కాలం తెచ్చిన కరువు కాదు.
* కాంగ్రెస్ తెచ్చిన కృత్రిమ కరువు.
* బీఆర్‌ఎస్ వర్కింగ్ ప్రెసిడెంట్ కేటీఆర్ తీవ్ర ధ్వజం.
హైదరాబాద్, మహా.
రాష్ట్రంలో ప్రస్తుతం నెలకొన్న కరవు పరిస్థితులు పూర్తిగా ప్రభుత్వ అసమర్థత, చేతకాని తనానికి నిదర్శనమని బీఆర్‌ఎస్ వర్కింగ్ ప్రెసిడెంట్, మాజీ మంత్రి కేటీఆర్ తీవ్రస్థాయిలో విరుచుకుపడ్డారు. ఇది ప్రకృతి వైపరీత్యం వల్ల, కాలం తెచ్చిన కరువు కాదని, పూర్తిగా కాంగ్రెస్ సర్కార్ తెచ్చిన కృత్రిమ కరువని ఆయన ‘ఎక్స్’ (ట్విట్టర్) వేదికగా మండిపడ్డారు. రాష్ట్రంలో సాగునీటి నిర్వహణ లోపం వల్ల అమూల్యమైన జల వనరులు వృథా అయ్యాయని ఆయన ఆరోపించారు.
జల వనరుల దుర్వినియోగంపై సంచలన ఆరోపణలు
ఈ ఏడాది జూన్ 1వ తేదీ నుంచి ఇప్పటివరకు సుమారు 750 టీఎంసీలకు పైగా గోదావరి నీళ్లను, 250 టీఎంసీలకు పైగా కృష్ణా నీళ్లను కాంగ్రెస్ ప్రభుత్వం ఎలాంటి ప్రయోజనం లేకుండా దిగువకు విడిచిపెట్టిందని కేటీఆర్ ఆక్షేపించారు. కన్నెపల్లి, దేవాదుల పంపులను సక్రమంగా వినియోగించుకుని గోదావరి బేసిన్ లోని రిజర్వాయర్లు, చెరువులను నింపే పూర్తి అవకాశాలు ఉన్నప్పటికీ ప్రభుత్వం ఆ దిశగా కన్నెత్తి కూడా చూడలేదని విమర్శించారు. మరోవైపు, పాలమూరు – రంగారెడ్డి ఎత్తిపోతల పథకం, కల్వకుర్తి లిఫ్ట్ ఇరిగేషన్ (కేఎల్ఐ) పంపులను ఆన్ చేయకుండా కృష్ణా జలాలను పూర్తిగా వృథా చేశారని ఆగ్రహం వ్యక్తం చేశారు. ప్రభుత్వ ఈ వైఖరి కారణంగానే రాష్ట్రంలోని ప్రాజెక్టులు, రిజర్వాయర్లు వెలవెలబోతున్నాయని ఆయన పేర్కొన్నారు.
ఎల్‌నినో హెచ్చరికలను పెడచెవిన పెట్టిన సర్కార్
ఈ ఏడాది మార్చి నుంచే వాతావరణ నిపుణులు ఎల్‌నినో ప్రభావం తీవ్రంగా ఉంటుందని, తీవ్రమైన వర్షాభావ పరిస్థితులు ఏర్పడే అవకాశం ఉందని ముందస్తుగా స్పష్టమైన హెచ్చరికలు జారీ చేసినట్లు కేటీఆర్ గుర్తుచేశారు. నిపుణుల హెచ్చరికలను బేఖాతరు చేసిన కాంగ్రెస్ ప్రభుత్వం, తలెత్తబోయే నీటి ఎద్దడిని ఎదుర్కొనేందుకు ఎలాంటి ముందస్తు ప్రణాళికలు, రక్షణాత్మక చర్యలు చేపట్టలేదని దుయ్యబట్టారు. కేవలం ప్రభుత్వ నిర్లక్ష్యం, ముందుచూపు లేని పాలన కారణంగానే తెలంగాణ అన్నదాతలు నేడు తీవ్ర ఇబ్బందులను ఎదుర్కొంటున్నారని ఆయన ఆవేదన వ్యక్తం చేశారు. ప్రభుత్వ అసమర్థ విధానాల వల్ల రాష్ట్రం మరోసారి కరవు ఛాయల్లోకి నెట్టబడుతోందని కేటీఆర్ తీవ్రస్థాయిలో హెచ్చరించారు.
