హైదరాబాద్, మహా : ఇంజనీరింగ్ చదివినా, సినిమాల్లో నటించినా.. నటి, దర్శకురాలు రేణూ దేశాయ్ ఎప్పుడూ తన మనసులో ఏది అనిపిస్తే అది నిర్భయంగా మాట్లాడతారు. తాజాగా ఆమె సోషల్ మీడియాలో పెట్టిన ఓ పోస్ట్ ఇప్పుడు ఇండస్ట్రీలోనూ, నెట్టింటా హాట్ టాపిక్‌గా మారింది. ప్రస్తుతం సమాజంలో జరుగుతున్న ఒక చెడ్డ అలవాటుపై ఆమె తీవ్ర ఆవేదన వ్యక్తం చేశారు. “కష్టాల్లో ఉన్న వ్యక్తులను మరింత విమర్శించడం, ఇప్పటికే ఇబ్బందుల్లో ఉన్నవారిని మళ్లీ కుంగదీయడం ఏమాత్రం సరైన పద్ధతి కాదు” అంటూ ఆమె హృదయాలను హత్తుకునే పోస్ట్ పెట్టారు. ఎదుటివారు ఏ స్థాయిలో ఉన్నా, ఎలాంటి పరిస్థితుల్లో ఉన్నా.. వారూ మనలాంటి మనుషులేనని, వారికి కూడా కుటుంబాలు, బంధాలు ఉంటాయని గుర్తుంచుకోవాలని రేణూ దేశాయ్ కోరారు. ఒక వ్యక్తి ఇప్పటికే సంక్షోభంలో ఉన్నప్పుడు, అతడిని మరింత తిట్టడం నైతికంగా ఏ మాత్రం కరెక్ట్ కాదన్నారు. “కిందపడిపోయిన వారిని మళ్లీ తొక్కడం పూర్తిగా అమానవీయం” అని ఆమె ఘాటుగా స్పష్టం చేశారు.
మనం విమర్శిస్తున్న ఆ వ్యక్తి కూడా ఎవరో ఒకరి బిడ్డ, తల్లిదండ్రి, లేదా సోదరుడు/సోదరి అనే విషయాన్ని ఎవరూ మర్చిపోకూడదని హితవు పలికారు. “ఇతరుల ఇళ్లపై రాళ్లు విసిరే ముందు.. మన జీవితాల్లోనూ ఎన్నో లోపాలు ఉన్నాయని ఒక్కసారి ఆలోచించుకోవాలి. మనమంతా పరిపూర్ణులం కాము కదా!” అంటూ ఆమె అందరిలోనూ ఆత్మవిమర్శను రేకెత్తించే ప్రయత్నం చేశారు. మనిషిగా గుర్తింపు పొందాలంటే ఇతరుల పట్ల దయ, సానుభూతి చూపడమే మొదటి లక్షణమని పేర్కొన్నారు.
అయితే, ఈ పోస్ట్ చూసిన నెటిజన్లు రకరకాలుగా ఊహాగానాలు చేయడం ప్రారంభించారు. ముఖ్యంగా పవన్ కళ్యాణ్ మూడో భార్యతో విడాకుల వ్యవహారం తెరపైకి వచ్చిన వేళ.. రేణూ దేశాయ్ ఈ పోస్ట్ పెట్టడంతో అందరిలోనూ ఆసక్తి పెరిగింది. అయితే, తన పోస్ట్‌ను బట్టి ఎవరూ అనవసర ఊహాగానాలు చేయవద్దని రేణూ దేశాయ్ ముందుగానే స్పష్టం చేశారు. సమాజంలో మానవత్వం, మంచితనం నశించిపోతున్న తరుణంలో.. ఆ విలువలు మళ్లీ పెరగాలనే ఉద్దేశంతోనే ఈ మాటలు రాస్తున్నానని చెప్పారు. అంతేకాదు, “ఎవరిపై జాలి చూపడానికి, దయగా ఉండేందుకు నాకు ఎవరూ డబ్బులు ఇవ్వలేదు.. ఇది నా ఆలోచనా విధానం!” అంటూ ఆమె చేసిన చమత్కారమైన వ్యాఖ్యలు ఇప్పుడు నెట్టింట తెగ వైరల్ అవుతున్నాయి.
