• అరుణాచల్లో చైనా కవ్వింపు చర్యలపై కేంద్రం మౌనం ఎందుకు?
• టాక్సింగ్ సమీపంలో పీఎల్ఏ ఉనికిపై రాహుల్ గాంధీ ప్రశ్నల వర్షం
ఢిల్లీ, మహా.
అరుణాచల్ప్రదేశ్లో వాస్తవ నియంత్రణ రేఖ (ఎల్ఏసీ) వెంబడి చైనా సైన్యం కదలికలు, భారత సైన్యం పెట్రోలింగ్కు ఎదురవుతున్న అవరోధాలపై కాంగ్రెస్ అగ్రనేతలు రాహుల్గాంధీ, మల్లికార్జున ఖర్గే కేంద్ర ప్రభుత్వంపై తీవ్రస్థాయిలో విమర్శలు గుప్పించారు. దేశ భద్రత కంటే ప్రధాని నరేంద్ర మోదీ తన వ్యక్తిగత ‘ఫేక్ ఇమేజ్’ను కాపాడుకోవడానికే ఎక్కువ ప్రాధాన్యం ఇస్తున్నారని రాహుల్ ఆరోపించారు. సరిహద్దు పరిస్థితులపై కేంద్ర ప్రభుత్వం తక్షణమే స్పష్టత ఇవ్వాలని ఇద్దరు నేతలు డిమాండ్ చేశారు.
అరుణాచల్ప్రదేశ్లోని కొన్ని కీలక ప్రాంతాల్లో భారత సైన్యం పెట్రోలింగ్ నిర్వహించకుండా చైనా బలగాలు అడ్డుకుంటున్నాయన్న వార్తలు అత్యంత ఆందోళనకరంగా ఉన్నాయని రాహుల్గాంధీ పేర్కొన్నారు. ఈ వ్యవహారంపై ప్రధానమంత్రి నరేంద్ర మోదీ, రక్షణ మంత్రి రాజ్నాథ్సింగ్, కేంద్ర హోంమంత్రి అమిత్షా మౌనం మరింత ఆందోళన కలిగిస్తోందని అన్నారు. చైనా చర్యలను అడ్డుకోవాల్సిన ప్రభుత్వం, వాస్తవాలు బయటకు రాకుండా మీడియాపై ఒత్తిడి తెస్తోందని ఆయన ఆరోపించారు.
గల్వాన్ ఘర్షణ అనంతరం ప్రధాని మోదీ చేసిన ‘మన భూభాగంలోకి చైనా ఒక్క అంగుళం కూడా రాలేదు’ అన్న వ్యాఖ్యలను రాహుల్గాంధీ మరోసారి ప్రస్తావించారు. ఆ ప్రకటనను దేశ ప్రజలు ఇంకా గుర్తుంచుకున్నారని అన్నారు. వాస్తవ పరిస్థితులపై స్పష్టత ఇవ్వకుండా ప్రధాని తన ప్రతిష్ఠను కాపాడుకునేందుకు ప్రయత్నిస్తున్నారని విమర్శించారు. దేశ భద్రత కంటే వ్యక్తిగత రాజకీయ ప్రతిష్ఠకు ప్రాధాన్యం ఇవ్వడం అత్యంత ప్రమాదకరమని వ్యాఖ్యానించారు.
అరుణాచల్లో చైనా సైన్యం కదలికలపై కాంగ్రెస్ అధ్యక్షుడు మల్లికార్జున ఖర్గే కూడా కేంద్ర ప్రభుత్వాన్ని వరుస ప్రశ్నలతో నిలదీశారు. గల్వాన్ ఘటనను దేశం ఇంకా మరచిపోలేదని, ఇప్పుడు అరుణాచల్ప్రదేశ్లో చైనా తన ఉనికిని మరింత బలోపేతం చేసుకుంటోందని ఆయన ఆరోపించారు. సరిహద్దుల్లో చైనా కదలికలపై మోదీ ప్రభుత్వం ఎందుకు మౌనం వహిస్తోందని ప్రశ్నించారు.
టాక్సింగ్ ప్రాంతం సమీపంలో చైనా పీపుల్స్ లిబరేషన్ ఆర్మీ (పీఎల్ఏ) తన బలగాల ఉనికిని భారీగా పెంచుకుందా? అని ఖర్గే ప్రశ్నించారు. భారత సైన్యం చాలాకాలంగా క్రమం తప్పకుండా రాకపోకలు సాగించే ‘షేరా-5’ పెట్రోలింగ్ పాయింట్కు భారత్ తన ప్రాప్యతను పూర్తిగా కోల్పోయిందా అని నిలదీశారు. చైనా సైన్యం ఏడాది పొడవునా సరిహద్దుల్లో మోహరించి ఉంటే భారత సైన్యం మాత్రం శీతాకాలంలో పెట్రోలింగ్ను ఎందుకు పరిమితం చేయాల్సి వస్తోందని ప్రశ్నించారు.
సరిహద్దు ప్రాంతాల్లో నివసించే స్థానిక ప్రజల సంప్రదాయ గడ్డి మైదానాలకు ప్రస్తుతం వారికి ఎందుకు ప్రాప్యత లేకుండా పోయిందని ఖర్గే ప్రశ్నించారు. ఈ పరిస్థితికి బాధ్యత ఎవరిదని కేంద్రాన్ని నిలదీశారు. సరిహద్దు ప్రాంతాల్లో భారత సైన్యం పెట్రోలింగ్ పరిస్థితి, స్థానిక ప్రజల రాకపోకలు, వారి సంప్రదాయ భూముల వినియోగంపై కేంద్రం వాస్తవాలను దేశ ప్రజల ముందు ఉంచాలని డిమాండ్ చేశారు.
2020లో గల్వాన్ లోయలో దేశ రక్షణ కోసం 20 మంది భారత జవాన్లు ప్రాణత్యాగం చేశారని ఖర్గే గుర్తు చేశారు. ఆ సమయంలో ప్రధాని మోదీ చైనాకు ‘క్లీన్చిట్’ ఇచ్చారని ఆయన విమర్శించారు. ప్రధాని చేసిన ఆ వ్యాఖ్యలు చైనాను మరింత దూకుడుగా వ్యవహరించేలా చేశాయని ఆరోపించారు.
తూర్పు లద్దాఖ్లో 2020 మేకు ముందు ఉన్న యథాతథ పరిస్థితి పూర్తిగా పునరుద్ధరించబడిందా? అని కూడా ఖర్గే కేంద్ర ప్రభుత్వాన్ని ప్రశ్నించారు. సరిహద్దుల్లో చైనా చర్యలు, భారత సైన్యం పెట్రోలింగ్, స్థానిక ప్రజల సంప్రదాయ భూభాగాలకు ప్రాప్యత వంటి అంశాలపై కేంద్రం పారదర్శకంగా వివరాలు వెల్లడించాలని డిమాండ్ చేశారు.
అరుణాచల్ప్రదేశ్లో ఎల్ఏసీ వెంబడి చైనా కదలికలపై వెలువడుతున్న వార్తల నేపథ్యంలో కాంగ్రెస్ నేతల తాజా వ్యాఖ్యలు రాజకీయంగా ప్రాధాన్యం సంతరించుకున్నాయి. మరోవైపు సరిహద్దు భద్రత, చైనా కదలికలు, భారత సైన్యం పెట్రోలింగ్కు సంబంధించిన అంశాలు అత్యంత సున్నితమైనవిగా ఉండటంతో కేంద్రం నుంచి అధికారిక వివరణపై ఆసక్తి నెలకొంది.
