- రాష్ట్ర పునర్విభజన చట్టానికి సవరణ.
- రాష్ట్రపతి ద్రౌపది ముర్ము ఆమోదముద్ర.
- 2024 జూన్ 2 నుంచే వర్తింపు.. దశాబ్ద కాల నిరీక్షణకు అధికారిక ముగింపు.
- రాష్ట్ర ప్రజల చారిత్రక విజయం.
- ప్రధాని మోడీ, రాష్ట్రపతికి ఏపీ ప్రభుత్వం కృతజ్ఞతలు.
అమరావతి, మహా.
ఆంధ్రప్రదేశ్ రాష్ట్ర రాజధాని విషయంలో దశాబ్ద కాలంగా కొనసాగుతున్న సందిగ్ధతకు, న్యాయపరమైన చిక్కులకు తెరదించుతూ కేంద్ర ప్రభుత్వం అత్యంత కీలకమైన అడుగు వేసింది. ఆంధ్రప్రదేశ్కు అమరావతియే రాజధాని అని స్పష్టం చేస్తూ ‘ఆంధ్రప్రదేశ్ పునర్విభజన (సవరణ) చట్టం-2026’ను కేంద్రం అధికారికంగా గెజిట్లో ప్రచురించింది. ఈ చారిత్రక సవరణ బిల్లుకు భారత గౌరవ రాష్ట్రపతి శ్రీమతి ద్రౌపది ముర్ము సోమవారం (ఏప్రిల్ 6) ఆమోదముద్ర వేశారు. దీంతో ఏపీ రాజధానిగా అమరావతికి పార్లమెంటరీ చట్టబద్ధత లభించినట్లయింది. ఈ మేరకు కేంద్ర న్యాయశాఖ కార్యదర్శి డాక్టర్ రాజీవ్ మణి సంతకంతో కూడిన గెజిట్ నోటిఫికేషన్ విడుదలవడంతో రాష్ట్రవ్యాప్తంగా, ముఖ్యంగా రాజధాని ప్రాంతంలో హర్షాతిరేకాలు వ్యక్తమవుతున్నాయి.
**చట్టంలో కీలక సవరణలు.. పక్కాగా నిర్వచనం**
గెజిట్ నోటిఫికేషన్ ప్రకారం.. 2014 నాటి ఆంధ్రప్రదేశ్ పునర్విభజన చట్టంలోని సెక్షన్ 5లో కీలక మార్పులు చేశారు. గతంలో చట్టంలో “ఆంధ్రప్రదేశ్ రాష్ట్రానికి కొత్త రాజధాని ఉంటుంది” అని ఉన్న వాక్యాన్ని తొలగించి, దాని స్థానంలో “ఆంధ్రప్రదేశ్ రాష్ట్రానికి అమరావతియే రాజధానిగా ఉంటుంది” అనే పదాన్ని చేర్చారు. కేవలం పేరు మార్చడమే కాకుండా, అమరావతి అంటే ఏ ప్రాంతం వస్తుందనే విషయంలో కూడా కేంద్రం స్పష్టత ఇచ్చింది. 2014 నాటి ‘ఆంధ్రప్రదేశ్ రాజధాని ప్రాంత అభివృద్ధి ప్రాధికార సంస్థ’ చట్టం కింద నోటిఫై చేసిన ప్రాంతమంతా అమరావతి పరిధిలోకి వస్తుందని వివరణ ఇచ్చారు. దీనివల్ల భవిష్యత్తులో రాజధాని పరిధిపై ఎటువంటి వివాదాలకు తావు లేకుండా చట్టబద్ధమైన రక్షణ కల్పించారు.
