హర్మూజ్‌ జలసంధిలో నెత్తురోడిన అలలు….

* ముగ్గురు భారతీయ నావికుల బలి!
* 60 దేశాల సదస్సులో విక్రమ్‌ మిస్రీ ఆవేదన!
* భారత్‌కు తప్పని ఇంధన సెగ!
* అజర్‌బైజాన్‌ సరిహద్దుల మీదుగా 204 మంది స్వదేశానికి!
ఢిల్లీ, మహా.
పశ్చిమాసియా యుద్ధ జ్వాలలు అంతర్జాతీయ జలమార్గాలను రక్తాశ్రితం చేస్తున్నాయి. ప్రపంచ వాణిజ్యానికి అత్యంత కీలకమైన హర్మూజ్‌ జలసంధిలో చోటుచేసుకున్న దాడులు భారతీయ కుటుంబాల్లో తీరని వేదనను మిగిల్చాయి. ఈ సంక్షోభంలో ప్రాణాలు కోల్పోయిన ఏకైక దేశం భారత్‌ కావడం గమనార్హం. విదేశీ జెండాలతో ప్రయాణిస్తున్న నౌకలపై జరిగిన దాడుల్లో ముగ్గురు భారతీయ నావికులు మరణించగా, మరో వ్యక్తి తీవ్రంగా గాయపడ్డారు. ఈ దారుణ పరిణామాలను భారత షిప్పింగ్‌ డైరెక్టరేట్‌ జనరల్‌ ధ్రువీకరించింది. అంతర్జాతీయ జలాల్లో భారతీయ రక్తం చిందిన వేళ, ప్రపంచ దేశాలు మౌనం వీడాలని భారత్‌ బలంగా నొక్కి చెప్పింది.
బ్రిటన్‌ నేతృత్వంలో జరిగిన 60కి పైగా దేశాల వర్చువల్‌ సమావేశంలో భారత విదేశాంగ కార్యదర్శి విక్రమ్‌ మిస్రీ పాల్గొని సంచలన విషయాలను వెల్లడించారు. ప్రపంచ ముడి చమురు సరఫరాలో 20 శాతం వాటా ఉన్న ఈ జలసంధిని మూసివేయడం అంటే ప్రపంచ ఆర్థిక వ్యవస్థ నడ్డి విరవడమేనని ఆయన హెచ్చరించారు. ముఖ్యంగా ఇంధన దిగుమతులపై ఆధారపడే భారత్‌ వంటి దేశాలకు ఇది జీవన్మరణ సమస్యగా మారిందని, చమురు ధరలు ఆకాశాన్ని తాకుతుండటంతో దేశ ఆర్థిక భద్రత ముప్పులో పడిందని ఆందోళన వ్యక్తం చేశారు. శాంతి చర్చలే ఏకైక మార్గమని, యుద్ధం వల్ల విధ్వంసం తప్ప ఒరిగేదేమీ లేదని ఆయన కుండబద్దలు కొట్టారు. అయితే, ఇంతటి కీలక సమావేశానికి అమెరికా గైర్హాజరు కావడం దౌత్య వర్గాల్లో పెను చర్చకు దారితీసింది.
మరోవైపు, ఇరాన్‌లో చిక్కుకుపోయిన భారతీయ పౌరులను రక్షించేందుకు విదేశాంగ శాఖ భగీరథ ప్రయత్నం చేస్తోంది. ఇప్పటికే 204 మందిని సురక్షితంగా భూమార్గం ద్వారా అజర్‌బైజాన్‌కు తరలించి, అక్కడి నుంచి ప్రత్యేక ఏర్పాట్ల ద్వారా భారత్‌కు తీసుకువచ్చే ప్రక్రియను వేగవంతం చేసింది. గల్ఫ్‌ దేశాల్లో దాదాపు కోటి మంది భారతీయులు నివసిస్తున్న నేపథ్యంలో, వారి రక్షణే పరమావధిగా భారత రాయబార కార్యాలయాలు నిరంతరం శ్రమిస్తున్నాయి. ఈ సంక్షోభంలో ఇప్పటివరకు ఎనిమిది మంది భారతీయులు మరణించడం, ఒకరు అదృశ్యం కావడం దేశాన్ని ఆందోళనకు గురిచేస్తోంది. హర్మూజ్‌ జలసంధి పునరుద్ధరణే లక్ష్యంగా భారత్‌ చేస్తున్న దౌత్య పోరాటం ఇప్పుడు అంతర్జాతీయ స్థాయిలో కీలకంగా మారింది.