- సామాజిక న్యాయ సాధనకు కుల గణనే మార్గం.
- ‘క్యాస్ట్ సెన్సెస్’ పుస్తకావిష్కరణ.
- ప్రజా భవన్లో మేధావులతో భట్టి సమీక్ష.
హైదరాబాద్, మహా.
దేశవ్యాప్తంగా సామాజిక న్యాయాన్ని పటిష్టం చేసేందుకు జాతీయస్థాయిలో సమగ్ర కుల జనగణన జరగాల్సిన ఆవశ్యకత ఎంతైనా ఉందని తెలంగాణ ఉప ముఖ్యమంత్రి మల్లు భట్టి విక్రమార్క స్పష్టం చేశారు. ఆదివారం ఉదయం హైదరాబాద్లోని ప్రజా భవన్లో నిర్వహించిన ప్రత్యేక కార్యక్రమంలో “క్యాస్ట్ సెన్సెస్: డీపెనింగ్ ఆఫ్ సోషల్ జస్టిస్” అనే పుస్తకాన్ని ఆయన ఆవిష్కరించారు. ఈ సందర్భంగా డిప్యూటీ సీఎం మాట్లాడుతూ, కేంద్ర ప్రభుత్వం నిర్వహించే జనగణనలో కేవలం జనాభా లెక్కలకే పరిమితం కాకుండా, అన్ని కులాల సామాజిక, విద్యా మరియు ఆర్థిక స్థితిగతులను సమగ్రంగా సేకరించాలని సూచించారు. అప్పుడే సమాజంలోని అట్టడుగు వర్గాలకు సంక్షేమ ఫలాలు సమంగా అందుతాయని ఆయన అభిప్రాయపడ్డారు.
తెలంగాణ ప్రభుత్వం ఇప్పటికే చేపట్టిన సమగ్ర కుల సర్వే దేశానికే ఒక దిక్సూచిలా నిలుస్తుందని భట్టి విక్రమార్క పేర్కొన్నారు. రాష్ట్రంలో తాము నిర్వహించిన ఈ వినూత్న ప్రక్రియ దేశవ్యాప్తంగా కుల గణన చేపట్టడానికి ఒక బలమైన మార్గదర్శకంగా మారుతుందని ఆయన ధీమా వ్యక్తం చేశారు. సామాజిక న్యాయం కేవలం నినాదాలకే పరిమితం కాకుండా, గణాంకాల ఆధారంగా అమలైనప్పుడే ప్రజాస్వామ్య పరిపాలన బలోపేతం అవుతుందని వివరించారు. ఈ గ్రంథం ప్రజాస్వామ్య విలువలను కాపాడటంలో మరియు సామాజిక అసమానతలను తొలగించడంలో కుల లెక్కింపు ప్రాధాన్యతను శాస్త్రీయంగా ప్రతిపాదిస్తుందని ఆయన రచయితలను అభినందించారు.
ఈ పుస్తకాన్ని ఆల్ ఇండియా ఓబీసీ స్టూడెంట్స్ అసోసియేషన్ జాతీయ అధ్యక్షుడు, హైదరాబాద్ సెంట్రల్ యూనివర్సిటీ పరిశోధక విద్యార్థి జి. కిరణ్ కుమార్ మరియు డాక్టర్ వాహిని బిల్లు సంయుక్తంగా రచించారు. సామాజిక న్యాయం లోతుగా వేళ్లూనుకోవడానికి కుల గణన ఎంతటి కీలక పాత్ర పోషిస్తుందో ఈ గ్రంథంలో తాము విశ్లేషించినట్లు రచయితలు ఈ సందర్భంగా వివరించారు. పుస్తక ఆవిష్కరణ అనంతరం డిప్యూటీ సీఎం భట్టి విక్రమార్క బీసీ ఉపాధ్యాయులు, మేధావులు, వివిధ వృత్తి నిపుణులు మరియు విద్యార్థి సంఘాల జాయింట్ యాక్షన్ కమిటీ ప్రతినిధులతో ప్రత్యేకంగా సమావేశమయ్యారు.
ఈ కీలక సమావేశంలో ఆలిండియా ఓబీసీ స్టూడెంట్స్ అసోసియేషన్ ప్రతినిధులు మరియు ఇతర నాయకులు పాల్గొని కుల గణనపై తమ అభిప్రాయాలను పంచుకున్నారు. కార్యక్రమంలో డి. అశోక్, సురేందర్, గణేష్, శివ, అరవింద్, లక్కీ, ప్రవీణ్, మల్లేష్ తదితరులు పాల్గొని డిప్యూటీ సీఎంకు కృతజ్ఞతలు తెలిపారు.
