* రాష్ట్రానికి ఏకంగా 750 బస్సులు మంజూరు.
* కాలుష్య రహిత ప్రజా రవాణా దిశగా ముందడుగు.
* తిరుపతికి 300, విశాఖకు 150 బస్సులు.
* భారీగా విద్యుత్ బస్సుల కొనుగోలు.
* 3,604 బస్సులకు టెండర్లు పిలిచిన కేంద్రం
* పర్యావరణ పరిరక్షణకు పెద్దపీట.
విజయవాడ, మహా.
ఆంధ్రప్రదేశ్ రాష్ట్ర రవాణా వ్యవస్థలో సరికొత్త శకానికి నాంది పడబోతోంది. పెరుగుతున్న కాలుష్యానికి చెక్ పెడుతూ, పర్యావరణ హితమైన ప్రజా రవాణాను ప్రోత్సహించే దిశగా కేంద్ర ప్రభుత్వం కీలక అడుగు వేసింది. దేశవ్యాప్తంగా విద్యుత్ ఆధారిత వాహనాల వినియోగాన్ని పెంచే బృహత్తర ప్రణాళికలో భాగంగా రాష్ట్రానికి ఏకంగా 750 విద్యుత్ (ఎలక్ట్రిక్) బస్సులను కేటాయించింది. ద్వితీయ, తృతీయ శ్రేణి నగరాల్లో రవాణా రూపురేఖలను మార్చేలా ‘పీఎం ఈ-బస్ సేవ’ పథకం కింద ఈ బస్సులను మంజూరు చేసినట్లు కన్వర్జెన్స్ ఎనర్జీ సర్వీసెస్ లిమిటెడ్ (సీఈఎస్ఎల్) ప్రధాన కార్యనిర్వహణాధికారి (సీఈఓ) అఖిలేష్ కుమార్ దీక్షిత్ అధికారికంగా వెల్లడించారు.
**రాష్ట్రానికి విద్యుత్ బస్సుల కేటాయింపు.. ఏ నగరానికి ఎన్ని?**
రాష్ట్రంలో అత్యంత రద్దీ ఉండే ప్రధాన నగరాలపై కేంద్రం ప్రత్యేక దృష్టి సారించింది. మొత్తం 750 బస్సుల కేటాయింపులో భాగంగా ప్రముఖ పుణ్యక్షేత్రం తిరుపతికి ఏకంగా 300 విద్యుత్ బస్సులను మంజూరు చేసింది. అలాగే, ఆర్థిక రాజధాని విశాఖపట్నానికి 150 బస్సులను కేటాయించింది. ఈ బస్సులను త్వరితగతిన రోడ్డెక్కించేందుకు రాష్ట్ర రోడ్డు రవాణా సంస్థ (ఏపీఎస్ఆర్టీసీ) ఇప్పటికే కసరత్తు వేగవంతం చేసింది. ఎంపిక చేసిన ఆపరేటర్లకు లెటర్ ఆఫ్ అవార్డులు (LoA) జారీ చేయడంతో పాటు ఒప్పందాలను సైతం పూర్తి చేసింది. తొలి దశలో ప్రయాణికుల రద్దీ ఎక్కువగా ఉండే మార్గాలు, పర్యాటక ప్రాంతాల్లో ఈ బస్సులను నడపాలని ఆర్టీసీ అధికారులు భావిస్తున్నారు.
**జాతీయ స్థాయిలో భారీ టెండర్లు.. 17 రాష్ట్రాలకు ప్రయోజనం**
దేశవ్యాప్తంగా క్లీన్ మొబిలిటీని విస్తరించే లక్ష్యంతో సీఈఎస్ఎల్ తాజాగా 3,604 విద్యుత్ బస్సుల కొనుగోలు కోసం టెండర్లను ఆహ్వానించింది. ఈ టెండర్ల ద్వారా 17 రాష్ట్రాలు, కేంద్రపాలిత ప్రాంతాల పరిధిలోని 45 ప్రధాన నగరాల్లో విద్యుత్ బస్సులను అందుబాటులోకి తేనున్నారు. ఏసీ, నాన్-ఏసీ వేరియంట్లతో పాటు స్టాండర్డ్ ఫ్లోర్, లో ఫ్లోర్ మోడళ్లలో ఈ బస్సులను సమకూర్చుకోనున్నారు. ఈ తాజా టెండర్ల ప్రక్రియ ద్వారానే తిరుపతికి 300 బస్సులు రానున్నాయి.
**కర్బన ఉద్గారాలకు చెక్.. పర్యావరణానికి రక్ష**
వేలాదిగా ఉన్న డీజిల్ బస్సుల స్థానంలో పర్యావరణ హితమైన విద్యుత్ బస్సులను ప్రవేశపెట్టడం ద్వారా దేశవ్యాప్తంగా కాలుష్యాన్ని భారీగా తగ్గించవచ్చని కేంద్రం అంచనా వేస్తోంది. పీఎం ఈ-బస్ సేవ పథకం (లక్ష్యం 10,000 బస్సులు), పీఎం ఈ-డ్రైవ్ పథకాల (లక్ష్యం 14,028 బస్సులు) ద్వారా పర్యావరణానికి తీవ్ర నష్టం చేకూర్చే 50 లక్షల టన్నుల కర్బన ఉద్గారాలను తగ్గించవచ్చని సీఈఎస్ఎల్ సీఈఓ అఖిలేష్ కుమార్ స్పష్టం చేశారు. 2070 నాటికి దేశాన్ని ‘నెట్ జీరో’ (కర్బన ఉద్గారాల రహిత) దేశంగా మార్చాలన్న లక్ష్య సాధనలో ఈ విద్యుత్ బస్సులు అత్యంత కీలక పాత్ర పోషించనున్నాయి. ధ్వని కాలుష్యం లేని, స్వచ్ఛమైన, ఖర్చు తక్కువతో కూడిన రవాణా వ్యవస్థ నగరవాసులకు అందుబాటులోకి రానుంది.
