- 18న కరీంనగర్ లో లక్ష మందితో ‘మహా పాదయాత్ర’’
- హాజరు కానున్న బీజేపీ జాతీయ అధ్యక్షులు నితిన్ నబిన్
- సర్ పేరిట రాజ్యాంగ సంస్థలపై విపక్షాల కుట్రలను తిప్పికొట్టాల్సిందే
- కరీంనగర్ పార్లమెంట్ నియోజకవర్గ కోర్ కమిటీతో కేంద్ర మంత్రి బండి సంజయ్
కరీంనగర్, మహా : బీజేపీ జాతీయ అధ్యక్షులు నితిన్ నబిన్ తొలిసారి కరీంనగర్ రానున్న నేపథ్యంలో కనీవినీ ఎరగని రీతిలో ‘‘మహా పాదయాత్ర’ను సక్సెస్ చేయాలని కేంద్ర హోంశాఖ సహాయ మంత్రి బండి సంజయ్ కుమార్ నిర్ణయించారు. అందులో భాగంగా కనీసం లక్ష మందితో కరీంనగర్ లో ‘‘మహా పాదయాత్ర’’ చేసేందుకు సిద్దమయ్యారు. గాంధీ సర్కిల్, వైశ్యా భవన్ నుండి టవర్ సర్కిల్ మీదుగా కమాన్ దాకా నిర్వహించే ఈ ‘‘మహా పాదయాత్ర’’లో లక్ష మందితో కలిసి నితిన్ నబిన్, పార్టీ రాష్ట్ర అధ్యక్షులు ఎన్.రామచంద్రరావు, బండి సంజయ్ అడుగులో అడుగు వేయనున్నారు.
ఈ నేపథ్యంలో ‘‘మహా పాదయాత్ర’’ ఏర్పాట్లపై చర్చించేందుకు మంగళవారం ఎంపీ కార్యాలయంలో కరీంనగర్ పార్లమెంట్ నియోజకవర్గ కోర్ కమిటీ నేతలతో బండి సంజయ్ సమావేశమయ్యారు. ఈ సందర్భంగా కేంద్ర మంత్రి మాట్లాడుతూ నితిన్ నబిన్ తొలిసారి కరీంనగర్ వస్తున్న నేపథ్యంలో దేశవ్యాప్తంగా కరీంనగర్ పేరు మారుమోగేలా ‘‘మహా పాదయాత్ర’’ను నిర్వహిస్తున్నట్లు చెప్పారు. ’సర్’ పై కాంగ్రెస్, ఇండీ కూటమి పేరుతో విపక్షాలు లేనిపోని దుష్ప్రచారం చేస్తూ ఎన్నికల సంఘాన్ని నీరుగార్చే కుట్రలతో రాజ్యంగ సంస్థలపై దాడి చేస్తూ ప్రజాస్వామ్యాన్ని అపహాస్యం చేస్తున్నారని మండిపడ్డారు. ఈ విషయంలో వాస్తవాలను ప్రజలకు తెలియజేసేందుకే నితిన్ నబిన్ కరీంనగర్ వస్తున్నారని తెలిపారు. ఈ నేపథ్యంలో నిర్వహిస్తున్న ‘‘మహా పాదయాత్ర’’ ప్రాముఖ్యతను ద్రుష్టిలో ఉంచుకుని కనీసం లక్ష మంది ఈ యాత్రకు హాజరయ్యేలా ఏర్పాట్లు చేస్తున్నామని చెప్పారు. పార్టీ కార్యకర్తలు, ప్రజలు కూడా హాజరుకానున్న నేపథ్యంలో పోలింగ్ బూత్ కేంద్రాల నుండి శక్తి కేంద్రాలు, మండలాల వారీగా సమావేశాలు నిర్వహించాలని కోరారు. మీడియా, సోషల్ మీడియా ద్వారా మహా పాదయాత్రపై విస్త్రత ప్రచారం నిర్వహించాలని సూచించారు.
