హైదరాబాద్, మహా.
తెలంగాణ ముఖ్యమంత్రి ఏ. రేవంత్ రెడ్డి ఈనెల 10 న దేశ రాజధాని ఢిల్లీలో పర్యటించనున్నారు. రాష్ట్రంలో పాలనాపరమైన వేగం పెంచడంతో పాటు, పార్టీ సంస్థాగత బలోపేతంపై దృష్టి సారించిన ముఖ్యమంత్రి.. నేటి ఉదయం 10 గంటలకు శంషాబాద్లోని రాజీవ్ గాంధీ అంతర్జాతీయ విమానాశ్రయం నుంచి ప్రత్యేక విమానంలో ఢిల్లీకి బయలుదేరనున్నారు. ఈ పర్యటన రాజకీయ వర్గాల్లో అత్యంత ప్రాధాన్యతను సంతరించుకుంది.
నేడు మధ్యాహ్నం ఢిల్లీ వేదికగా నిర్వహించనున్న అత్యంత కీలకమైన కాంగ్రెస్ వర్కింగ్ కమిటీ (సీడబ్ల్యూసీ) సమావేశంలో ముఖ్యమంత్రి రేవంత్ రెడ్డి పాల్గొనబోతున్నారు. జాతీయ స్థాయిలో పార్టీ అనుసరించాల్సిన వ్యూహాలు, ప్రస్తుత రాజకీయ పరిస్థితులు, రాబోయే ఎన్నికల కార్యాచరణపై ఈ భేటీలో సుదీర్ఘంగా చర్చించనున్నారు. తెలంగాణలో కాంగ్రెస్ ప్రభుత్వం చేపడుతున్న సంక్షేమ పథకాలు, ఆరు గ్యారంటీల అమలు తీరును రేవంత్ రెడ్డి ఈ సందర్భంగా పార్టీ అధిష్టానానికి వివరించనున్నట్లు సమాచారం. ముఖ్యంగా పాలనలో తన మార్కు చూపిస్తూనే, పార్టీ క్యాడర్లో నూతనోత్సాహం నింపేలా ఆయన తన నివేదికను సిద్ధం చేసుకున్నట్లు తెలుస్తోంది.
ముఖ్యమంత్రి వెంట ఈ పర్యటనలో రాష్ట్ర కాంగ్రెస్ ముఖ్య నేతలు కూడా వెళ్లే అవకాశం ఉన్నట్లు తెలుస్తోంది. పీసీసీ అధ్యక్షుడు మహేష్ కుమార్ గౌడ్, రాష్ట్ర మంత్రులు దామోదర రాజనర్సింహ, ఉత్తమ్ కుమార్ రెడ్డిలు కూడా ముఖ్యమంత్రితో కలిసి హస్తినకు ప్రయాణమయ్యే సూచనలు కనిపిస్తున్నాయి. ఒకవైపు ప్రభుత్వ వ్యవహారాలు, మరోవైపు పార్టీ అంతర్గత అంశాలపై చర్చించేందుకు ఈ పర్యటన ఒక వేదికగా మారనుంది. అధిష్టానంలోని అగ్రనేతలు మల్లికార్జున ఖర్గే, రాహుల్ గాంధీ, ప్రియాంక గాంధీలతో కూడా ముఖ్యమంత్రి ప్రత్యేకంగా భేటీ అయ్యే అవకాశం ఉందని, రాష్ట్ర కేబినెట్ విస్తరణ లేదా నామినేటెడ్ పదవుల భర్తీపై ప్రాథమిక చర్చలు జరిగే వీలుందని రాజకీయ విశ్లేషకులు భావిస్తున్నారు.
