అధికార పీఠాలపై నేర సామ్రాజ్య నీడలు…..

అధికార పీఠాలపై నేర సామ్రాజ్య నీడలు.
* దేశ రాజకీయాలను కుదిపేస్తున్న ఏడీఆర్ సంచలన నివేదిక.
* టాప్ క్రిమినల్ కేసుల్లో తెలంగాణ సీఎం రేవంత్ రెడ్డికి అగ్రస్థానం.. 89 కేసుల మోత.
* భారీ ఆస్తుల ప్రవాహంలో డీకే శివకుమార్ నంబర్ వన్.
* రూ. 931 కోట్ల సంపదతో రెండో స్థానంలో చంద్రబాబు.

హైదరాబాద్, మహా.

దేశ ప్రజాస్వామ్య వ్యవస్థను, రాజకీయ నైతికతను అద్దం పడుతూ వెలువడిన ఒక తాజా నివేదిక ఇప్పుడు జాతీయ స్థాయిలో సంచలన సృష్టిస్తోంది. ప్రజా సంక్షేమం, అభివృద్ధి మంత్రం జపిస్తూ చట్టసభలకు పెద్దలుగా పీఠాలెక్కిన కొందరు ముఖ్యమంత్రుల నిజస్వరాలు బట్టబయలయ్యాయి. ఒకవైపు కోట్లాది రూపాయల వ్యాపార సామ్రాజ్యాలు, వేల కోట్ల చరాచర ఆస్తులు.. మరోవైపు చట్టాన్ని సైతం ముప్పుతిప్పలు పెట్టేలా వందల సంఖ్యలో చుట్టుముట్టిన సీరియస్ క్రిమినల్ కేసులు దేశ రాజకీయ దిగ్గజాల ద్వంద్వ వైఖరిని ఎండగడుతున్నాయి.
దేశంలో రాజకీయ , ఎన్నికల సంస్కరణల కోసం నిరంతరం శ్రమిస్తున్న ప్రతిష్టాత్మక ప్రజాస్వామ్య హక్కుల వేదిక ‘అసోసియేషన్ ఫర్ డెమోక్రాటిక్ రిఫార్మ్స్’ (ఏడీఆర్) విడుదల చేసిన సరికొత్త అధికారిక నివేదిక రాజకీయ వర్గాల్లో తీవ్ర ప్రకంపనలు పుట్టిస్తోంది. దేశంలోని వివిధ రాష్ట్రాల ముఖ్యమంత్రులు తాము ఎన్నికల సమయంలో సమర్పించిన స్వయం అఫిడవిట్ల వివరాలను కూలంకషంగా విశ్లేషించి రూపొందించిన ఈ నివేదిక, అటు సంపదలోనూ ఇటు నేరచరితలోనూ మన తెలుగు రాష్ట్రాల ముఖ్యమంత్రులు దేశంలోనే అగ్రగామిగా నిలిచారని నిక్కచ్చిగా తేల్చిచెప్పింది.

*క్రిమినల్ కేసుల చిట్టాలో రేవంత్ రెడ్డి రికార్డు సంచలనం!*

దేశంలోని ప్రస్తుత ముఖ్యమంత్రులందరిలోనూ అత్యధికంగా క్రిమినల్ కేసులు ఎదుర్కొంటున్న అగ్రనేతగా తెలంగాణ ముఖ్యమంత్రి రేవంత్ రెడ్డి దేశంలోనే తొలి స్థానాన్ని కైవసం చేసుకున్నారు. ఆయనపై సర్కారీ రికార్డుల ప్రకారం ఏకంగా 89 క్రిమినల్ కేసులు పెండింగ్‌లో ఉన్నట్లు ఏడీఆర్ నివేదిక బట్టబయలు చేసింది. కేవలం కేసుల సంఖ్య భారీగా ఉండటమే కాకుండా, వాటిలోని తీవ్రత మరింత విస్మయానికి గురిచేస్తోంది. రేవంత్ రెడ్డిపై నమోదైన మొత్తం 89 కేసుల్లో ఏకంగా 72 కేసులు అత్యంత తీవ్రమైన ఐపీసీ (భారతీయ శిక్షాస్మృతి) సెక్షన్ల కింద నమోదైనవే కావడం గమనార్హం. ప్రజా సమస్యలపై పోరాటాలు, ప్రభుత్వ విధానాలపై నిరసనల రూపంలో ఈ కేసులు చుట్టుముట్టాయని ఆయన వర్గాలు చెబుతున్నప్పటికీ, దేశ అత్యున్నత కార్యనిర్వాహక స్థానంలో ఉంటూ ఇన్ని వందల సంఖ్యలో కేసులు ఎదుర్కొంటున్న ఏకైక ముఖ్యమంత్రిగా ఆయన రికార్డులకెక్కడం ప్రస్తుతం రాజకీయ వర్గాల్లో హాట్ టాపిక్‌గా మారింది.
ఇదే జాబితాలో సుదీర్ఘ రాజకీయ అనుభవం, ఉద్దండ నేతగా పేరున్న ఆంధ్రప్రదేశ్ ముఖ్యమంత్రి నారా చంద్రబాబు నాయుడు కూడా తనదైన ముద్ర వేసేశారు. పరిపాలనా దక్షుడిగా పేరుగాంచిన చంద్రబాబుపై వివిధ కోర్టుల్లో పెండింగ్‌లో ఉన్న క్రిమినల్ కేసుల సంఖ్య 19గా ఉందని నివేదిక స్పష్టం చేసింది. దీనితో ఆయన దేశవ్యాప్తంగా మోస్ట్ క్రిమినల్ ముఖ్యమంత్రుల జాబితాలో నాల్గవ స్థానంలో నిలిచారు.

