లాటరీ కింగ్కు పొలిటికల్ జాక్పాట్.
* ఒకే కుటుంబం.. మూడు పార్టీలు.. ముగ్గురు ఎమ్మెల్యేలు!
* అన్నాడీఎంకేలో భార్య.. టీవీకేలో అల్లుడు.. సొంత పార్టీతో కొడుకు.
* రాజకీయాల్లో లాటరీ ఫ్యామిలీ సంచలనం!
హైదరాబాద్, మహా.
తమిళనాడు, పుదుచ్చేరి అసెంబ్లీ ఎన్నికల్లో అద్భుతమైన రాజకీయ ఘట్టం ఆవిష్కృతమైంది. ఇన్నాళ్లు దేశవ్యాప్తంగా ఎలక్టోరల్ బాండ్ల ద్వారా ప్రధాన రాజకీయ పార్టీలకు వందల కోట్ల రూపాయల విరాళాలు ఇచ్చి సంచలనం సృష్టించిన ‘లాటరీ కింగ్’ శాంటియాగో మార్టిన్ కుటుంబానికి ఇప్పుడు రాజకీయంగా అతిపెద్ద లాటరీ తగిలింది. పక్కా వ్యూహంతో అడుగులు వేసిన ఆయన కుటుంబం.. ఏకంగా మూడు వేర్వేరు ప్రధాన పార్టీల నుంచి ముగ్గురు సభ్యులను బరిలోకి దించి, ముగ్గురినీ ఎమ్మెల్యేలుగా గెలిపించుకుని రాజకీయ ఉద్దండులను సైతం ఆశ్చర్యపరిచింది. పార్టీ ఏదైనా సరే, గెలుపు మాత్రం లాటరీ కింగ్ కుటుంబానిదే అన్నట్లుగా సాగిన ఈ పొలిటికల్ మాస్టర్ ప్లాన్ ఇప్పుడు జాతీయ స్థాయిలో హాట్ టాపిక్గా మారింది.
**అన్నాడీఎంకే అభ్యర్థిగా భార్య లీమారోస్ సంచలన గెలుపు**
లాటరీ కింగ్ శాంటియాగో మార్టిన్ భార్య లీమారోస్ మార్టిన్ తమిళనాడులోని తిరుచిరాపల్లి జిల్లా లాల్గుడి స్థానం నుంచి అన్నా డీఎంకే (AIADMK) తరఫున పోటీ చేసి సంచలన విజయం సాధించారు. తన సమీప ప్రత్యర్థి, టీవీకే అభ్యర్థి క్యుపా కృష్ణన్పై ఆమె 2,739 ఓట్ల తేడాతో గెలుపొందారు. ఈ గెలుపు వెనుక ఒక చారిత్రక రికార్డు ఉంది. గత రెండు దశాబ్దాలుగా (2006, 2011, 2016, 2021) ఈ స్థానం అధికార డీఎంకే పార్టీకి కంచుకోటగా ఉంది. అలాంటి ఉక్కుకోటను బద్దలు కొట్టి, డీఎంకే అభ్యర్థి టి. పరివల్లల్ను మట్టికరిపించి ఆమె విజయఢంకా మోగించారు. ఎన్నికల అఫిడవిట్ ప్రకారం ఆమె ఆస్తుల విలువ ఏకంగా రూ. 1,049 కోట్లు కావడం గమనార్హం.
**పార్టీ మారిన రెండు నెలలకే ఎమ్మెల్యేగా..**
లీమారోస్ మార్టిన్ రాజకీయ ప్రయాణం అత్యంత వ్యూహాత్మకంగా సాగింది. ఆమె తొలుత ఇండియా జననాయక కచ్చి (IJK) పార్టీలో సుమారు 14 సంవత్సరాల పాటు (2012 నుంచి 2026 వరకు) పనిచేశారు. అక్కడ డిప్యూటీ జనరల్ సెక్రటరీగా, జాయింట్ జనరల్ సెక్రటరీగా కీలక బాధ్యతలు నిర్వర్తించారు. అయితే సరైన గుర్తింపు లభించడం లేదని భావించి 2026 ఫిబ్రవరి 10న ఆ పార్టీకి రాజీనామా చేసి, కేవలం వారం రోజుల వ్యవధిలోనే ఫిబ్రవరి 17న అన్నా డీఎంకే తీర్థం పుచ్చుకున్నారు. పార్టీలో చేరిన రెండు నెలలకే మహిళా విభాగం జాయింట్ సెక్రటరీగా బాధ్యతలు చేపట్టి, ఏకంగా ఎమ్మెల్యే టికెట్ దక్కించుకుని అసెంబ్లీలో అడుగుపెట్టారు.
