రెండేళ్లు సమయం ఇవ్వండి…..

రెండేళ్లు సమయం ఇవ్వండి.
* మీ సమస్యలన్నీ పరిష్కరిస్తా.
* పీఆర్సీ, ఇంక్రిమెంట్ల విషయంలో నష్టం రానివ్వను.
* విద్యా వ్యవస్థను దేశానికి రోల్‌మోడల్‌గా నిలబెడదాం.
* సీఎం రేవంత్‌రెడ్డి.

కొడంగల్‌: మహా.

‘‘రెండేండ్లు సమయం ఇవ్వండి. రాష్ట్రంలోని ప్రతి ఉపాధ్యాయుడికి విజ్ఞప్తి చేస్తున్నా. రెండేండ్లలో సమస్యలన్నింటినీ సామరస్యంగా, మీరు అడక్కుండానే పరిష్కరించే బాధ్యత నాది. పీఆర్సీ, ఇంక్రిమెంట్లతో పాటు ఉపాధ్యాయులు, లెక్చరర్లకు సంబంధించిన ఏ సమస్యలోనూ చిన్న కష్టం రానివ్వను’’ అని ముఖ్యమంత్రి ఎ. రేవంత్‌రెడ్డి అన్నారు. ఉపాధ్యాయులు తనను విశ్వసించి ప్రభుత్వానికి సహకరించాలని విజ్ఞప్తి చేశారు.

కొడంగల్‌లోని ప్రభుత్వ జూనియర్‌ కళాశాలలో శనివారం నిర్వహించిన ఉపాధ్యాయ దినోత్సవ కార్యక్రమంలో ముఖ్యమంత్రి రేవంత్‌రెడ్డి పాల్గొన్నారు. ఈ కార్యక్రమంలో శాసనసభ స్పీకర్‌ గడ్డం ప్రసాద్‌కుమార్‌, మంత్రి దామోదర రాజనర్సింహ, ప్రభుత్వ సలహాదారు కే. కేశవరావు, ప్రజాప్రతినిధులు, అధికారులు, విద్యార్థినీ విద్యార్థులు పాల్గొన్నారు. భారత మాజీ రాష్ట్రపతి, ఆదర్శ ఉపాధ్యాయుడు డాక్టర్‌ సర్వేపల్లి రాధాకృష్ణన్‌ చిత్రపటానికి ముఖ్యమంత్రి పుష్పాంజలి ఘటించి ఉపాధ్యాయులందరికీ ఉపాధ్యాయ దినోత్సవ శుభాకాంక్షలు తెలిపారు.

పిల్లల భవిష్యత్తును తీర్చిదిద్దే బాధ్యత ఉపాధ్యాయులదేనని రేవంత్‌రెడ్డి అన్నారు. ‘‘పిల్లల భవిష్యత్తుకు మార్గదర్శకులు మీరే. తెలంగాణ విద్యా వ్యవస్థను భారతదేశానికి ఒక రోల్‌మోడల్‌గా నిలబెడదాం. అందుకు కథానాయకులు ఉపాధ్యాయులే’’ అని పేర్కొన్నారు. ఇంట్లో సొంత పిల్లలను ఏ విధంగా తీర్చిదిద్దాలని కోరుకుంటారో, తమ వద్ద చదువుకుంటున్న విద్యార్థుల విషయంలోనూ అదే స్థాయిలో శ్రద్ధ చూపాలని సూచించారు. ఉపాధ్యాయులపై తనకు సంపూర్ణ విశ్వాసం ఉందని చెప్పారు.

ఉపాధ్యాయులు ప్రభుత్వానికి సహకరించాలని ముఖ్యమంత్రి కోరారు. ‘‘ఉపాధ్యాయులే వీధుల్లోకి వస్తే ప్రభుత్వానికి, రాష్ట్రానికి శుభసూచకం కాదు. మిగతా శాఖలు వేరు. పిల్లల భవిష్యత్తుకు నిర్దేశకులు మీరు. మీరే ధర్నాలు చేస్తానంటే తప్పుడు సంకేతాలు వెళ్తాయి. ముఖ్యమంత్రిగా విజ్ఞప్తి చేస్తున్నా.. రెండేళ్లు సమయం ఇవ్వండి’’ అని అన్నారు.

ఉపాధ్యాయులు, లెక్చరర్ల సమస్యల పరిష్కారంపై ప్రభుత్వం వెనక్కి తగ్గదని రేవంత్‌రెడ్డి స్పష్టం చేశారు. ‘‘అణాపైసా కష్టం రానివ్వను. పీఆర్సీ, ఇంక్రిమెంట్‌లతో పాటు మిగతా సమస్యలు వేటిలోనూ చిన్న కష్టం రానివ్వను’’ అని అన్నారు. ప్రభుత్వ సలహాదారు కే. కేశవరావుతో ఉపాధ్యాయులు కూర్చొని మాట్లాడాలని సూచించారు. తనను విశ్వసించి సహకరించాలని కోరారు.

ఉద్యోగులు ప్రభుత్వ సర్వీసులో 30 ఏళ్లకు పైగా సేవలందిస్తారని, రాజకీయ నాయకులు మాత్రం ప్రతి ఐదేళ్లకు ఒకసారి ప్రజల ముందుకు వచ్చి పరీక్ష రాయాల్సి ఉంటుందని ముఖ్యమంత్రి వ్యాఖ్యానించారు. ‘‘నేను చెప్పిన ప్రకారం చేయకుండా ఉంటే నిర్ణయం తీసుకోవలసింది మీరే. అందుకు మార్కులు వేయాల్సిందీ మీరే. మీ చేతిలోనే కలం ఉంది. మీ చేతిలోనే బలం ఉంది’’ అని ఉపాధ్యాయులను ఉద్దేశించి అన్నారు.

గత ప్రభుత్వ హయాంలో పదేళ్లపాటు విద్యా వ్యవస్థను నిర్వీర్యం చేశారని రేవంత్‌రెడ్డి విమర్శించారు. ‘‘గత ప్రభుత్వంలో పదేండ్ల పాటు విద్యా వ్యవస్థను నిర్వీర్యం చేశారు. విధ్వంసం చేశారు. విధ్వంసం నుంచి వికాసం వైపు నడిపించే శక్తి ఉపాధ్యాయులపైనే ఉంది’’ అని అన్నారు. ప్రభుత్వ పాఠశాలల్లో 80 వేలకుపైగా అడ్మిషన్లు పెరగడం ఉపాధ్యాయుల గొప్పతనమేనని పేర్కొన్నారు.

ప్రజా ప్రభుత్వం అధికారంలోకి వచ్చిన తర్వాత ఉపాధ్యాయుల బదిలీల ప్రక్రియను ఎలాంటి వివాదాలకు తావులేకుండా పూర్తి చేశామని ముఖ్యమంత్రి చెప్పారు. జీవో 317 కింద తలెత్తిన సమస్యలను పరిష్కరించామని, ఏళ్ల తరబడి పెండింగ్‌లో ఉన్న పదోన్నతులు కల్పించామని తెలిపారు. ఐఏఎస్‌, ఐపీఎస్‌ అధికారులతో పాటు ఉత్తమ విధానాలను అధ్యయనం చేసేందుకు ఉపాధ్యాయులను విదేశాలకు పంపించినట్లు వెల్లడించారు.

దేశంలో ఎక్కడా లేని విధంగా విద్యా కమిషన్‌ను ఏర్పాటు చేసి కొత్త విద్యా విధానాన్ని తీసుకురావడానికి ప్రయత్నిస్తున్నామని రేవంత్‌రెడ్డి తెలిపారు. ఉపాధ్యాయుల ఆలోచనలను పరిగణనలోకి తీసుకుంటూ సాంకేతిక నైపుణ్యంతో విద్యార్థులకు ఉద్యోగ, ఉపాధి అవకాశాలు కల్పించే విధానాలను ప్రభుత్వం రూపొందిస్తోందని చెప్పారు. ప్రభుత్వ విధానంలో ఉపాధ్యాయులు భాగస్వాములు కావాలని కోరారు.

జాతీయ విద్యా విధానం కారణంగా విద్యా రంగంలో అనేక మార్పులు వస్తున్నాయని ముఖ్యమంత్రి అన్నారు. మారుతున్న పరిస్థితులకు అనుగుణంగా రాష్ట్రం కూడా విద్యా విధానాలను మార్చుకోవాల్సిన అవసరం ఉందని చెప్పారు. ‘‘నిరుపేద పిల్లలు తమ భవిష్యత్తును నిర్మించుకోవాలని ఆశిస్తున్నారు. కాలం తీరిపోయిన విద్యా విధానంతోనే వెళదామా? అప్‌డేటెడ్‌ విద్యా విధానాన్ని అందిపుచ్చుకుందామా?’’ అని ప్రశ్నించారు.

సాంకేతిక విద్యలో మార్పులపై కూడా రేవంత్‌రెడ్డి వివరించారు. పాలిటెక్నిక్‌ కళాశాలలను ప్రపంచంలోనే అత్యుత్తమ నాలెడ్జ్‌ సెంటర్లుగా తీర్చిదిద్దాలన్న ఉద్దేశంతో పాలిటెక్నిక్‌ విద్యను స్కిల్స్‌ యూనివర్సిటీ పరిధిలోకి తీసుకువస్తున్నామని తెలిపారు. ఈ చర్యలను ప్రైవేటీకరణగా ప్రచారం చేయడం సరికాదని అన్నారు. ఐటీఐలను ఆధునిక సాంకేతిక పరిజ్ఞానంతో ఏటీసీలుగా మార్చడం వల్ల ఇప్పటికే ఫలితాలు కనిపిస్తున్నాయని పేర్కొన్నారు.

పాలిటెక్నిక్‌ విద్యలో కొత్త విధానాన్ని తీసుకువస్తున్నామని ముఖ్యమంత్రి చెప్పారు. రెండు సంవత్సరాలు థియరీ బోధించి, మూడో సంవత్సరం కార్పొరేట్‌ సంస్థల్లో ఇంటర్న్‌గా పనిచేసే విధానాన్ని తీసుకువస్తున్నామని తెలిపారు. ఇంటర్న్‌షిప్‌ సమయంలో కార్పొరేట్‌ కంపెనీలు రూ.9 వేల వరకు స్టయిఫండ్‌ కూడా ఇచ్చే అవకాశం ఉంటుందని వివరించారు.

పాలిటెక్నిక్‌ విద్యార్థులకు డిప్లొమాతో పాటు ఉన్నత విద్యకు మరిన్ని అవకాశాలు కల్పించేలా మార్పులు చేస్తున్నామని రేవంత్‌రెడ్డి చెప్పారు. విదేశాల్లో మాస్టర్స్‌ చదువుకునేందుకు వీలుగా డిగ్రీ పట్టా అందించే విధంగా మార్పులు చేశామని తెలిపారు. పాలిటెక్నిక్‌ పూర్తి చేసిన తర్వాత ఇంజినీరింగ్‌ రెండో సంవత్సరంలో చేరే అవకాశం ఉండదంటూ జరుగుతున్న ప్రచారాన్ని నమ్మవద్దని విద్యార్థులకు సూచించారు. ‘‘నిస్సందేహంగా ఇంజినీరింగ్‌ రెండో సంవత్సరంలో చేరడానికి వీలుంది. అందులో ఎలాంటి మార్పు ఉండదు’’ అని స్పష్టం చేశారు.

లెక్చరర్ల సర్వీస్‌ నిబంధనల విషయంలోనూ ఎలాంటి అన్యాయం జరగదని ముఖ్యమంత్రి హామీ ఇచ్చారు. సర్వీస్‌ రూల్స్‌ వేరు, విద్యా విధానం వేరని పేర్కొన్నారు. ఈ విషయంలో ఇంకా అనుమానాలు ఉంటే ప్రభుత్వ సలహాదారు కే. కేశవరావుతో కూర్చొని మాట్లాడాలని సూచించారు. ‘‘ప్రభుత్వం తలుపులు ఎప్పుడు తెరిచే ఉంటాయి. జీతభత్యాలు, పీఆర్సీ, ఇంక్రిమెంట్లు నష్టం కలగకుండా చూసుకునే బాధ్యత ప్రభుత్వానిది’’ అని చెప్పారు.

మారుతున్న ప్రపంచ అవసరాలకు అనుగుణంగా విద్యార్థులకు నైపుణ్యాలను అందించడంపై ప్రభుత్వం దృష్టి పెట్టిందని రేవంత్‌రెడ్డి తెలిపారు. ఐటీఐలను అత్యాధునిక సాంకేతిక పరిజ్ఞానంతో ఏటీసీలుగా మార్చామని, కార్పొరేట్‌ సంస్థల సమన్వయంతో ఉద్యోగ, ఉపాధి అవకాశాలు కల్పించే విధానాలను ప్రారంభించామని చెప్పారు.

నర్సరీ నుంచి 12వ తరగతి వరకు విద్యార్థులకు నాలెడ్జ్‌, కమ్యూనికేషన్‌ నైపుణ్యాలను అందించి, 12వ తరగతి తర్వాత నైపుణ్య శిక్షణ ఇవ్వాల్సిన అవసరం ఉందని ముఖ్యమంత్రి అన్నారు. సాంకేతిక నైపుణ్యం ఉన్నవారు ప్రపంచవ్యాప్తంగా రాణించగలరని చెప్పారు. ఇంజినీరింగ్‌ పట్టా ఉన్నవారికంటే నైపుణ్యం కలిగిన వారికి కొన్ని రంగాల్లో ఎక్కువ అవకాశాలు లభిస్తున్నాయని పేర్కొన్నారు.

