మహిళా బిల్లు ముసుగులో రాజకీయ గిమ్మిక్కులా?*డీలిమిటేషన్తో విపక్షాలను అణచివేసే కుట్ర. *సమాఖ్య స్ఫూర్తిని దెబ్బతీసే కేంద్రం ఎత్తుగడలు. *మల్లికార్జున ఖర్గే ధ్వజం.
ఢిల్లీ, మహా.
మహిళా రిజర్వేషన్ బిల్లుకు మేము మొదటి నుంచీ అనుకూలమే, కానీ డీలిమిటేషన్ పేరుతో కేంద్రం చేస్తున్న రాజకీయ గిమ్మిక్కులను మాత్రం సహించే ప్రసక్తే లేదు” అని ఏఐసీసీ అధ్యక్షుడు మల్లికార్జున ఖర్గే స్పష్టం చేశారు. కేవలం రాబోయే ఎన్నికల్లో లబ్ధి పొందడమే లక్ష్యంగా, విపక్షాలను రాజకీయంగా అణచివేసేందుకు కేంద్ర ప్రభుత్వం కుట్ర పన్నుతోందని ఆయన నిప్పులు చెరిగారు. బుధవారం సాయంత్రం ఢిల్లీలోని తన నివాసంలో జరిగిన ‘ఇండి’ కూటమి అత్యున్నత స్థాయి భేటీ అనంతరం ఆయన మీడియాతో మాట్లాడారు. నియోజకవర్గాల పునర్విభజన ముసుగులో సమాఖ్య స్ఫూర్తిని తుంగలో తొక్కే ప్రయత్నం జరుగుతోందని, దీనిపై పార్లమెంటు వేదికగా గట్టిగా పోరాడతామని ఆయన ప్రకటించారు.
కేంద్ర ప్రభుత్వం తీసుకురానున్న డీలిమిటేషన్ ప్రక్రియపై ఖర్గే తీవ్ర అభ్యంతరాలు వ్యక్తం చేశారు. దేశంలో కనీసం జనాభా లెక్కల ప్రక్రియను కూడా పూర్తి చేయకుండానే నియోజకవర్గాల పునర్విభజన అంశాన్ని తెరపైకి తీసుకురావడం అత్యంత విడ్డూరమని విమర్శించారు. రాజ్యాంగబద్ధంగా వ్యవస్థలు, పార్లమెంటు చేతుల్లో ఉండాల్సిన అధికారాలను కార్యనిర్వాహక వ్యవస్థ తన గుప్పిట్లోకి తీసుకుంటోందని ఆవేదన వ్యక్తం చేశారు. నియోజకవర్గాల సరిహద్దులను ఎప్పుడైనా తమకు నచ్చినట్లు మార్చుకునే వెసులుబాటును ప్రభుత్వం కల్పించుకుంటోందని, ఇది ప్రజాస్వామ్యానికే గొడ్డలి పెట్టు అని ఆయన హెచ్చరించారు. అస్సాం, జమ్మూకశ్మీర్ వ్యవహారాల్లో కేంద్రం ఇప్పటికే విపక్షాలను మోసం చేసిందని, ఇప్పుడు దేశవ్యాప్తంగా అదే తరహా రాజకీయ క్రీడకు తెరలేపిందని దుయ్యబట్టారు.
సమావేశంలో పాల్గొన్న ఇతర విపక్ష నేతలు కూడా కేంద్రం అనుసరిస్తున్న తీరుపై మండిపడ్డారు. జనాభా గణన నిర్వహించకుండా పునర్విభజన చేపట్టడం చట్టవిరుద్ధమని, ఇది దక్షిణాది రాష్ట్రాల ప్రాతినిధ్యాన్ని దెబ్బతీసే ప్రమాదం ఉందని వారు ఆందోళన వ్యక్తం చేశారు. అన్ని రాష్ట్రాల ముఖ్యమంత్రులతో, వివిధ రాజకీయ పక్షాలతో సంప్రదింపులు జరిపి, ఒక ఏకాభిప్రాయానికి వచ్చిన తర్వాతే ఇటువంటి కీలక నిర్ణయాలు తీసుకోవాలని హితువు పలికారు. సమాఖ్య వ్యవస్థలో రాష్ట్రాల హక్కులను కాలరాస్తూ కేంద్రం మొండిగా ముందుకు వెళ్లడం సరైన పద్ధతి కాదని విపక్షాలు ఏకగ్రీవంగా తీర్మానించాయి.
రేపు లోక్సభలో ఈ బిల్లు ప్రవేశపెట్టనున్న నేపథ్యంలో, సభా వేదికగా ప్రభుత్వాన్ని ఎండగట్టాలని ‘ఇండి’ కూటమి నిర్ణయించింది. మహిళా రిజర్వేషన్లకు తమ మద్దతు ఉంటుందని చెబుతూనే, డీలిమిటేషన్ ముసుగులో జరుగుతున్న అన్యాయాన్ని మాత్రం ఎట్టి పరిస్థితుల్లోనూ అంగీకరించబోమని ఖర్గే స్పష్టం చేశారు. పార్లమెంటులో విపక్షాల ఐక్య పోరాటం కేంద్రానికి గట్టి సవాలుగా మారబోతోంది. ప్రభుత్వ ఎత్తుగడలను చిత్తు చేసేందుకు విపక్షాలన్నీ ఏకతాటిపైకి రావడంతో, రాబోయే సభా సమావేశాలు అత్యంత ఉత్కంఠభరితంగా మారనున్నాయి.
ఢిల్లీ పెద్దలకు నమ్మినబంటు….
Editor