**టీవీకే నుంచి బరిలోకి అల్లుడు.. విక్కివక్కంలో విక్టరీ**
శాంటియాగో మార్టిన్ కుమార్తె డైసీ మార్టిన్ భర్త, అంటే ఆయన అల్లుడు ఆధవ్ అర్జున కూడా ఎన్నికల బరిలో దిగి తనదైన ముద్ర వేశారు. ఆయన దళపతి విజయ్ స్థాపించిన టీవీకే (TVK) పార్టీ తరఫున విక్కివక్కం స్థానం నుంచి పోటీ చేసి ఘన విజయం సాధించారు. తన సమీప ప్రత్యర్థి, అధికార డీఎంకే పార్టీకి చెందిన కార్తీక్ మోహన్పై 17,302 ఓట్ల భారీ మెజారిటీతో ఆయన గెలుపొందారు. గత రెండు ఎన్నికల్లో ఈ స్థానంలో డీఎంకేనే గెలవగా, ఆ రికార్డును ఆధవ్ అర్జున బ్రేక్ చేశారు. మూడో స్థానంలో నిలిచిన అన్నాడీఎంకే అభ్యర్థి కంటే ఏకంగా 47 వేలకు పైగా ఓట్లు సాధించి ద్రవిడ పార్టీలకు ముచ్చెమటలు పట్టించారు.
**దళపతి విజయ్ పార్టీలో కీ రోల్.. ‘నంబర్ 2’గా గుర్తింపు**
కేవలం గెలవడమే కాదు, ఆధవ్ అర్జున ప్రస్తుతం టీవీకే పార్టీలో అత్యంత కీలకమైన నాయకుడిగా ఎదిగారు. పార్టీ ప్రధాన కార్యదర్శిగా (ఎన్నికల ప్రచార నిర్వహణ విభాగం) బాధ్యతలు చేపట్టిన ఆయన, హీరో విజయ్ తరఫున ఎన్నికల వ్యూహాలను, ప్రచార వ్యవహారాలను పూర్తిగా తన భుజస్కంధాలపై వేసుకుని నడిపించారు. టీవీకేలో విజయ్ తర్వాత ‘నంబర్ 2’ నేతగా ఆయనకు గుర్తింపు ఉంది. పార్టీ తీసుకునే నిర్ణయాలను అత్యంత బలంగా ప్రభావితం చేయగలిగే స్థాయిలో ఆయన చక్రం తిప్పుతున్నారు. ఎన్నికల అఫిడవిట్ ప్రకారం ఈయన ఆస్తుల విలువ రూ. 534.90 కోట్లుగా నమోదైంది.
**సొంత పార్టీతో కుమారుడి సక్సెస్.. పుదుచ్చేరిలో పాగా**
ఇక మార్టిన్ గ్రూప్ మేనేజింగ్ డైరెక్టర్గా, లాటరీ వ్యాపారాలను చూసుకునే శాంటియాగో మార్టిన్ కుమారుడు జోస్ ఛార్లెస్ మార్టిన్ ఏకంగా పుదుచ్చేరిలో పాగా వేశారు. రూ. 600 కోట్లకు పైగా ఆస్తులున్న ఈయన, పుదుచ్చేరిలోని కామరాజ్ నగర్ అసెంబ్లీ స్థానం నుంచి పోటీ చేసి విజయం సాధించారు. విచిత్రం ఏమిటంటే.. ఈయన ఏ ఇతర పార్టీలోనో చేరకుండా, తానే స్వయంగా ‘లత్చీయ జననాయగ కచ్చి (LJK)’ అనే సొంత పార్టీని స్థాపించి బరిలోకి దిగారు. కాంగ్రెస్ అభ్యర్థి పీకే దేవదాస్, టీవీకే అభ్యర్థి సుమన్లపై 10,000కు పైగా ఓట్ల మెజారిటీతో గెలుపొంది లాటరీ కింగ్ వారసుడిగా సత్తా చాటారు.
**బీజేపీకి గుడ్బై చెప్పి.. సొంతంగా కూటమిలోకి..**
జోస్ ఛార్లెస్ మార్టిన్ రాజకీయ వ్యూహం కూడా చాలా పదునైనది. 2015లో దిల్లీలో రామ్ మాధవ్ సమక్షంలో అధికారికంగా బీజేపీలో చేరిన ఆయన, తొమ్మిదేళ్ల పాటు ఆ పార్టీలో పనిచేశారు. అయితే సీటు కేటాయింపులో జాప్యం జరగడం, స్థానిక నాయకత్వంతో విభేదాలు రావడంతో 2024లో బీజేపీకి దూరమయ్యారు. ఆ వెంటనే 2025 డిసెంబరులో సొంతంగా ