పత్తి కొనుగోళ్ల ప్రతిష్టంభనకు చెక్…..

పత్తి కొనుగోళ్ల ప్రతిష్టంభనకు చెక్.
* తెలంగాణలో మళ్లీ ఊపందుకున్న పత్తి కొనుగోళ్లు!
* సీసీఐ-మిల్లర్ల వివాదానికి ముగింపు.
* మార్కెట్‌లో రైతులకు భారీ ఊరట!
* పత్తి కొనుగోళ్లపై మంత్రి తుమ్మల విజయం.
* 330 జిన్నింగ్ మిల్లుల్లో మళ్ళీ ప్రారంభం.

ఖమ్మం, మహా.

తెలంగాణ రాష్ట్రంలోని పత్తి రైతులకు ఎట్టకేలకు ఊరట లభించింది. గత కొంతకాలంగా భారత పత్తి సంస్థ మరియు రాష్ట్రంలోని జిన్నింగ్ మిల్లుల యజమానుల మధ్య నెలకొన్న తీవ్ర వివాదం కారణంగా రాష్ట్రవ్యాప్తంగా నిలిచిపోయిన పత్తి కొనుగోళ్లు తాజాగా మళ్లీ పూర్తిస్థాయిలో ప్రారంభమయ్యాయి. సీసీఐ విధించిన కొన్ని కఠినమైన నిబంధనలను జిన్నింగ్ మిల్లర్లు తీవ్రంగా వ్యతిరేకించడంతో ఏర్పడిన ఈ ప్రతిష్టంభన, రైతుల పాలిట శాపంగా మారింది. ఈ క్లిష్ట సమయంలో రాష్ట్ర వ్యవసాయ శాఖా మంత్రి తుమ్మల నాగేశ్వరరావు స్వయంగా రంగంలోకి దిగి, కేంద్ర మంత్రులు, సీసీఐ ఉన్నతాధికారులతో చర్చలు జరపడం ద్వారా ఈ సమస్యకు పరిష్కారాన్ని కనుగొన్నారు. ఆయన చొరవతోనే పత్తి మార్కెట్‌లో నెలకొన్న అనిశ్చితికి తెరపడింది.

పత్తి కొనుగోళ్ల ప్రక్రియలో సీసీఐ విధించిన కొన్ని కఠినమైన నిబంధనలు రాష్ట్రంలోని జిన్నింగ్ మిల్లుల యజమానులకు ఆమోదయోగ్యం కాలేదు. దీంతో మిల్లుల యజమానులు ఏకమై, సీసీఐ ద్వారా జరిగే పత్తి కొనుగోళ్లను బహిష్కరించారు. రాష్ట్రవ్యాప్తంగా నోటిఫై చేయబడిన కేంద్రాలలో కొనుగోళ్లు పూర్తిగా నిలిచిపోవడంతో, పంట చేతికొచ్చినా అమ్ముకోవడానికి వీలులేక రైతులు తీవ్ర ఇబ్బందులు పడ్డారు. ఈ వ్యవహారం రాష్ట్ర వ్యవసాయ మార్కెట్‌పై తీవ్ర ప్రభావం చూపింది.

* మంత్రి చొరవతో పరిష్కారం*

రైతులు ఎదుర్కొంటున్న ఈ సంక్షోభాన్ని గుర్తించిన వ్యవసాయ శాఖా మంత్రి తుమ్మల నాగేశ్వరరావు, తక్షణమే ఈ సమస్యను తన భుజాలపై వేసుకున్నారు. ఆయన సీసీఐ అధికారులు, జిన్నింగ్ మిల్లుల యజమానులతో పలుమార్లు సుదీర్ఘ చర్చలు జరిపారు. అనంతరం, సమస్య తీవ్రతను కేంద్ర మంత్రులు మరియు సీసీఐ ఛైర్మన్ , మేనేజింగ్ డైరెక్టర్ అధికారుల దృష్టికి తీసుకెళ్లారు. మంత్రి చేసిన పట్టుదల గల ప్రయత్నాల ఫలితంగా, సీసీఐ అధికారులు వివాదాస్పదమైన తమ నిబంధనల్లో కీలక మార్పులు చేయడానికి అంగీకరించారు. ఇది జిన్నింగ్ మిల్లుల యజమానులకు ఊరటనిచ్చింది.

* కొనుగోళ్ల ప్రక్రియ మళ్లీ ప్రారంభం*

మంత్రి తుమ్మల ప్రకటనతో, తెలంగాణ రాష్ట్రంలో నోటిఫై చేయబడిన మొత్తం 330 జిన్నింగ్ మిల్లులు మళ్లీ పత్తి కొనుగోళ్లను ప్రారంభించడానికి సిద్ధమయ్యాయి. ఇప్పటికే సీసీఐ ద్వారా 3.66 లక్షల టన్నుల పత్తిని సేకరించడం జరిగింది. అయితే, రైతుల వద్ద ఇంకా మిగిలి ఉన్న మొత్తం పత్తిని ఎలాంటి ఆటంకాలు లేకుండా, పూర్తి స్థాయిలో కొనుగోలు చేసేందుకు సీసీఐ , జిన్నింగ్ మిల్లులు ఇకపై సమన్వయంతో పనిచేస్తాయని మంత్రి హామీ ఇచ్చారు. ఈ నిర్ణయం ద్వారా పత్తి రైతులు తమ పంటకు సరైన ధర పొందే అవకాశం ఏర్పడింది. తుమ్మల తీసుకున్న సకాలంలో సమర్థవంతమైన చర్యల కారణంగా, తెలంగాణ పత్తి మార్కెట్‌లో నెలకొన్న ప్రతిష్టంభన తొలగి, రైతులకు న్యాయం జరిగింది. ఈ మొత్తం వ్యవహారంలో మంత్రి వ్యవహరించిన తీరు, రాష్ట్ర రైతాంగానికి ఆయన అందించిన భరోసాను స్పష్టం చేస్తోంది.