ప్రపంచవ్యాప్తంగా నైపుణ్యాలు కలిగిన వారికి డిమాండ్‌ పెరుగుతోందని రేవంత్‌రెడ్డి అన్నారు. జర్మనీ, జపాన్‌, దక్షిణ కొరియా వంటి దేశాల్లో నైపుణ్యం ఉన్న యువతకు విపరీతమైన డిమాండ్‌ ఉందని తెలిపారు. స్కిల్స్‌ తర్వాత ఇన్నొవేషన్‌, ఎంప్లాయిమెంట్‌పై దృష్టి సారించాలని సూచించారు. యువత యూనికార్న్‌ సంస్థలను నిర్మించే స్థాయికి ఎదగాలని ఆకాంక్షించారు.

ఏరోస్పేస్‌ రంగంలోని స్టార్టప్‌ సంస్థ స్కైరూట్‌ను కూడా ముఖ్యమంత్రి ప్రస్తావించారు. ‘‘ఏరోస్పేస్‌ రంగంలో స్టార్టప్‌ కంపెనీ స్కైరూట్‌ ఈనాడు ఎలాన్‌ మస్క్‌ కంపెనీతో పోటీ పడుతోంది’’ అని అన్నారు. విద్యార్థులు, యువతలో ఇన్నొవేషన్‌ ఆలోచనలను పెంపొందించాల్సిన అవసరం ఉందని పేర్కొన్నారు. ఇలాంటి కార్యక్రమాలకు ప్రభుత్వం అండగా ఉంటుందని చెప్పారు.

విద్యార్థుల భవిష్యత్తును తీర్చిదిద్దే కార్యక్రమాలకు ఉపాధ్యాయులే వారధులు, సారథులని రేవంత్‌రెడ్డి అన్నారు. ‘‘రెండేళ్లు ఫోకస్డ్‌గా పనిచేయండి. ప్రభుత్వ ఆలోచనను అర్థం చేసుకోండి. విధ్వంసమైన తెలంగాణను వికాసం వైపు నడిపిద్దాం’’ అని ఉపాధ్యాయులకు విజ్ఞప్తి చేశారు.

విద్యా రంగంలో తెలంగాణ సాధిస్తున్న పురోగతికి ఉపాధ్యాయులే కారణమని ముఖ్యమంత్రి అన్నారు. జాతీయ సగటులో 28వ స్థానంలో ఉన్న తెలంగాణను 17వ స్థానానికి తీసుకురావడంలో ఉపాధ్యాయుల కృషి ఉందని పేర్కొన్నారు. గత రెండేళ్లలో ప్రభుత్వ పాఠశాలల్లో 80 వేలకు పైగా విద్యార్థులు అదనంగా చేరారని, ఈ విజయానికి టీచర్లే కారణమని కొనియాడారు.

ఉపాధ్యాయులు, ఉద్యోగుల పదవీ విరమణ ప్రయోజనాల అంశాన్ని కూడా రేవంత్‌రెడ్డి ప్రస్తావించారు. 30 నుంచి 35 ఏళ్లపాటు ప్రజలకు సేవలందించి పదవీ విరమణ చేసిన వారికి ప్రయోజనాలు అందించాల్సి ఉన్నప్పటికీ గతంలో అవి పెండింగ్‌లో పెట్టారని ఆరోపించారు. పదవీ విరమణ వయస్సును 58 నుంచి 61 సంవత్సరాలకు పెంచడం వల్ల 2025 నుంచి రిటైర్మెంట్లు ప్రారంభమయ్యాయని తెలిపారు.

గత ప్రభుత్వం దాదాపు రూ.8 వేల కోట్ల రిటైర్మెంట్‌ బెనిఫిట్స్‌ను పెండింగ్‌లో పెట్టిందని ముఖ్యమంత్రి అన్నారు. తాము అధికారంలోకి వచ్చిన తర్వాత అందుబాటులో ఉన్న వనరులను సమీకరించి, వంద రోజుల్లోనే రూ.6 వేల కోట్లను రిటైర్మెంట్‌ బెనిఫిట్స్‌ కోసం చెల్లించామని గుర్తుచేశారు.

ఉపాధ్యాయులు ప్రభుత్వ విధానాల్లో భాగస్వాములై విద్యా రంగాన్ని మరింత ముందుకు తీసుకెళ్లాలని రేవంత్‌రెడ్డి పిలుపునిచ్చారు. ‘‘మనమంతా లక్షలాది విద్యార్థినీ విద్యార్థుల భవిష్యత్తును తీర్చిదిద్దడానికి ఉన్నాం. అందరం కలిసికట్టుగా పనిచేద్దాం. సహకరించండి. నిస్సందేహంగా ఈ ప్రభుత్వం మీ సమస్యలను పరిష్కరిస్తుంది’’ అని స్పష్టం చేశారు. తెలంగాణ విద్యా వ్యవస్థను దేశానికి దిక్సూచిగా నిలబెట్టే క్రమంలో ఉపాధ్యాయులు తనతో కలిసి పనిచేయాలని ముఖ్యమంత్రి కోరారు.