బీజేపీలో బండి–ఈటల సయోధ్య.
* అధికార లక్ష్యంగా అధిష్ఠానం వ్యూహాత్మక అడుగులు.
హైదరాబాద్, మహా.
తెలంగాణలో అధికారమే లక్ష్యంగా పావులు కదుపుతున్న భారతీయ జనతా పార్టీ రాష్ట్ర నాయకత్వంలో ఐక్యతకు పెద్దపీట వేస్తోంది. పార్టీని బలోపేతం చేయడంతో పాటు అంతర్గత విభేదాలకు తెరదించేందుకు అధిష్ఠానం వ్యూహాత్మకంగా ముందుకు సాగుతోంది. ఇందులో భాగంగా చాలా కాలంగా రాజకీయంగా దూరంగా ఉంటున్న కేంద్ర హోంశాఖ సహాయ మంత్రి బండి సంజయ్ కుమార్, ఎంపీ ఈటల రాజేందర్ మధ్య సయోధ్యకు పార్టీ రాష్ట్ర వ్యవహారాల ఇన్ఛార్జి అభయ్ పాటిల్ కీలక పాత్ర పోషించారు.
శనివారం బీజేపీ ఓబీసీ మోర్చా జాతీయ అధ్యక్షుడు, రాజ్యసభ సభ్యుడు డాక్టర్ కె. లక్ష్మణ్ నివాసంలో జరిగిన సమావేశంలో అభయ్ పాటిల్ సమక్షంలో బండి సంజయ్, ఈటల రాజేందర్ ముఖాముఖిగా చర్చించారు. రాష్ట్రంలో పార్టీని మరింత బలోపేతం చేయడం, రాబోయే ఎన్నికల్లో అధికారంలోకి తీసుకురావడం లక్ష్యంగా గత విభేదాలను పక్కనపెట్టి కలిసికట్టుగా పనిచేయాలని అభయ్ పాటిల్ ఇద్దరు నేతలకు సూచించారు. సమావేశం అనంతరం మీడియాతో మాట్లాడిన బండి సంజయ్, ఈటల రాజేందర్ తమ మధ్య ఎలాంటి మనస్పర్థలు లేవని, పార్టీ ప్రయోజనాలే తమకు ముఖ్యమని స్పష్టం చేశారు.
ఈ సందర్భంగా డాక్టర్ కె. లక్ష్మణ్ కాంగ్రెస్ ప్రభుత్వంపై తీవ్ర విమర్శలు గుప్పించారు. ఎన్నికల సమయంలో ప్రకటించిన ఆరు గ్యారంటీల అమలులో ప్రభుత్వం పూర్తిగా విఫలమైందని ఆరోపించారు. ప్రజలకు ఇచ్చిన హామీలను నెరవేర్చకపోవడంతో కాంగ్రెస్ పాలనపై తీవ్ర అసంతృప్తి నెలకొందని అన్నారు. రాష్ట్రంలో అభివృద్ధి పనులు మందగించడం వల్ల కాంట్రాక్టర్లు తీవ్ర ఇబ్బందులు ఎదుర్కొంటున్నారని, కొందరు ఆత్మహత్యలకు పాల్పడే పరిస్థితులు ఏర్పడ్డాయని విమర్శించారు.
ప్రధాని నరేంద్ర మోదీ నాయకత్వంలో కేంద్ర ప్రభుత్వం తెలంగాణ అభివృద్ధికి నిరంతరం సహకారం అందిస్తోందని లక్ష్మణ్ పేర్కొన్నారు. కేంద్రం అమలు చేస్తున్న అభివృద్ధి కార్యక్రమాలకు ప్రజల్లో విశేష ఆదరణ లభిస్తోందని, అదే రాబోయే ఎన్నికల్లో బీజేపీకి అనుకూల వాతావరణాన్ని కల్పిస్తుందని అన్నారు. తెలంగాణలో బీజేపీ అధికారంలోకి రావడం ఖాయమని ఆయన ధీమా వ్యక్తం చేశారు.
