అవినీతి ‘సుచరిత’ ఆస్తుల జాతర!
* సస్పెండెడ్ తహసీల్దార్ ఇళ్లలో ఏసీబీ తనిఖీలు.
* రూ.5.05 కోట్ల అక్రమాస్తుల గుర్తింపు.. మార్కెట్ విలువ మరిన్ని రెట్లు.
* కిలోల కొద్దీ బంగారం, వజ్రాభరణాలు, విలాసవంతమైన ఫ్లాట్లు స్వాధీనం.
హైదరాబాద్, మహా.
లంచం తీసుకుంటూ దొరికిపోయి ప్రస్తుతం రిమాండ్లో ఉన్న మేడ్చల్-మల్కాజ్గిరి జిల్లా శామీర్పేట మండలం మాజీ తహసీల్దార్ (ప్రస్తుతం సస్పెన్షన్లో ఉన్న) తుమ్మకొమ్మ సుచరితపై అవినీతి నిరోధక శాఖ (ఏసీబీ) మరో ఉచ్చు బిగించింది. ఆమె సంపాదించిన అక్రమాస్తులపై ప్రత్యేకంగా కేసు నమోదు చేసిన అధికారులు, గురువారం ఏకకాలంలో పలుచోట్ల సోదాలు నిర్వహించారు. సుచరిత తన సేవా కాలంలో లంచగొండితనానికి అలవాటుపడి, అధికార దుర్వినియోగంతో సంపాదించిన కోట్ల రూపాయల విలువైన స్థిరాస్తులు, చరాస్తులను అధికారులు ఈ తనిఖీల్లో కనుగొన్నారు. హైదరాబాదులోని ఆమె నివాసంతో పాటు బంధువులు, బినామీలు, ఇతర సహచరులకు చెందిన మరో మూడు ప్రాంతాల్లో ఏసీబీ బృందాలు ఈ సోదాలు చేపట్టాయి.
**రూ.1.20 కోట్ల బంగారం, వజ్రాలు.. విలాసవంతమైన ఫ్లాట్లు**
ఈ తనిఖీల్లో లభించిన పత్రాల ప్రకారం.. సుచరిత, ఆమె బంధువుల పేరిట భారీగా ఆస్తులున్నట్లు తేలింది. సిద్దిపేట జిల్లా మార్కూక్ మండలం దామరకుంట గ్రామంలో 2 ఎకరాల 17 గుంటల వ్యవసాయ భూమి ఉన్నట్లు ఏసీబీ గుర్తించింది. వీటితో పాటు హైదరాబాద్లోని వివిధ ప్రాంతాల్లో 3 విలాసవంతమైన ఫ్లాట్లు, కీసర, ఖానామెట్ గ్రామాల్లో 2 ఓపెన్ ప్లాట్లు ఉన్నట్లు సంబంధించిన పత్రాలను స్వాధీనం చేసుకున్నారు. ఇక సుచరిత నివాసంలో సోదాలు చేసిన అధికారులకు అక్షరాలా 12 లక్షల రూపాయల నగదు లభించింది. వీటితో పాటు ఆమె ఇంట్లో ఉన్న రూ.1.20 కోట్ల విలువైన బంగారం, వజ్రాభరణాలను చూసి అధికారులు అవాక్కయ్యారు. వివిధ బ్యాంకు ఖాతాల్లో దాదాపు 38 లక్షల రూపాయల నగదు నిల్వలు ఉన్నట్లు కనుగొన్నారు. ప్రయాణాల కోసం ఉపయోగించే ఒక వోక్స్వ్యాగన్, ఒక హ్యుందాయ్ క్రెటా కార్లను కూడా స్వాధీనం చేసుకున్నారు.
**అసలు విలువ వంద కోట్లు దాటేనా?**
ఏసీబీ స్వాధీనం చేసుకున్న దస్తావేజుల ప్రకారం.. ఈ మొత్తం ఆస్తుల విలువ రూ.5,05,52,465 (ఐదు కోట్ల ఐదు లక్షల యాభై రెండు వేల నాలుగు వందల అరవై ఐదు రూపాయలు) గా అధికారులు ప్రాథమికంగా తేల్చారు. అయితే ప్రభుత్వ ధరల ప్రకారం లెక్కించిన డాక్యుమెంట్ల విలువ ఇదైనప్పటికీ.. బహిరంగ మార్కెట్లో వీటి అసలు విలువ దీనికంటే మరిన్ని రెట్లు ఎక్కువగా ఉంటుందని ఏసీబీ అధికారులు అంచనా వేస్తున్నారు. సుచరితకు సంబంధించి మరికొన్ని అదనపు ఆస్తుల వివరాలను సేకరించేందుకు దర్యాప్తు ముమ్మరం చేశారు. గత నెల మే 26వ తేదీన శామీర్పేట తహసీల్దార్ కార్యాలయంలో నాలా కన్వర్షన్ (భూమి మార్పిడి) కోసం రైతుల నుంచి ఏకంగా రూ.30 లక్షల లంచం డిమాండ్ చేసి, అందులో భాగంగా తన డ్రైవర్ ద్వారా రూ.2 లక్షలు అడ్వాన్స్గా తీసుకుంటూ సుచరిత రెడ్ హ్యాండెడ్గా పట్టుబడిన విషయం తెలిసిందే. ఆ కేసులోనే ఆమె ప్రస్తుతం రిమాండ్పై జైల్లో ఉండగా.. తాజాగా వెలుగుచూసిన ఈ అక్రమాస్తుల పర్వం రెవెన్యూ వర్గాల్లో తీవ్ర కలకలం రేపుతోంది.
