ఖమ్మం, మహా.
ఖమ్మం జిల్లా కల్లూరు మండలంలోని గిరిజన బాలికల ఆశ్రమ పాఠశాలలో సోమవారం ఉదయం హఠాత్ కలకలం చోటుచేసుకుంది. టిఫిన్ సమయంలో అందరికీ వడ్డించిన కిచిడీ తినగానే, సుమారు 30 మంది బాలికలు తీవ్ర అస్వస్థతకు గురై కడుపునొప్పి, వాంతులు, తలనొప్పులతో విలవిల్లాడారు. ఇంకా 50 మంది విద్యార్థినులకు స్వల్పంగా లక్షణాలు కనిపిస్తున్నట్లు సమాచారం.
వెంటనే అప్రమత్తమైన హాస్టల్ సిబ్బంది, విద్యార్థినులను స్థానిక ప్రభుత్వ ఆసుపత్రికి తరలించారు. అయితే అక్కడ చికిత్స పొందిన వారిలో 10 మందికి పైగా బాలికల పరిస్థితి విషమంగా ఉండటంతో, ఖమ్మం ప్రభుత్వ జనరల్ ఆసుపత్రికి అంబులెన్స్ల ద్వారా తరలించారు. ఘటన తీవ్రతతో కలెక్టర్, గిరిజన శాఖ అధికారులు అప్రమత్తమయ్యారు.
* అజయ్ యాదవ్ హాస్పటల్ పర్యటన.
ఈ సంఘటనను అత్యంత సీరియస్గా తీసుకున్న జిల్లా అదనపు కలెక్టర్ అజయ్ యాదవ్, తక్షణమే ఆసుపత్రిని సందర్శించారు. విద్యార్థుల ఆరోగ్య పరిస్థితిని అడిగి తెలుసుకుని, వైద్య సిబ్బందికి ప్రత్యేక మార్గనిర్దేశనలిచ్చారు. హాస్టళ్లలో ఆహార నాణ్యతపై పటిష్ట పరిశీలనకు ఆదేశాలు జారీ చేసినట్టు అధికార వర్గాలు తెలిపాయి.
* విషపూరిత కిచిడీ అనుమానం – ఆహార నమూనాల పరిశోధన ప్రారంభం.
*
బాలికలకు అస్వస్థత కలిగిన ఆహారంలో ఏదైనా విషపదార్థం చేరిందా? లేదా నీటి ద్వారా వ్యాధికీటాణువులు విస్తరించాయా? అనే కోణాల్లో అధికారులు విచారణ ప్రారంభించారు. ఆరోగ్యశాఖ ఇప్పటికే కిచిడీ, బియ్యం, వంటనీరు, మసాలాలు వంటి అన్నిరకాల పదార్థాల నమూనాలను సేకరించి ప్రయోగశాలలకు పంపింది.
* తల్లిదండ్రుల ఆవేదన – చిన్నారుల జీవితం ఇలాగో సాగుతుందా?
వార్త తెలిసిన వెంటనే తల్లిదండ్రులు ఆసుపత్రికి చేరుకొని కన్నీటి పర్యంతమయ్యారు. ‘‘పేదలకు అందుతున్న విద్యా అవకాశాలే చివరికి ప్రాణాల మీదకు వస్తాయా?’’ అని ఆవేదన వ్యక్తం చేశారు. హాస్టల్లో హైజీన్, ఆహార ప్రమాణాలపై అధికారులు నిర్లక్ష్యంగా వ్యవహరిస్తున్నారని మండిపడ్డారు.
* హాస్టల్ నిర్వహణపై విచారణ కమిటీ ఏర్పాటు.
ఈ ఘటనపై రాష్ట్ర గిరిజన సంక్షేమశాఖ కార్యాలయం నుంచి విచారణ అధికారులను నియమించనుంది. హాస్టల్ వంటగదుల్లో పర్యవేక్షణ ఎలా ఉంది? వంటగాళ్లు అర్హులా? పిండిదినుసుల నిల్వలు సరైనవా? అన్నివిషయాల్లో విశ్లేషణాత్మక నివేదిక కోరినట్లు సమాచారం.
ఈ ఘటన కేవలం ఒక్కరోజు ప్రమాదం కాదు – ఇది రాష్ట్రవ్యాప్తంగా గిరిజన బాలికల ఆశ్రమ పాఠశాలలలో సాగుతున్న పూర్వాపరాల అలసత్వ పాలనకి అద్దంపడే ఉదాహరణ. చిన్నారులకు ఇలాంటి ఘటనలు జీవితాంతం భయాన్ని మిగులుస్తాయి. హాస్టల్ ఆరోగ్య నిబంధనలు, ఆహార నాణ్యతపై కఠిన నియంత్రణలు లేకుండా ‘‘విద్యతో పాటు విషం’’ అందిస్తున్నాం అనుకోవాల్సిందే!
