- ఐపీఎల్ ఆరంభానికి ముందు భావోద్వేగ క్షణాలు.
- నల్ల బ్యాండ్లతో మైదానంలోకి ఆటగాళ్లు
- మృతుల జ్ఞాపకార్థం 11 సీట్లు శాశ్వతం.
బెంగళూరు, మహా.
“మరో ఐపీఎల్ సమరానికి నగార మోగింది.. స్టేడియం మొత్తం అభిమానుల కేకలతో మార్మోగుతోంది.. కానీ, ఆ కోలాహలం వెనుక ఒక తీరని వేదన, గుండెలు పిండే జ్ఞాపకం దాగి ఉంది. డిఫెండింగ్ ఛాంపియన్ రాయల్ ఛాలెంజర్స్ బెంగళూరు (ఆర్సీబీ), సన్రైజర్స్ హైదరాబాద్ జట్ల మధ్య ఐపీఎల్ 2026 సీజన్ తొలి మ్యాచ్ ప్రారంభానికి ముందు చిన్నస్వామి స్టేడియం భావోద్వేగాలకు వేదికైంది. గతేడాది ఆర్సీబీ తొలి టైటిల్ గెలుచుకున్న వేళ, ఆ విజయోత్సవాల్లో చోటుచేసుకున్న తొక్కిసలాటలో ప్రాణాలు కోల్పోయిన 11 మంది వీరాభిమానులకు యావత్ క్రీడాలోకం కన్నీటి నివాళి అర్పించింది. ఇరు జట్ల ఆటగాళ్లు, అధికారులు మరియు వేలాది మంది అభిమానులు ఒక్క నిమిషం పాటు మౌనం పాటించి మృతుల ఆత్మకు శాంతి చేకూరాలని ప్రార్థించిన దృశ్యం అందరినీ కదిలించింది.”
గౌరవసూచకంగా ఇరు జట్ల ఆటగాళ్లు చేతులకు నల్ల బ్యాండ్లు ధరించి మైదానంలోకి అడుగుపెట్టారు. మృతుల పట్ల తమకున్న అపారమైన గౌరవాన్ని చాటుతూ ఆర్సీబీ ఆటగాళ్లు వార్మప్ సమయంలో ‘11’ నంబర్ ముద్రించిన ప్రత్యేక జెర్సీలను ధరించి కనిపించడం విశేషం. ఐపీఎల్ నిర్వాహకులు సైతం తమ అధికారిక ‘ఎక్స్’ ఖాతాలో మృతుల కుటుంబాలకు ప్రగాఢ సానుభూతి తెలియజేస్తూ భావోద్వేగపూరిత సందేశాన్ని పోస్ట్ చేశారు. గతేడాది జూన్ 4వ తేదీన ఆర్సీబీ చారిత్రాత్మక విజయం సాధించిన తరుణంలో స్టేడియం వెలుపల జరిగిన అపశ్రుతిలో 11 మంది ప్రాణాలు కోల్పోగా, అనేకమంది గాయపడిన విషయం తెలిసిందే. ఈ విషాద ఘటన నేపథ్యంలో భద్రతా కారణాల దృష్ట్యా చిన్నస్వామి స్టేడియంలో క్రీడా కార్యకలాపాలను తాత్కాలికంగా నిలిపివేసిన సంగతి విదితమే.
ఈ దుర్ఘటన కారణంగా బెంగళూరు నగరం 2025 మహిళల వన్డే ప్రపంచకప్, 2026 పురుషుల టీ20 ప్రపంచకప్ వంటి మెగా టోర్నీలకు ఆతిథ్యం ఇచ్చే అవకాశాన్ని కోల్పోయింది. అయితే, వెంకటేష్ ప్రసాద్ నేతృత్వంలోని కర్ణాటక రాష్ట్ర క్రికెట్ అసోసియేషన్ (కేఎస్ సీఏ) గత ఏడాది కాలంలో స్టేడియం మౌలిక సదుపాయాల్లో విప్లవాత్మక మార్పులు చేసింది. ప్రేక్షకుల నిర్వహణ కోసం పటిష్టమైన యంత్రాంగాన్ని ఏర్పాటు చేయడంతో పాటు, భద్రతా ప్రమాణాలను అంతర్జాతీయ స్థాయికి పెంచింది. మరణించిన ఆ 11 మంది అభిమానుల జ్ఞాపకార్థం స్టేడియం ప్రధాన ప్రవేశ ద్వారం వద్ద ఒక స్మారక ఫలకాన్ని ప్రతిష్టించారు. అంతేకాకుండా, గ్యాలరీలో 11 సీట్లను శాశ్వతంగా వారికే కేటాయిస్తూ కేఎస్ సీఏ తీసుకున్న నిర్ణయం ప్రతి ఒక్కరినీ ఆకట్టుకుంది.
చిన్నస్వామి స్టేడియం పునఃప్రారంభమైన తర్వాత జరుగుతున్న తొలి ప్రధాన మ్యాచ్ కావడంతో పోలీసులు భారీ భద్రతా ఏర్పాట్లు చేశారు. క్రీడల పట్ల అభిమానులకున్న అమితమైన ఇష్టాన్ని గౌరవిస్తూనే, వారి భద్రతకు అత్యంత ప్రాధాన్యత ఇస్తున్నట్లు అధికారులు వెల్లడించారు. ఒకవైపు తమ అభిమాన జట్టు డిఫెండింగ్ ఛాంపియన్గా బరిలోకి దిగుతుండటంతో ఉత్సాహంగా ఉన్న ఆర్సీబీ అభిమానులు, మరోవైపు గతేడాది కోల్పోయిన తమ తోటి భక్తులను స్మరించుకుంటూ భారమైన హృదయంతో మ్యాచ్ను వీక్షించారు. చిన్నస్వామి స్టేడియం చరిత్రలో ఈ రోజు కేవలం ఒక క్రికెట్ మ్యాచ్గా మాత్రమే కాకుండా, క్రీడాకారులు-అభిమానుల మధ్య ఉండే విడదీయరాని బంధానికి ప్రతీకగా మిగిలిపోనుంది.
