- టీఎంసీ దోపిడీ సొమ్మును వడ్డీతో సహా కక్కిస్తాం.
- పాతికేళ్ల మోదీ పాలనలో ఒక్క రూపాయి అవినీతి మచ్చ లేదు.
- మమతా సర్కార్పై కేంద్ర హోంమంత్రి అమిత్ షా విమర్శనాస్త్రాలు.
**జల్పాయ్గుడి, మహా **
దోపిడీ సొమ్మును వడ్డీతో సహా కక్కిస్తాం**.. ఆ సొమ్మును పేద ప్రజలకే తిరిగి అప్పగిస్తాం అని కేంద్ర హోంమంత్రి అమిత్ షా ఉద్ఘాటించారు. బుధవారం ఉత్తర బంగాల్లోని జల్పాయ్గుడి జిల్లా రాజ్గంజ్లో నిర్వహించిన భారీ బహిరంగ సభలో ఆయన పాల్గొని, మమతా బెనర్జీ నేతృత్వంలోని ప్రభుత్వంపై నిప్పులు చెరిగారు. పశ్చిమ బంగాల్ రాజకీయాల్లో ఎన్నికల వేడి పారాకాష్టకు చేరుకున్న వేళ, అధికార తృణమూల్ కాంగ్రెస్ అక్రమాలను ఎండగడుతూ అమిత్ షా విమర్శనాస్త్రాలు సంధించారు. బంగాల్లో దశాబ్ద కాలంగా కొనసాగుతున్న అరాచక పాలనకు అంతం పలికే సమయం ఆసన్నమైందని, రాష్ట్రంలో మార్పు ప్రక్రియ ఈ రాజ్గంజ్ గడ్డ నుంచే ప్రారంభం కావాలని ఆయన పిలుపునిచ్చారు.
ముఖ్యమంత్రి మమతా బెనర్జీ నేతృత్వంలోని ప్రభుత్వం అవినీతి రొంపిలో కూరుకుపోయిందని అమిత్ షా తీవ్రస్థాయిలో ధ్వజమెత్తారు. రాష్ట్రంలో బీజేపీ అధికారంలోకి వచ్చిన వెంటనే ప్రత్యేక దర్యాప్తు చేపట్టి, టీఎంసీ నాయకులు సాగించిన ప్రతి దోపిడీని వెలికితీస్తామని ఆయన హామీ ఇచ్చారు. పేద ప్రజల కష్టార్జితాన్ని అపహరించిన వారెవరినీ వదిలిపెట్టే ప్రసక్తే లేదని, ఆ సొమ్మును మళ్ళీ ప్రజలకే దక్కేలా చేస్తామని స్పష్టం చేశారు. గత పదేళ్లుగా బంగాల్ను కుంభకోణాలు పట్టిపీడిస్తున్నాయని, వీటన్నింటికీ చరమగీతం పాడాలంటే కమలం పువ్వును గెలిపించుకోవాలని ఆయన కోరారు. మమతా బెనర్జీ సర్కార్ అధికార విముక్తి కావడం ఖాయమని, ఆ దిశగా ప్రజలంతా చైతన్యవంతంగా అడుగులు వేయాలని సూచించారు.
ఇదే క్రమంలో ప్రధాని నరేంద్ర మోదీ నిష్కళంకమైన రాజకీయ జీవితాన్ని అమిత్ షా అద్భుతంగా విశ్లేషించారు. మోదీ గత 24 ఏళ్లుగా నిరంతరాయంగా అధికారంలో ఉన్నప్పటికీ, ఆయనపై ఒక్క రూపాయి అవినీతి ఆరోపణ కూడా రాకపోవడం ఆయన వ్యక్తిత్వానికి నిదర్శనమని కొనియాడారు. గుజరాత్ ముఖ్యమంత్రిగా 12 ఏళ్లు, దేశ ప్రధానమంత్రిగా మరో 12 ఏళ్లు.. ఇలా దాదాపు పావు శతాబ్ద కాలం పాటు అత్యున్నత పదవుల్లో కొనసాగుతున్నా, ఒక్క మచ్చ లేని పాలనను ఆయన దేశానికి అందించారని గుర్తు చేశారు. ప్రపంచంలోనే అత్యంత ప్రజాదరణ పొందిన నాయకుడిగా మోదీ ఎదగడానికి ఆయన పారదర్శకత, అంకితభావమే కారణమని అభివర్ణించారు. ఒకవైపు అవినీతికి మారుపేరుగా మారిన టీఎంసీ నాయకత్వం, మరోవైపు నిష్కళంక పాలనకు ప్రతీకగా నిలిచిన మోదీ.. వీరిలో ఎవరిని ఎంచుకోవాలో బంగాల్ ప్రజలు విజ్ఞతతో ఆలోచించుకోవాలని హితవు పలికారు.
బంగాల్ అభివృద్ధికి కేంద్రంలోని మోదీ ప్రభుత్వం కట్టుబడి ఉందన్న విషయాన్ని పునరుద్ఘాటిస్తూ, రాష్ట్ర ప్రగతిని మమతా ప్రభుత్వం అడ్డుకుంటోందని అమిత్ షా ఆవేదన వ్యక్తం చేశారు. కేంద్ర పథకాలు నేరుగా ప్రజలకు చేరకుండా టీఎంసీ నాయకులు అడ్డుగోడగా నిలుస్తున్నారని ఆరోపించారు. రాష్ట్రంలో శాంతిభద్రతలు పూర్తిగా క్షీణించాయని, మహిళలకు రక్షణ కరువైందని విమర్శించారు. ఈ దుర్మార్గపు పాలనకు స్వస్తి పలకడమే లక్ష్యంగా బీజేపీ కార్యకర్తలు నడుం బిగించాలని పిలుపునిచ్చారు. బంగాల్లో బీజేపీని గెలిపించాలని, అవినీతిపరుల ఆట కట్టిస్తామని, ప్రజల సొమ్మును పవిత్రంగా కాపాడతామని అమిత్ షా చేసిన వ్యాఖ్యలు సభకు హాజరైన జనసందోహంలో నూతనోత్సాహాన్ని నింపాయి.