**2024 జూన్ 2 నుంచే అమలు…గతం నుంచి వర్తింపు**
ఈ సవరణ చట్టం యొక్క మరో విశేషం ఏమిటంటే, ఇది 2024 జూన్ 2వ తేదీ నుంచి అమలులోకి వచ్చినట్లుగా పరిగణించబడుతుందని గెజిట్లో స్పష్టం చేశారు. రాష్ట్రంలో కొత్త ప్రభుత్వం బాధ్యతలు చేపట్టిన సమయం నుంచి దీనిని వర్తింపజేయడం ద్వారా, గత కొంతకాలంగా అమరావతి విషయంలో ప్రభుత్వం తీసుకుంటున్న నిర్ణయాలకు, చేస్తున్న అభివృద్ధి పనులకు పూర్తిస్థాయిలో న్యాయపరమైన రక్షణ లభించనుంది. ఉమ్మడి రాజధానిగా హైదరాబాద్ గడువు ముగిసిన రోజు నుంచి అమరావతియే పూర్తిస్థాయి చట్టబద్ధమైన రాజధానిగా కేంద్రం గుర్తించినట్లు ఈ నిర్ణయం ద్వారా స్పష్టమవుతోంది. ఇది రాష్ట్ర అభివృద్ధికి మరియు మౌలిక సదుపాయాల కల్పనకు కేంద్రం నుండి లభించే నిధుల విషయంలో కూడా ఎంతో కీలకం కానుంది.
**అమరావతి రైతుల పోరాటానికి దక్కిన గౌరవం**
ఈ చారిత్రక ఘట్టం ఆవిష్కృతమైన వేళ ఆంధ్రప్రదేశ్ ప్రభుత్వం కేంద్రానికి హృదయపూర్వక కృతజ్ఞతలు తెలిపింది. ఏపీ ముఖ్యమంత్రి తన సందేశంలో.. “రాష్ట్ర ప్రజల చిరకాల స్వప్నం నేటితో నెరవేరిందని, అమరావతికి చట్టబద్ధత కల్పించిన రాష్ట్రపతి ద్రౌపది ముర్ము గారికి, ప్రధాని నరేంద్ర మోడీ కి ఆంధ్రప్రదేశ్ ప్రజల తరఫున ధన్యవాదాలు” అని పేర్కొన్నారు. ముఖ్యంగా రాజధాని కోసం భూములిచ్చి, ఐదేళ్ల పాటు ఎన్నో ఇబ్బందులు పడి పోరాడిన అమరావతి రైతుల విజయం ఇది అని ఆయన అభివర్ణించారు. పార్లమెంటులో ఈ బిల్లుకు మద్దతు తెలిపిన ప్రతి ఒక్క ఎంపీకి, రాష్ట్ర నాయకులకు , పౌరులకు ఈ విజయం అంకితమని ప్రకటించారు.
**రాష్ట్ర ప్రగతికి సరికొత్త దిక్సూచి**
కేంద్ర గెజిట్ విడుదలతో అమరావతి నిర్మాణ పనులకు ఇక ఎటువంటి ఆటంకాలు ఉండబోవని నిపుణులు భావిస్తున్నారు. రాజధానిపై ఉన్న అనిశ్చితి తొలగిపోవడంతో అంతర్జాతీయ పెట్టుబడులు వచ్చే అవకాశం ఉంది. వరల్డ్ బ్యాంక్, ఏడీబీ వంటి సంస్థల నుండి రానున్న రుణాలకు ఈ గెజిట్ నోటిఫికేషన్ ఒక బలమైన భరోసాగా నిలవనుంది. చట్టబద్ధమైన రాజధానిగా అమరావతి పేరు పునర్విభజన చట్టంలో చేరడం అనేది రాష్ట్ర చరిత్రలో ఒక మైలురాయిగా నిలిచిపోతుంది. విభజన సమస్యల పరిష్కారంలో కేంద్ర ప్రభుత్వం ఆంధ్రప్రదేశ్కు ఇచ్చిన ఒక పెద్ద హామీని నెరవేర్చినట్లయింది. ఈ నిర్ణయంతో ఆంధ్రప్రదేశ్ ప్రగతి ప్రస్థానం ఇక వేగంగా ముందుకు సాగనుందని సర్వత్రా విశ్లేషణలు వినిపిస్తున్నాయి.
