పారితోషికం తగ్గితే ఇమేజ్ పడిపోతుందనే భయం.

హైదరాబాద్, మహా.
హీరోల పారితోషికాలు ఆకాశాన్ని తాకుతుండటంతో సినిమా బడ్జెట్లు అదుపు తప్పుతున్నాయనే చర్చ సినీ వర్గాల్లో ఎప్పటి నుంచో సాగుతోంది. భారీ పారితోషికాల వల్ల నిర్మాతలు తీవ్ర ఇబ్బందులు ఎదుర్కొంటున్నారనే వాదనల నేపథ్యంలో, తాజాగా అగ్ర నిర్మాత దిల్ రాజు ఓ పాడ్‌కాస్ట్‌లో మాట్లాడుతూ పలు సంచలన విషయాలను వెల్లడించారు. టాలీవుడ్ హీరోల ఆలోచనా విధానం, బడ్జెట్ లెక్కల గురించి ఆయన చేసిన వ్యాఖ్యలు ఇప్పుడు పరిశ్రమలో హాట్ టాపిక్‌గా మారాయి.
సినిమా మార్కెట్ లెక్కలు ఏ విధంగా ఉంటాయనేది తాను ఎంచుకునే హీరోలకు ముందే చాలా స్పష్టంగా వివరిస్తానని దిల్ రాజు తెలిపారు. తన బడ్జెట్ పరిధికి, లెక్కలకు సరిపోయే హీరోలతో మాత్రమే తాను సినిమాలు నిర్మిస్తానని ఆయన తేల్చి చెప్పారు. అయితే, టాలీవుడ్‌లోని అగ్ర హీరోలు తమ పారితోషికాన్ని తగ్గించుకోవడానికి ఏమాత్రం ఇష్టపడరని ఆయన బాంబు పేల్చారు. పారితోషికం తగ్గితే మార్కెట్‌లో తమ ‘ఇమేజ్’ ఎక్కడ పడిపోతుందోననే భయమే ఇందుకు ప్రధాన కారణమని దిల్ రాజు కుండబద్దలు కొట్టారు. సినిమా నిర్మాణంలో బడ్జెట్ కేటాయింపుల గురించి వివరిస్తూ.. ఒకవేళ రూ. 300 కోట్ల భారీ బడ్జెట్‌తో ఓ సినిమాను నిర్మిస్తే, అందులో దాదాపు 35 నుంచి 40 శాతం వరకు, అంటే అక్షరాలా రూ. 100 కోట్ల నుంచి రూ. 120 కోట్ల వరకు కేవలం ఒక్క హీరో రెమ్యునరేషన్‌కే వెళ్ళిపోతుందనే షాకింగ్ నిజాన్ని ఆయన బయటపెట్టారు.
టాలీవుడ్‌ నిర్మాణ రంగాన్ని పట్టి పీడిస్తున్న ఈ బడ్జెట్ సమస్యకు శాశ్వత చెక్ పెట్టాలంటే.. హిందీ చిత్రసీమ ప్రస్తుతం అనుసరిస్తున్న సరికొత్త వ్యాపార వ్యూహాన్ని మనం కూడా అందిపుచ్చుకోవాలని దిల్ రాజు సూచించారు. బాలీవుడ్‌లో ఇప్పుడు స్టార్ హీరోలు ముందే వందల కోట్ల రూపాయల పారితోషికం డిమాండ్ చేసే విధానానికి క్రమంగా స్వస్తి పలుకుతున్నారని, సినిమా రిలీజ్ అయ్యాక వచ్చే లాభాల్లో వాటా తీసుకునే ‘ప్రాఫిట్ షేరింగ్ మోడల్’ వైపు అడుగులు వేస్తున్నారని ఆయన వివరించారు.
ఈ ‘ప్రాఫిట్ షేరింగ్’ విధానానికి బాలీవుడ్ స్టార్ హీరో అక్షయ్ కుమార్‌ను దిల్ రాజు అత్యుత్తమ ఉదాహరణగా పేర్కొన్నారు. ఒకప్పుడు అక్షయ్ కుమార్ ఒక్కో సినిమాకు ఏకంగా రూ. 130 కోట్ల వరకు ఫిక్స్‌డ్ రెమ్యునరేషన్ తీసుకునేవారని దిల్ రాజు గుర్తుచేశారు. కానీ, మారుతున్న పరిస్థితులు, ప్రస్తుత మార్కెట్ ఒడిదుడుకుల దృష్ట్యా ఆయన కూడా తన పంథాను మార్చుకుని, లాభాల్లో వాటా తీసుకునే విధానాన్నే ఎంచుకున్నారని స్పష్టం చేశారు. టాలీవుడ్ హీరోలు కూడా మార్కెట్ వాస్తవాలను గ్రహించి ఈ తరహా విధానం వైపు మొగ్గుచూపితే పరిశ్రమకు ఎంతో మేలు జరుగుతుందని దిల్ రాజు తన అభిప్రాయాన్ని కుండబద్దలు కొట్టారు.