*సంపద ప్రవాహంలో దక్షిణాది సీఎంల జోరు.. రెండో స్థానంలో చంద్రబాబు!*

మరోవైపు, ఆస్తుల ప్రవాహంలోనూ దేశ రాజకీయాలను దక్షిణాది ముఖ్యమంత్రులే శాసిస్తున్నట్లు ఈ నివేదిక నిరూపించింది. దేశంలోని అత్యంత సంపన్నులైన ముఖ్యమంత్రుల జాబితాలో కర్ణాటక ఉప ముఖ్యమంత్రి , ఆర్థిక బాధ్యతలు మోస్తున్న ప్రముఖ నాయకుడు డీకే శివకుమార్ అపారమైన సంపదతో రూ. 1,413 కోట్ల ఆస్తులతో దేశంలోనే నంబర్ వన్ స్థానాన్ని దక్కించుకున్నారు.
ఈ జాబితాలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు రూ. 931 కోట్ల అధికారిక ఆస్తులతో దేశంలోనే రెండో అత్యంత సంపన్న ముఖ్యమంత్రిగా రికార్డు సృష్టించారు. దశాబ్దాల రాజకీయ ప్రస్థానంలో ఎదిగిన ఆయన కుటుంబ ఆస్తుల విలువ జాతీయ స్థాయిలో రెండో స్థానంలో నిలవడం విశేషం. ఇక తమిళనాడు ముఖ్యమంత్రిగా రాజకీయ రంగప్రవేశం చేసిన విజయ్ రూ. 648 కోట్ల ఆస్తులతో మూడో స్థానాన్ని కైవసం చేసుకుని సంచలనం సృష్టించారు.
ఇక క్రిమినల్ కేసుల జాబితాలో టాప్‌లో ఉన్న తెలంగాణ ముఖ్యమంత్రి రేవంత్ రెడ్డి, ఆస్తుల పరంగా రూ. 30 కోట్లకు పైగా సంపదతో దేశంలోని ముఖ్యమంత్రుల జాబితాలో 8వ స్థానంలో నిలిచారు.

*ప్రజాస్వామ్యానికి ఎదురుదెబ్బేనా?*

ఒకవైపు వేల కోట్ల రూపాయల వ్యాపార సామ్రాజ్యాలు, కార్పొరేట్ స్థాయి ఆస్తులు కలిగి ఉండటం.. మరోవైపు చట్టసభలను శాసించాల్సిన అధినేతల మీదనే తీవ్రమైన క్రిమినల్ అభియోగాలు ఉండటం దేశ రాజకీయ భవిష్యత్తుపై తీవ్రమైన చర్చకు దారితీసింది. పారదర్శకత, నైతిక విలువల గురించి గొంతుచించుకునే రాజకీయ పార్టీలు ఇలాంటి నేరచరిత నాయకులకు పెద్దపీట వేయడంపై ప్రజా సంఘాలు తీవ్ర ఆందోళన వ్యక్తం చేస్తున్నాయి. చట్టాలను అమలు చేయాల్సినవారే కోర్టుల చుట్టూ తిరగాల్సి రావడం, వేల కోట్ల రూపాయల సంపద రాజకీయ నాయకుల చేతుల్లో కేంద్రీకృతం కావడం భారతీయ ప్రజాస్వామ్య వ్యవస్థ ఎదుర్కొంటున్న అసలైన సవాళ్లను మరోసారి కళ్లకు కట్టినట్లు చూపించింది.