిశానిర్దేశం చేశారు. ఖరీఫ్ సీజన్‌కు అవసరమైన యూరియా కేటాయింపులపై కేంద్రానికి ఎప్పటికప్పుడు లేఖలు రాయాలని ఈ సందర్భంగా వ్యవసాయ శాఖ మంత్రి తుమ్మల నాగేశ్వరరావుకు సీఎం సూచించారు. రాష్ట్రంలోని అన్ని రాజకీయ పార్టీల ఎంపీలతో ఒక ప్రత్యేక సమావేశాన్ని ఏర్పాటు చేసి, ఎరువుల సరఫరాపై ఉన్న వాస్తవ పరిస్థితులను వివరించాలని నిర్ణయించారు.
**ఆయిల్‌ఫెడ్, ప్రభుత్వ డైరీల బలోపేతం**
వ్యవసాయ అనుబంధ రంగాల అభివృద్ధిపై కూడా ముఖ్యమంత్రి ప్రత్యేకంగా సమీక్షించారు. గతంలో టన్నుకు రూ. 13 వేల ధర పలికిన పరిస్థితి నుంచి, ఈసారి ఏకంగా రూ. 21 వేలకు పైగా టెండర్ రేటు రావడంపై హర్షం వ్యక్తం చేశారు. ఆయిల్‌ఫెడ్‌ను మరింత బలోపేతం చేస్తూ లాభాల బాటలో నడిపించాలని అధికారులను ఆదేశించారు. అలాగే, ప్రభుత్వ డైరీ (విజయ డెయిరీ)ని కూడా మార్కెట్‌లో తిరుగులేని శక్తిగా మార్చాలని, పాలు విక్రయించే పాడి రైతులకు సకాలంలో చెల్లింపులు జరిగేలా కచ్చితమైన చర్యలు తీసుకోవాలని ముఖ్యమంత్రి రేవంత్‌రెడ్డి స్పష్టం చేశారు.