న్యూఢిల్లీ, మహా.
ప్రధానమంత్రి నరేంద్ర మోదీపై 2019 నాటి వ్యాఖ్యలకు సంబంధించి కాంగ్రెస్‌ అగ్రనేత, లోక్‌సభ ప్రతిపక్ష నేత రాహుల్ గాంధీపై మహారాష్ట్రలో కొనసాగుతున్న పరువు నష్టం కేసులో సుప్రీంకోర్టు మంగళవారం కీలక ఆదేశాలు జారీ చేసింది. ఈ కేసులో దిగువ కోర్టులో తదుపరి విచారణను నిలిపివేస్తూ మధ్యంతర ఉత్తర్వులు ఇచ్చింది. ఈ వ్యవహారంలో మహారాష్ట్ర ప్రభుత్వంతో పాటు ఫిర్యాదుదారు ఎం.హెచ్‌. శ్రీశ్రిమాల్‌కు నోటీసులు జారీ చేసింది. నాలుగు వారాల్లోగా తమ సమాధానాలు సమర్పించాలని ఆదేశించింది. జస్టిస్‌ విక్రమ్‌ నాథ్‌, జస్టిస్‌ అపరేశ్‌ కుమార్‌ సింగ్‌లతో కూడిన ధర్మాసనం ఈ మేరకు ఉత్తర్వులు ఇచ్చింది. తనకు జారీ చేసిన సమన్లను రద్దు చేయడానికి నిరాకరిస్తూ సెప్టెంబరు 8న బాంబే హైకోర్టు ఇచ్చిన ఉత్తర్వులను సవాల్‌ చేస్తూ రాహుల్ గాంధీ దాఖలు చేసిన పిటిషన్‌పై సుప్రీంకోర్టు ఈ నిర్ణయం తీసుకుంది.ఈ పరువు నష్టం కేసు 2018లో రాజస్థాన్‌లో జరిగిన రాజకీయ సభలో రాహుల్ గాంధీ చేసిన వ్యాఖ్యలకు సంబంధించినది. రఫేల్‌ యుద్ధవిమానాల కొనుగోలు ఒప్పందంపై రాజకీయంగా చర్చ జరుగుతున్న సమయంలో ప్రధానమంత్రి నరేంద్ర మోదీని ఉద్దేశించి రాహుల్ గాంధీ చేసిన వ్యాఖ్యలు పరువు నష్టం కలిగించేలా ఉన్నాయని ఫిర్యాదుదారు ఆరోపించారు. ఈ వ్యాఖ్యలు ప్రధానమంత్రితో పాటు ఆయనకు మద్దతు ఇచ్చే వర్గాల ప్రతిష్ఠకు భంగం కలిగించాయని ఫిర్యాదులో పేర్కొన్నారు. భారతీయ జనతా పార్టీకి చెందిన కార్యకర్తగా తనకు కూడా ఆ వ్యాఖ్యల వల్ల బాధ కలిగిందని ఫిర్యాదుదారు వాదించారు. ఈ ఫిర్యాదు ఆధారంగా మహారాష్ట్రలోని గిర్గావ్‌ మెజిస్ట్రేట్‌ కోర్టు 2019 ఆగస్టు 28న రాహుల్ గాంధీపై న్యాయ ప్రక్రియను ప్రారంభిస్తూ ఉత్తర్వులు జారీ చేసింది. అనంతరం ఈ కేసులో ఆయనకు సమన్లు జారీ అయ్యాయి. దిగువ కోర్టు జారీ చేసిన సమన్లను, ఫిర్యాదు ఆధారంగా ప్రారంభించిన న్యాయ ప్రక్రియను రద్దు చేయాలని కోరుతూ రాహుల్ గాంధీ బాంబే హైకోర్టును ఆశ్రయించారు. ఎన్నికల ప్రచార సమయంలో చేసిన రాజకీయ వ్యాఖ్యలను నేరపూరిత పరువు నష్టంగా పరిగణించరాదన్నది ఆయన తరఫు వాదనగా ఉంది. తన వ్యాఖ్యలు రాజకీయ ప్రసంగంలో భాగమని, రాజ్యాంగంలోని అధికరణం 19(1)(ఎ) కల్పించిన భావప్రకటనా స్వేచ్ఛ పరిధిలో వాటిని పరిశీలించాలని ఆయన తరఫు న్యాయవాదులు వాదించారు. అయితే సెప్టెంబరు 8న బాంబే హైకోర్టు ఆయన అభ్యర్థనను తిరస్కరించింది. దిగువ కోర్టు జారీ చేసిన సమన్లను రద్దు చేయడానికి నిరాకరిస్తూ, కేసు విచారణలో జోక్యం చేసుకోలేదు. దీంతో రాహుల్ గాంధీ సుప్రీంకోర్టును ఆశ్రయించారు. బాంబే హైకోర్టు ఉత్తర్వులను సవాల్‌ చేస్తూ రాహుల్ గాంధీ దాఖలు చేసిన పిటిషన్‌ను జస్టిస్‌ విక్రమ్‌ నాథ్‌, జస్టిస్‌ అపరేశ్‌ కుమార్‌ సింగ్‌ల ధర్మాసనం మంగళవారం విచారించింది. రాహుల్ గాంధీ తరఫున సీనియర్‌ న్యాయవాది అభిషేక్‌ మనుసింఘ్వి వాదనలు వినిపించారు. ఈ అంశానికి సంబంధించి సుప్రీంకోర్టు గతంలో ఇచ్చిన తీర్పులను ఆయన ప్రస్తావించినట్లు వార్తా సంస్థలు వెల్లడించాయి. ఇరుపక్షాల వాదనలు పరిశీలించిన ధర్మాసనం మహారాష్ట్ర ప్రభుత్వానికి, ఫిర్యాదుదారు ఎం.హెచ్‌. శ్రీశ్రిమాల్‌కు నోటీసులు జారీ చేసింది. నాలుగు వారాల్లోగా సమాధానాలు ఇవ్వాలని పేర్కొంది. అదే సమయంలో మహారాష్ట్రలోని దిగువ కోర్టులో ఈ కేసుకు సంబంధించిన తదుపరి విచారణను నిలిపివేస్తూ ఆదేశాలు ఇచ్చింది.
