హైదరాబాద్, మహా:
2026 నాటికి భారత దేశ జనాభా ముఖచిత్రం కేవలం గణాంకాల పట్టిక కాదు.. అది భవిష్యత్తులో బద్దలు కాబోతున్న ఒక సామాజిక, రాజకీయ అగ్నిపర్వతం. ఒకవైపు అడ్డూఅదుపూ లేకుండా పెరుగుతున్న ఈ ‘జనాభా విస్ఫోటనం’, మరోవైపు దేశ హితాన్ని దృష్టిలో ఉంచుకుని జనాభాను నియంత్రించిన దక్షిణాది రాష్ట్రాల నిశ్శబ్దం… ఈ రెండు తీవ్ర పరిణామాల మధ్య ఇప్పుడు భారతదేశం నలిగిపోతోంది. దేశ పురోగతి కోసం ప్రభుత్వాలు చెప్పిన మాట విని జనాభాను నియంత్రించిన రాష్ట్రాలకు మనం ఇచ్చే బహుమతి ఏమిటి? రాజకీయ ప్రాతినిధ్యాన్ని తగ్గించడమా?
రాబోయే రోజుల్లో దేశ రాజకీయాలను, వనరుల పంపిణీని ఎవరు శాసించబోతున్నారో తెలియాలంటే, స్టాటిస్టిక్స్ టైమ్స్ అందించిన 2026 నాటి అన్ని రాష్ట్రాల జనాభా అంచనాలను ఒకసారి నిశితంగా పరిశీలించాల్సిందే.
దేశవ్యాప్తంగా రాష్ట్రాల వారి జనాభాను గమనిస్తే.. జనాభాలో ఉత్తరాది, పశ్చిమ రాష్ట్రాలదే స్పష్టమైన పైచేయిగా కనిపిస్తోంది. ముఖ్యంగా ఉత్తరప్రదేశ్ ఏకంగా 243.47 మిలియన్ల (24.3 కోట్లు) జనాభాతో దేశంలోనే తిరుగులేని అగ్రస్థానంలో నిలవనుండగా, ఆ తర్వాతి స్థానాల్లో బీహార్ 132.85 మిలియన్లు, మహారాష్ట్ర 129.34 మిలియన్ల జనాభాతో ఉన్నాయి. పశ్చిమ బెంగాల్ 100.52 మిలియన్లతో వంద మిలియన్ల మార్కును దాటగా, మధ్యప్రదేశ్ 89.97 మిలియన్లు, రాజస్థాన్ 83.88 మిలియన్లు, గుజరాత్ 74.34 మిలియన్ల జనాభాతో ఈ జాబితాలో భారీ జనాభా కలిగిన దిగ్గజ రాష్ట్రాలుగా నిలిచాయి.
మరోవైపు, దశాబ్దాలుగా జనాభా నియంత్రణలో దేశానికే ఆదర్శంగా నిలిచిన దక్షిణాది రాష్ట్రాలు చాలా పరిమితమైన, బ్యాలెన్స్‌డ్ వృద్ధిని నమోదు చేశాయి. తమిళనాడు 79.02 మిలియన్లు, కర్ణాటక 70.78 మిలియన్లు, ఆంధ్రప్రదేశ్ 53.74 మిలియన్లు, తెలంగాణ 38.67 మిలియన్లు, మరియు కేరళ 36.24 మిలియన్ల జనాభాతో నియంత్రణలో ఆదర్శంగా నిలిచాయి.
ఇక మధ్యస్థ జనాభా కలిగిన రాష్ట్రాలను పరిశీలిస్తే.. ఒడిశా 47.47 మిలియన్లు, జార్ఖండ్ 41.11 మిలియన్లు, అస్సాం 35.96 మిలియన్లు, హర్యానా 31.41 మిలియన్లు, పంజాబ్ 31.37 మిలియన్లు, మరియు ఛత్తీస్‌గఢ్ 28.87 మిలియన్ల జనాభాతో కొనసాగుతున్నాయి.
దేశంలో అత్యల్ప జనాభా గల రాష్ట్రాలుగా చిన్న, ఈశాన్య రాష్ట్రాలు నిలిచాయి. ఉత్తరాఖండ్ 12.03 మిలియన్లు, హిమాచల్ ప్రదేశ్ 7.59 మిలియన్లు, త్రిపుర 4.27 మిలియన్లు, మేఘాలయ 3.46 మిలియన్లు, మణిపూర్ 3.32 మిలియన్లు, నాగాలాండ్ 2.31 మిలియన్లు, గోవా 1.60 మిలియన్లు, అరుణాచల్ ప్రదేశ్ 1.46 మిలియన్లు, మిజోరాం 1.28 మిలియన్ల జనాభాతో ఉండగా.. సిక్కిం కేవలం 0.71 మిలియన్ల (7.1 లక్షలు) జనాభాతో దేశంలోనే అత్యల్ప జనాభా కలిగిన రాష్ట్రంగా రికార్డు నమోదు చేసింది.
