అమ్మ గెలిచింది.. ఆరుగురు ఏళ్ల పోరాటానికి ప్రతిఫలం..

•  జయరాజ్‌, బెన్నిక్స్‌ హత్య కేసులో సంచలన తీర్పు.
• తొమ్మిది మంది పోలీసులకు మరణశిక్ష..
•  2192 రోజుల నిరీక్షణ తర్వాత లభించిన న్యాయం.
• లోకం మరచినా.. కాలం కదిలినా.. ఒక్కతే పోరాడిన సెల్వరాణి.. మధురై కోర్టు చారిత్రక తీర్పు.

మధురై, మహా.

దేశవ్యాప్తంగా పెను సంచలనం సృష్టించిన తమిళనాడు సాత్తాన్‌కుళం తండ్రీకొడుకుల లాకప్‌ డెత్ కేసులో న్యాయం గెలిచింది. ఖాకీ దుస్తుల చాటున దాక్కున్న క్రూరత్వానికి అత్యున్నత శిక్ష పడింది. 2020లో కోవిడ్ నిబంధనల సాకుతో జయరాజ్, ఆయన కుమారుడు బెన్నిక్స్‌ను చిత్రహింసలు పెట్టి ప్రాణాలు తీసిన తొమ్మిది మంది పోలీసు అధికారులకు మధురైలోని ఒకటవ అదనపు జిల్లా మరియు సెషన్స్ కోర్టు మరణశిక్ష విధిస్తూ సోమవారం చారిత్రక తీర్పును వెలువరించింది. మంగళవారం నాటికి ఈ తీర్పు ప్రతులు వెలువడి, దేశవ్యాప్తంగా చర్చనీయాంశంగా మారాయి. రక్షక భటులే భక్షకులుగా మారిన ఈ ఉదంతాన్ని ‘అరుదైన వాటిలో అత్యంత అరుదైనది’గా పరిగణించిన న్యాయస్థానం, నిందితులకు ఉరిశిక్షతో పాటు బాధితులకు రూ. 1.40 కోట్ల పరిహారం చెల్లించాలని ఆదేశించింది.

ఈ సుదీర్ఘ న్యాయ పోరాటంలో కథానాయిక, జయరాజ్ భార్య సెల్వరాణి. 2020 జూన్ నెలలో తన భర్త, కొడుకు క్షేమంగా తిరిగి వస్తారని ఎదురుచూసిన ఆమెకు, వారి మృతదేహాలే దక్కాయి. ఆ నాడు దేశమంతా కదిలింది.. సోషల్ మీడియా హోరెత్తింది.. కానీ రోజులు గడుస్తున్న కొద్దీ అందరూ ఆ విషయాన్ని మర్చిపోయారు. కానీ సెల్వరాణి మాత్రం వెనకడుగు వేయలేదు. గడిచిన ఆరు ఏళ్లలో (2192 రోజులు) కోర్టులో ఏనాడూ విచారణకు గైర్హాజరు కాలేదు. తన కళ్ళ ముందే ఉన్న తన సర్వస్వాన్ని కోల్పోయినా, న్యాయం కోసం ఆమె చేసిన పోరాటం నేడు ఫలించింది. 2021, 22, 23, 24.. ఇలా ప్రతి ఏడాది ప్రతి వాయిదాకు ఆమె కోర్టు మెట్లు ఎక్కుతూనే ఉంది. వ్యవస్థల నుంచి ఎన్ని ఒత్తిళ్లు వచ్చినా, ఎంతటి ప్రలోభాలు ఉన్నా లొంగకుండా తన వారు మరణించిన చోటే న్యాయం జరగాలని ఆమె పట్టుబట్టింది.

సాత్తాన్‌కుళం పోలీస్ స్టేషన్‌లో జరిగిన ఆ ఘోరం అప్పట్లో మానవ హక్కుల ఉల్లంఘనకు పరాకాష్టగా నిలిచింది. కేవలం లాక్‌డౌన్ సమయంలో నిర్ణీత సమయం కంటే అదనంగా ఫోన్ షాపు తెరిచి ఉంచారనే నెపంతో జయరాజ్, బెన్నిక్స్‌లను అదుపులోకి తీసుకున్న పోలీసులు, వారిపై అమానవీయంగా దాడి చేశారు. ఆ గాయాల కారణంగానే వారు మరణించినట్లు సీబీఐ విచారణలో తేలింది. ఇన్‌స్పెక్టర్ శ్రీధర్, సబ్ ఇన్‌స్పెక్టర్లు రఘు గణేష్, బాలకృష్ణన్‌తో సహా తొమ్మిది మంది పోలీసులపై హత్యానేరం (సెక్షన్ 302) కింద నేరం రుజువైంది. పోలీసులు పౌరులను రక్షించాల్సిన బాధ్యతను మరచి, చట్టాన్ని చేతుల్లోకి తీసుకుని సాగించిన ఈ హత్యాకాండపై న్యాయమూర్తి జి.ముత్తుకుమారన్ తీవ్రస్థాయిలో మండిపడ్డారు. ఇటువంటి చర్యలు మళ్ళీ పునరావృతం కాకుండా ఉండాలంటే మరణశిక్షే సరైనదని ఆయన అభిప్రాయపడ్డారు.

ఈ తీర్పు విన్న తర్వాత సెల్వరాణి భావోద్వేగానికి లోనయ్యారు. తన భర్త, కొడుకు తిరిగి రారని తనకు తెలుసని, కానీ వారి మరణానికి కారణమైన వారికి శిక్ష పడటం వల్ల ఇటువంటి అకృత్యాలు మరే కుటుంబానికి జరగకూడదని ఆమె పేర్కొన్నారు. ఈ చారిత్రక తీర్పు కేవలం ఒక కుటుంబానికి లభించిన విజయం మాత్రమే కాదు, నిరంకుశంగా ప్రవర్తించే అధికార వ్యవస్థలకు బలమైన హెచ్చరికగా నిలిచింది. ఒక సామాన్య మహిళ ఆరు ఏళ్ల పాటు నిలకడగా సాగించిన ఈ ‘అహింసాత్మక యుద్ధం’ న్యాయవ్యవస్థపై సామాన్యులకు నమ్మకాన్ని పెంచింది. ఖాకీ అరాచకానికి బలైన ఎందరో బాధితులకు సెల్వరాణి పోరాటం ఒక మార్గదర్శకంగా నిలిచిపోతుంది.