వదినపై హన్సిక పరువునష్టం దావా.
*రూ. 2 కోట్ల పరిహారం కోరిన వైనం.
*హన్సికపై గృహహింస ఆరోపణల కలకలం.
**ముంబై, మహా**
సినీ నటి హన్సిక మోత్వాని తన కుటుంబంలో తలెత్తిన వివాదం కారణంగా కోర్టు మెట్లెక్కారు. తనపై, తన సోదరుడు ప్రశాంత్ మోత్వానిపై నిరాధారమైన ఆరోపణలు చేస్తూ ప్రతిష్టను దెబ్బతీస్తున్నారంటూ తన వదిన ముస్కాన్ నాన్సీ జేమ్స్పై హన్సిక ముంబై సెషన్స్ కోర్టులో రూ. 2 కోట్ల పరువునష్టం దావా వేశారు. తనపై చేసిన ఆరోపణలకు బహిరంగ క్షమాపణలు చెప్పడంతో పాటు, భవిష్యత్తులో తనపై ఎలాంటి వ్యాఖ్యలు చేయకుండా ముస్కాన్పై కోర్టు ఇంజక్షన్ ఆర్డర్ ఇవ్వాలని హన్సిక తన పిటిషన్లో కోరారు. ఈ న్యాయపోరాటం ప్రస్తుతం బాలీవుడ్ మరియు టాలీవుడ్ వర్గాల్లో తీవ్ర చర్చనీయాంశంగా మారింది.
వివరాల్లోకి వెళ్తే.. హన్సిక సోదరుడు ప్రశాంత్, ముస్కాన్ 2020లో వివాహం చేసుకోగా, మనస్పర్థల కారణంగా 2022 నుంచి విడిగా ఉంటున్నారు. అయితే, ఇటీవలే ముస్కాన్ తన భర్త ప్రశాంత్ మరియు హన్సికపై గృహహింస, వేధింపుల ఆరోపణలు చేస్తూ పోలీసులకు ఫిర్యాదు చేశారు. పెళ్లి సమయంలో ఖరీదైన కానుకల కోసం వేధించారని, వారి వల్ల కలిగిన మానసిక ఒత్తిడి కారణంగానే తనకు ‘బెల్స్ పాల్సీ’ (ముఖ పక్షవాతం) వచ్చిందని ముస్కాన్ ఆరోపించారు. ఈ ఆరోపణలను హన్సిక తీవ్రంగా ఖండించారు. తాను ఎన్నడూ వారిద్దరితో కలిసి నివసించలేదని, వారి వైవాహిక జీవితంలో జోక్యం చేసుకోలేదని స్పష్టం చేశారు. కేవలం తన ప్రతిష్టను దిగజార్చడానికే ముస్కాన్ సోషల్ మీడియా వేదికగా అసత్య ప్రచారాలు చేస్తున్నారని హన్సిక పేర్కొన్నారు.
అంతేకాకుండా, ముస్కాన్ గతంలో తన సోదరుడి వద్ద రూ. 27 లక్షల అప్పు తీసుకున్నారని, ఆ డబ్బును తిరిగి చెల్లించకుండా తప్పించుకోవడానికే ఇటువంటి నిందలు వేస్తున్నారని హన్సిక తన పిటిషన్లో ఆరోపించారు. ముస్కాన్ ఒక చిన్న స్థాయి టెలివిజన్ నటి అని, ఆన్లైన్లో విలాసవంతమైన జీవితాన్ని గడుపుతున్నట్లు నటిస్తూ ఆర్థిక బాధ్యతలను విస్మరిస్తున్నారని ధ్వజమెత్తారు. ఇప్పటికే ఈ ఎఫ్ఐఆర్ను కొట్టివేయాలని కోరుతూ హన్సిక బాంబే హైకోర్టును ఆశ్రయించగా, కోర్టు నోటీసులు జారీ చేసింది. అటు సివిల్ కోర్టులో రూ. 2 కోట్ల దావాతో పాటు, అంధేరి మెజిస్ట్రేట్ కోర్టులో ముస్కాన్పై క్రిమినల్ పరువునష్టం కేసును కూడా హన్సిక నమోదు చేశారు. ఈ కుటుంబ పోరు న్యాయస్థానంలో ఎలాంటి మలుపులు తిరుగుతుందో వేచి చూడాలి.
