పిడుగు పడి ఇద్దరు మహిళలు మృతి.
• వ్యవసాయ పనుల్లో విషాదం.. నలుగురికి గాయాలు.
శ్రీకాకుళం, మహా.
శ్రీకాకుళం జిల్లాలో ఆదివారం భారీ వర్షంతో పాటు పిడుగులు బీభత్సం సృష్టించాయి. మందస ఏజెన్సీ ప్రాంతంలోని పాతకోటలో వ్యవసాయ పనుల్లో నిమగ్నమైన వారిపై పిడుగు పడటంతో ఇద్దరు మహిళలు మృతిచెందారు. మరో నలుగురు తీవ్రంగా గాయపడ్డారు. మృతులను కట్ట సుమిద్రి, సవర జోరాగా గుర్తించారు. క్షతగాత్రులను స్థానికులు హుటాహుటిన సమీపంలోని ఆస్పత్రికి తరలించి చికిత్స అందిస్తున్నారు.
వ్యవసాయ పనులు చేస్తుండగా ఒక్కసారిగా ఉరుములు, మెరుపులతో కూడిన వర్షం ప్రారంభమై పిడుగు పడటంతో ఈ ప్రమాదం చోటుచేసుకుంది. పిడుగు ప్రభావంతో ఇద్దరు మహిళలు అక్కడికక్కడే మృతిచెందినట్లు స్థానికులు తెలిపారు. మరో నలుగురు తీవ్రంగా గాయపడటంతో వారిని ఆస్పత్రికి తరలించారు. ఘటనతో పాతకోటలో విషాదం అలుముకుంది. మృతుల కుటుంబసభ్యులు కన్నీరుమున్నీరుగా విలపిస్తున్నారు.
బంగాళాఖాతంలో ఏర్పడిన అల్పపీడనం ప్రభావంతో ఉత్తరాంధ్రలో వాతావరణ పరిస్థితులు ఒక్కసారిగా మారాయి. శ్రీకాకుళం జిల్లాతో పాటు ఉత్తరాంధ్రలోని పలు ప్రాంతాల్లో ఉరుములు, మెరుపులతో కూడిన వర్షాలు కురుస్తున్నాయి. దీంతో ప్రజలు అప్రమత్తంగా ఉండాలని అధికారులు సూచిస్తున్నారు.
పిడుగులు పడే సమయంలో బహిరంగ ప్రదేశాల్లో ఉండకుండా సురక్షిత భవనాల్లోకి వెళ్లాలని, చెట్లు, విద్యుత్ స్తంభాలు, ఇతర ఎత్తైన నిర్మాణాల కింద ఆశ్రయం పొందవద్దని అధికారులు హెచ్చరిస్తున్నారు. ముఖ్యంగా వ్యవసాయ పనుల్లో ఉన్న రైతులు, కూలీలు వాతావరణ పరిస్థితులను గమనించి తగిన జాగ్రత్తలు తీసుకోవాలని సూచించారు.
