- నారీ శక్తి నినాదంతో మార్మోగిన నగరం.
- కేఎంఐటీ వద్ద మహిళల భారీ బైక్ ర్యాలీ.
- చట్టసభల్లో రిజర్వేషన్లతో నవభారత విధాన నిర్ణేతలుగా మహిళలు.
- ప్రధాని దార్శనికతతోనే ‘ఆత్మనిర్భర్’కు ఊతం.
- బిజెపి రాష్ట్ర అధ్యక్షుడు నారపురాజు రామచంద్రరావు.
హైదరాబాద్, మహా
నవ భారత నిర్మాణంలో మహిళా శక్తి ప్రబల శక్తిగా మారుతోందని, చట్టసభల్లో వారి భాగస్వామ్యం దేశ భవిష్యత్తును మార్చబోతోందని నగరంలోని ప్రముఖ విద్యాసంస్థ కేఎంఐటీ వేదికగా జరిగిన అట్టహాసమైన కార్యక్రమం చాటిచెప్పింది. కేంద్ర ప్రభుత్వం ప్రతిష్టాత్మకంగా తీసుకువచ్చిన చారిత్రాత్మక ‘నారీ శక్తి వందన్ అధినియం’కు సంఘీభావంగా బుధవారం హైదరాబాద్లో భారీ మహిళా బైక్ ర్యాలీ నిర్వహించారు. ఉత్సాహవంతులైన మహిళలు, విద్యార్థినులు పెద్ద సంఖ్యలో పాల్గొన్న ఈ ర్యాలీని బిజెపి రాష్ట్ర అధ్యక్షుడు నారపురాజు రామచంద్రరావు జెండా ఊపి ప్రారంభించడంతో నగర వీధులన్నీ నారీ శక్తి నినాదాలతో మార్మోగాయి. గౌరవ ప్రధాని నరేంద్ర మోదీ సుపరిపాలనలో మహిళలు కేవలం లబ్ధిదారులుగా మాత్రమే కాకుండా, దేశ గమనాన్ని నిర్దేశించే కీలక శక్తులుగా ఎదుగుతున్నారనే సందేశం ఈ ర్యాలీ ద్వారా స్పష్టమైంది.
లోక్సభ , రాష్ట్ర శాసనసభల్లో మహిళలకు 33 శాతం రిజర్వేషన్లు కల్పిస్తూ తీసుకువచ్చిన ఈ చట్టం దేశ రాజకీయ ముఖచిత్రాన్ని సమూలంగా మార్చబోతోంది. ఇప్పటివరకు విధానాల అమలులో భాగస్వాములుగా ఉన్న మన దేశ ఆడబిడ్డలు, ఇకపై నవ భారత విధాన నిర్ణేతలుగా అత్యున్నత పాత్ర పోషించనున్నారు. ప్రధాని మోదీ సారథ్యంలో “మహిళా నేతృత్వంలోని అభివృద్ధి” అనేది కేవలం ఒక నినాదంగా మిగిలిపోకుండా, క్షేత్రస్థాయిలో అద్భుతమైన మార్పులకు నాంది పలికిందని ఈ సందర్భంగా వక్తలు ఉద్ఘాటించారు. ఈ చారిత్రక మార్పు కేవలం రాజకీయ సాధికారతకు మాత్రమే పరిమితం కాకుండా, ఒక బలమైన మరియు ఆత్మనిర్భర్ భారత్ను నిర్మించడంలో కీలక భూమిక పోషిస్తుందని ర్యాలీలో పాల్గొన్న వారు ఆశాభావం వ్యక్తం చేశారు.
ఒకప్పుడు ఇంటికే పరిమితమైన మహిళా శక్తి, నేడు అంతరిక్షం నుంచి అట్టడుగు స్థాయి వరకు ప్రతి రంగంలోనూ తన సత్తా చాటుతోంది. ఇప్పుడు చట్టసభల్లో కూడా వారికి సముచిత స్థానం దక్కడం ద్వారా ప్రజాస్వామ్యం మరింత బలోపేతం కానుంది. కేఎంఐటీ ప్రాంగణం నుంచి ప్రారంభమైన ఈ బైక్ ర్యాలీలో వందలాది మంది మహిళలు హెల్మెట్లు ధరించి, జాతీయ జెండాలను చేతబూని సాగడం చూపరులను విశేషంగా ఆకర్షించింది. తమ హక్కుల పట్ల అవగాహనతో పాటు దేశాభివృద్ధిలో భాగస్వామ్యం వహించాలనే తపన ప్రతి ఒక్కరిలోనూ స్పష్టంగా కనిపించింది. ఆత్మవిశ్వాసంతో సాగుతున్న ఈ నారీ శక్తి ప్రయాణం, సురక్షితమైన మరియు సుసంపన్నమైన భారతదేశానికి నిలువుటద్దమని ఈ కార్యక్రమం మరోసారి నిరూపించింది.
