చారిత్రక ఘట్టం.. ‘నారీ’ శక్తికి పట్టం: దక్షిణాదికి అన్యాయం జరగదు – లోక్‌సభలో ప్రధాని మోదీ భరోసా

చారిత్రక ఘట్టం.. ‘నారీ’ శక్తికి పట్టం.
* దక్షిణాదికి అన్యాయం జరగదు.
*మహిళా కోటాపై దేశం ఏకమవ్వాలి.
* విడదీసే రాజకీయాలు మానుకోండి.
*వికసిత్ భారత్‌లో మహిళలే కీలక శక్తులు.
*’30 ఏళ్ల నిరీక్షణకు తెర.
* క్రెడిట్ అందరిదీ అన్న ప్రధాని మోదీ.

ఢిల్లీ, మహా.

భారత ప్రజాస్వామ్య దేవాలయం లోక్‌సభలో మరో సువర్ణ అధ్యాయం ఆవిష్కృతమైంది. మహిళా రిజర్వేషన్ల అమలు కోసం ప్రభుత్వం ప్రతిపాదించిన 131వ రాజ్యాంగ సవరణ బిల్లుపై జరిగిన చర్చలో ప్రధానమంత్రి నరేంద్ర మోదీ పాల్గొని చారిత్రక ప్రసంగం చేశారు. దేశ పార్లమెంటరీ చరిత్రలో ఈ రోజును ఎప్పటికీ మర్చిపోలేమని, వికసిత్ భారత్ (అభివృద్ధి చెందిన భారత్) లక్ష్య సాధనలో మహిళల పాత్ర అత్యంత కీలకమని ఆయన ఉద్ఘాటించారు. మహిళలకు సరైన అవకాశం కల్పిస్తే, వారు దేశాన్ని సరికొత్త పురోగతి బాటలో నడిపిస్తారని ప్రధాని కొనియాడారు. ఈ చారిత్రక పరిణామంలో భాగస్వామి కావడం తన అదృష్టంగా భావిస్తున్నానని చెబుతూ, రాజకీయాలకు అతీతంగా అందరూ ఈ బిల్లుకు సహకరించాలని ఆయన పిలుపునిచ్చారు.
మహిళా బిల్లుపై విపక్షాలు లేవనెత్తుతున్న అభ్యంతరాలను, ముఖ్యంగా రాజకీయ కోణంలో ఆలోచిస్తున్న నేతలను ఉద్దేశించి ప్రధాని మోదీ ఒక ‘మిత్రుడిలా’ హితవు పలికారు. “మహిళా బిల్లును వ్యతిరేకించే వారిని ఈ దేశ మహిళలు ఎప్పటికీ క్షమించరు” అని ఆయన గంభీరంగా హెచ్చరించారు. గత ముప్పై ఏళ్లలో ఎప్పుడెప్పుడు మహిళా కోటా చర్చకు వచ్చిందో, ఆ తర్వాత జరిగిన ఎన్నికల్లో ఈ హక్కును అడ్డుకున్న వారికి మహిళలు తగిన బుద్ధి చెప్పారని ఆయన గుర్తు చేశారు. 2024 ఎన్నికల్లో ఈ అంశం వివాదాస్పదం కాకపోవడానికి కారణం అందరూ ఏకాభిప్రాయంతో ఉండటమేనని, ఈ రోజు కూడా అదే స్ఫూర్తితో అందరూ కలిసి నిర్ణయం తీసుకుంటే అది ఏ ఒక్క పార్టీ విజయం కాకుండా, భారత ప్రజాస్వామ్యానికే గర్వకారణంగా మారుతుందని ఆయన స్పష్టం చేశారు.
ఇక ఈ బిల్లుతో ముడిపడి ఉన్న నియోజకవర్గాల పునర్విభజన (డీలిమిటేషన్)పై నెలకొన్న ఆందోళనలను ప్రధాని అత్యంత స్పష్టంగా నివృత్తి చేశారు. ముఖ్యంగా దక్షిణాది రాష్ట్రాలకు అన్యాయం జరుగుతుందన్న ప్రచారాన్ని ఆయన తీవ్రంగా ఖండించారు. “డీలిమిటేషన్ వల్ల దక్షిణాది రాష్ట్రాలకు ఎలాంటి నష్టం జరగదు.. ఇది నా హామీ” అని ఆయన ప్రకటించారు. ఉత్తరాది, దక్షిణాది అంటూ దేశాన్ని విభజించే రాజకీయాలు చేసే కాలం చెల్లిపోయిందని, అటువంటి వారిని ప్రజలు ఇప్పటికే దూరం పెట్టారని ఆయన ఆరోపించారు. తమ ప్రభుత్వానికి చిన్న రాష్ట్రం, పెద్ద రాష్ట్రం అనే భేదాలు లేవని, ప్రతి ప్రాంతానికి న్యాయం చేయడమే తమ వాగ్దానమని ఆయన పునరుద్ఘాటించారు. సాంకేతిక కారణాలు చూపిస్తూ మూడు దశాబ్దాల పాటు మహిళల హక్కులను కాలరాశారని, ఆ అన్యాయాన్ని సరిదిద్దే సమయం ఇప్పుడు ఆసన్నమైందని ఆయన పేర్కొన్నారు.
మహిళా బిల్లు విషయంలో ఏ పార్టీకి కూడా క్రెడిట్ దక్కకూడదనేది తన ఉద్దేశం కాదని ప్రధాని మోదీ హుందాగా ప్రకటించారు. “మహిళా బిల్లు క్రెడిట్ మేం ఒక్కరమే తీసుకోవడం లేదు.. ఇది అందరికీ దక్కుతుంది. అవసరమైతే అన్ని పార్టీల నేతల ఫొటోలు వేసుకోండి, కానీ మహిళలకు వారి హక్కులు దక్కనివ్వండి” అని ఆయన వ్యాఖ్యానించడం సభలో చర్చనీయాంశమైంది. క్షేత్రస్థాయిలో మహిళలు ముప్పై ఏళ్లుగా పోరాటం చేస్తున్నారని, వారి శక్తిసామర్థ్యాలపై నమ్మకంతోనే ప్రభుత్వం ఈ నిర్ణయం తీసుకుందని ఆయన వివరించారు. దేశ రాజకీయాల్లో, వివిధ రంగాల్లో మహిళలను భాగస్వాములను చేయకపోతే దేశ ప్రయోజనాలు దెబ్బతింటాయని, అందుకే మనుగడ సాగించాలనుకునే ప్రతి రాజకీయ పార్టీ మహిళా బిల్లుకు మద్దతు ఇవ్వాల్సిందేనని ప్రధాని మోదీ తన ప్రసంగం ద్వారా కచ్చితమైన సంకేతాలను పంపారు.