- దేశవ్యాప్తంగా ఆందోళనకర గణాంకాలు
ఢిల్లీ, మహా.
దేశంలో మధుమేహం వ్యాప్తి ఆందోళనకర స్థాయికి చేరుకుందని తాజా అధ్యయనాలు సూచిస్తున్నాయి. రాష్ట్రాలు, కేంద్ర పాలిత ప్రాంతాల వారీగా పరిశీలించిన గణాంకాల్లో గోవా అత్యధికంగా 26.4 శాతం మధుమేహ బాధితులతో మొదటి స్థానంలో నిలవగా, పుదుచ్చేరి 26.3 శాతం, కేరళ 25.5 శాతంతో తర్వాతి స్థానాల్లో ఉన్నాయి. మరోవైపు ఉత్తరప్రదేశ్లో కేవలం 4.8 శాతం మాత్రమే నమోదవడంతో అత్యల్ప మధుమేహ ప్రాబల్యం ఉన్న రాష్ట్రంగా గుర్తింపు పొందింది.
గణాంకాల ప్రకారం గోవా తర్వాత పుదుచ్చేరి, కేరళ, చండీగఢ్, ఢిల్లీ రాష్ట్రాలు, కేంద్ర పాలిత ప్రాంతాల్లో మధుమేహం అధికంగా నమోదైంది. తమిళనాడు 14.4 శాతం, పశ్చిమ బెంగాల్ 13.7 శాతం, సిక్కిం 12.8 శాతం, పంజాబ్ 12.7 శాతం, హర్యానా 12.4 శాతంతో మొదటి పది స్థానాల్లో ఉన్నాయి. ఈ గణాంకాలు దేశంలో జీవనశైలి సంబంధిత వ్యాధులు వేగంగా పెరుగుతున్నాయనే విషయాన్ని స్పష్టం చేస్తున్నాయి.
నిపుణుల అభిప్రాయం ప్రకారం అధిక కేలరీల ఆహారం, శారీరక శ్రమ తగ్గడం, ఊబకాయం, మానసిక ఒత్తిడి, నిద్రలేమి వంటి అంశాలు మధుమేహం పెరుగుదలకు ప్రధాన కారణాలుగా నిలుస్తున్నాయి. ముఖ్యంగా పట్టణ ప్రాంతాల్లో ఈ వ్యాధి వేగంగా విస్తరిస్తోందని వారు చెబుతున్నారు.
మధుమేహం ప్రారంభ దశలో స్పష్టమైన లక్షణాలు కనిపించకపోవడం వల్ల చాలా మంది ఆలస్యంగా గుర్తిస్తున్నారని వైద్యులు హెచ్చరిస్తున్నారు. తరచూ దాహం వేయడం, మూత్ర విసర్జన పెరగడం, అలసట, బరువు తగ్గడం, చూపు మందగించడం వంటి లక్షణాలు కనిపిస్తే వెంటనే వైద్యులను సంప్రదించాలని సూచిస్తున్నారు.
ఈ పరిస్థితుల్లో ప్రజలు సమతుల్య ఆహారం తీసుకోవడం, ప్రతిరోజూ వ్యాయామం చేయడం, శరీర బరువును నియంత్రణలో ఉంచడం, కాలానుగుణంగా రక్తంలో చక్కెర స్థాయిలను పరీక్షించుకోవడం ద్వారా మధుమేహాన్ని నియంత్రించవచ్చని వైద్య నిపుణులు సూచిస్తున్నారు. ఆరోగ్యకర జీవనశైలిని అలవర్చుకోవడం ద్వారా మధుమేహం బారిన పడే ప్రమాదాన్ని గణనీయంగా తగ్గించుకోవచ్చని వారు పేర్కొంటున్నారు.