దక్షిణాదిపై వేలాడుతున్న కత్తి
పై గణాంకాలను గమనిస్తే యూపీ, బీహార్, మహారాష్ట్ర జనాభానే కలిపితే దేశంలోని సగం వనరులు ఈ రాష్ట్రాలకే అవసరం కానున్నాయి. గత నాలుగు దశాబ్దాలుగా ఆంధ్రప్రదేశ్, తెలంగాణ, తమిళనాడు, కర్ణాటక, కేరళ రాష్ట్రాలు విద్యా, వైద్య రంగాలపై పెట్టుబడి పెట్టి జనాభాను అదుపు చేశాయి. కానీ, ఆ తర్వాత జరగబోయే పార్లమెంట్ నియోజకవర్గాల పునర్విభజన (డీలిమిటేషన్) కత్తి ఇప్పుడు ఈ రాష్ట్రాల మెడపై వేలాడుతోంది. జనాభా ప్రాతిపదికన ఎంపీ సీట్లను కేటాయిస్తే, కేవలం జనాభాను పెంచినందుకే ఉత్తరాది రాష్ట్రాలకు పార్లమెంట్‌లో తిరుగులేని ఆధిపత్యం దక్కుతుంది. అదే జరిగితే, దశాబ్దాలుగా కష్టపడి రాష్ట్రాన్ని, దేశాన్ని అభివృద్ధి పథంలో నడిపించిన దక్షిణాది రాష్ట్రాలు ఢిల్లీ పీఠం ముందు తమ గొంతును కోల్పోతాయి. అభివృద్ధి సాధించినందుకు ఒక ప్రాంతానికి ఇచ్చే శిక్ష ఇదేనా? అన్నది తీవ్రస్థాయిలో మేధావులను తొలిచేస్తున్న ప్రశ్న.
ఆర్థిక టైమ్ బాంబ్
ఆర్థికంగా చూసుకున్నా ఇది ఒక టైమ్ బాంబ్ లాంటిదే. దక్షిణాది రాష్ట్రాలు చెల్లిస్తున్న పన్నుల్లో సింహభాగం జనాభా దామాషా ప్రకారం ఉత్తరాదికి వెళుతోంది. ఉత్తరప్రదేశ్, బీహార్ రాష్ట్రాల్లో ఉన్న కోట్లాది మంది యువతకు సరైన నైపుణ్యాలు, ఉపాధి కల్పించకపోతే.. అది దేశానికి ‘డెమోగ్రాఫిక్ డివిడెండ్’ (మానవ వనరుల లాభం) కాస్తా, ‘డెమోగ్రాఫిక్ డిజాస్టర్’ (మానవ వనరుల వినాశనం) గా మారుతుంది. ఆ యువతకు ఉపాధి దొరక్కపోతే పెరిగే నేరాలు, సామాజిక అశాంతి దేశ ఆర్థిక వ్యవస్థను పాతాళానికి తొక్కుతాయి.
ఇప్పుడు కేంద్ర ప్రభుత్వం ముందున్న ఏకైక మార్గం.. సమతుల్యత. నిధుల పంపిణీలోనూ, రాజకీయ ప్రాతినిధ్యంలోనూ కేవలం ‘జనాభా’ను మాత్రమే ప్రామాణికంగా తీసుకోకుండా.. ‘జనాభా నియంత్రణ’, ‘తలసరి ఆదాయం’, ‘మానవాభివృద్ధి సూచిక’లకు అత్యధిక ప్రాధాన్యత ఇవ్వాలి. బాధ్యతారాహిత్యంగా జనాభాను పెంచే ప్రాంతాలకు పట్టాభిషేకం చేసి, బాధ్యతాయుతంగా వ్యవహరించిన రాష్ట్రాలను శిక్షిస్తే… అది దేశ సమగ్రతకే పెనుముప్పు. 2026 జనాభా లెక్కలు మనకు ఇస్తున్న హెచ్చరికను ఇప్పుడైనా అర్థం చేసుకోకపోతే, భవిష్యత్తు తరాలు భారీ మూల్యం చెల్లించుకోక తప్పదు.
