• నాకూ, వారికి మధ్య బీసీఐ జోక్యమెందుకు?.
• నల్సార్ విద్యార్థులపై చర్యలు వద్దన్న సీజేఐ సూర్యకాంత్.
ఢిల్లీ, మహా.
నల్సార్ న్యాయ విశ్వవిద్యాలయం విద్యార్థులపై చర్యలు తీసుకునేందుకు బార్ కౌన్సిల్ ఆఫ్ ఇండియా (బీసీఐ) సిద్ధపడటంపై భారత ప్రధాన న్యాయమూర్తి జస్టిస్ సూర్యకాంత్ తీవ్ర అభ్యంతరం వ్యక్తం చేశారు. విద్యార్థులకు నిరసన తెలిపే హక్కు ఉందని స్పష్టం చేశారు. తనకు, విద్యార్థులకు మధ్య ఉన్న అంశంలో బీసీఐ జోక్యం చేసుకోవాల్సిన అవసరం ఏముందని ప్రశ్నించారు. విద్యార్థులపై ఎలాంటి ప్రతికూల చర్యలు తీసుకోకూడదని స్పష్టం చేశారు.
నల్సార్ విశ్వవిద్యాలయం 2026 బ్యాచ్ విద్యార్థులను న్యాయవాదులుగా నమోదు చేసుకోవద్దంటూ రాష్ట్ర బార్ కౌన్సిళ్లకు బీసీఐ గతంలో ఆదేశాలు జారీ చేసింది. విశ్వవిద్యాలయ స్నాతకోత్సవానికి సీజేఐ సూర్యకాంత్ను ముఖ్య అతిథిగా ఆహ్వానించడంపై కొందరు విద్యార్థులు అభ్యంతరం వ్యక్తం చేసిన నేపథ్యంలో బీసీఐ ఈ నిర్ణయం తీసుకుంది. ఘటనపై విచారణ జరపాలని నల్సార్ యాజమాన్యాన్ని కూడా కోరింది. ఈ నిర్ణయంపై న్యాయవర్గాలతోపాటు వివిధ వర్గాల నుంచి విమర్శలు వ్యక్తమయ్యాయి. చివరకు వ్యవహారం సుప్రీంకోర్టుకు చేరింది.
ఈ అంశంపై సీజేఐ జస్టిస్ సూర్యకాంత్ నేతృత్వంలోని ధర్మాసనం శుక్రవారం విచారణ చేపట్టింది. బీసీఐ వైఖరిపై ప్రధాన న్యాయమూర్తి తీవ్ర అసంతృప్తి వ్యక్తం చేశారు. ‘‘విద్యార్థులకు నిరసన తెలిపే హక్కుంది. ఇది వారికి, నాకు మధ్య ఉన్న విషయం. ఇందులో బార్ కౌన్సిల్ జోక్యం చేసుకోవడానికి కారణమేంటి?’’ అని ప్రశ్నించారు. విద్యార్థుల అభిప్రాయాలను వ్యక్తం చేసినందుకు వారి భవిష్యత్తును ప్రభావితం చేసే చర్యలకు దిగడం సరికాదనే భావనను ధర్మాసనం వ్యక్తం చేసింది.
2026 బ్యాచ్ విద్యార్థులను న్యాయవాదులుగా నమోదు చేసుకోవద్దంటూ ఇచ్చిన ఆదేశాలపైనా ధర్మాసనం దృష్టిసారించింది. విద్యార్థులపై ఎలాంటి చర్యలు తీసుకోకూడదని స్పష్టం చేసింది. ఈ వివాదంలో బీసీఐ అనవసరంగా జోక్యం చేసుకుందని సీజేఐ వ్యాఖ్యానించారు. అయితే వివాదాస్పద ఆదేశాలను ఇప్పటికే ఉపసంహరించుకున్నామని బీసీఐ తరఫు న్యాయవాది న్యాయస్థానానికి తెలిపారు. ఈ నేపథ్యంలో కేసు తదుపరి విచారణను సుప్రీంకోర్టు రెండు వారాలకు వాయిదా వేసింది.
నల్సార్ స్నాతకోత్సవానికి సీజేఐ సూర్యకాంత్ను ముఖ్య అతిథిగా ఆహ్వానించడంపై అభ్యంతరం వ్యక్తం చేస్తూ సుమారు 450 మంది విద్యార్థులు విశ్వవిద్యాలయ అధికారులకు లేఖ రాయడంతో వివాదం మొదలైంది. తమ అభ్యంతరాలకు కారణాలను వివరిస్తూ విద్యార్థులు యాజమాన్యానికి లేఖ సమర్పించారు.
పేపర్ లీక్ వ్యవహారంపై నిర్వహించిన ‘ఛలో సంసద్’ కార్యక్రమంలో విద్యార్థులపై పోలీసులు వ్యవహరించిన తీరును సవాలు చేస్తూ దాఖలైన పిటిషన్ విషయంలో సుప్రీంకోర్టు అనుసరించిన వైఖరిపై నల్సార్ విద్యార్థులు తమ లేఖలో అభ్యంతరం వ్యక్తం చేసినట్లు సమాచారం. ఈ నేపథ్యంలో సీజేఐని స్నాతకోత్సవానికి ముఖ్య అతిథిగా ఆహ్వానించడాన్ని వారు వ్యతిరేకించారు.
విద్యార్థుల లేఖ అనంతరం బీసీఐ రంగంలోకి దిగడం, 2026 బ్యాచ్ విద్యార్థుల ఎన్రోల్మెంట్పై రాష్ట్ర బార్ కౌన్సిళ్లకు ఆదేశాలు ఇవ్వడంతో వివాదం మరింత ముదిరింది. న్యాయ విద్యార్థులు తమ అభిప్రాయాన్ని వ్యక్తం చేసినందుకు వారి వృత్తిపరమైన భవిష్యత్తుపై ప్రభావం చూపే నిర్ణయాలు తీసుకోవడం సరికాదంటూ విమర్శలు వెల్లువెత్తాయి.
తాజాగా సుప్రీంకోర్టు విచారణ సందర్భంగా సీజేఐ స్వయంగా విద్యార్థులకు నిరసన తెలిపే హక్కు ఉందని స్పష్టం చేయడంతో వివాదం కీలక మలుపు తిరిగింది. బీసీఐ తన ఆదేశాలను ఉపసంహరించుకున్నట్లు కోర్టుకు తెలియజేయడంతో విద్యార్థులకు ప్రస్తుతానికి ఊరట లభించింది.
