విక్రమ్-1 విజయంతో అంతరిక్ష రంగంలో నూతన యుగానికి నాంది.
* స్కైరూట్ బృందాన్ని అభినందించిన సీఎం చంద్రబాబు.
అమరావతి, మహా.
భారతదేశపు తొలి ప్రైవేట్ ఆర్బిటల్ రాకెట్ ‘విక్రమ్-1’ తొలి ప్రయోగంలోనే విజయవంతంగా కక్ష్యలోకి చేరడంపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు హర్షం వ్యక్తం చేశారు. ఈ చారిత్రక విజయంతో భారత అంతరిక్ష రంగం మరో కీలక మైలురాయిని అధిగమించిందని పేర్కొంటూ స్కైరూట్ ఏరోస్పేస్, ఇస్రో, ఇన్-స్పేస్, ఎన్ఎస్ఐఎల్ సంస్థలకు సామాజిక మాధ్యమం ‘ఎక్స్’ వేదికగా అభినందనలు తెలిపారు.
విక్రమ్-1 విజయవంతమైన ప్రయోగం భారత ప్రైవేటు అంతరిక్ష రంగం ప్రపంచంలోని అగ్రగామి దేశాలతో పోటీపడే స్థాయికి ఎదిగిందనే విషయాన్ని స్పష్టంగా నిరూపించిందని సీఎం చంద్రబాబు పేర్కొన్నారు. ఇది కేవలం ఒక రాకెట్ ప్రయోగం మాత్రమే కాదని, భారత అంతరిక్ష పరిశోధనల్లో నూతన యుగానికి నాంది పలికిన ఘట్టమని ఆయన అభివర్ణించారు.
దేశంలోని శాస్త్రీయ సంస్థల సామర్థ్యం, భారతీయ పారిశ్రామికవేత్తల సృజనాత్మకత ఒకే వేదికపై కలిసినప్పుడు ప్రపంచ స్థాయి ఆవిష్కరణలు సాధ్యమవుతాయని ఈ విజయం చాటిచెప్పిందని చంద్రబాబు అన్నారు. ప్రభుత్వ సంస్థలు, ప్రైవేట్ రంగం సమన్వయంతో భారత అంతరిక్ష రంగం మరింత వేగంగా ముందుకు సాగుతోందని ఆయన అభిప్రాయపడ్డారు.
ఈ ఘన విజయాన్ని సాకారం చేసిన స్కైరూట్ ఏరోస్పేస్, ఇస్రో, ఇన్-స్పేస్, ఎన్ఎస్ఐఎల్ సంస్థలతో పాటు వేలాది మంది శాస్త్రవేత్తలు, ఇంజినీర్లు, సాంకేతిక నిపుణులు, భాగస్వామ్యులందరికీ సీఎం ప్రత్యేక అభినందనలు తెలిపారు. ఈ విజయం ప్రతి భారతీయుడు గర్వపడే క్షణమని, భావితరాల యువ శాస్త్రవేత్తలు, ఆవిష్కర్తలకు ఇది గొప్ప స్ఫూర్తిగా నిలుస్తుందని పేర్కొన్నారు.
భారత్ అంతరిక్ష రంగంలో మరిన్ని విజయాలు సాధిస్తూ ప్రపంచ వేదికపై తన సత్తాను మరింత బలంగా చాటాలని, నక్షత్రాల వైపు సాగుతున్న దేశ ప్రస్థానం మరిన్ని శిఖరాలను అధిరోహించాలని ముఖ్యమంత్రి చంద్రబాబు నాయుడు ఆకాంక్షించారు.
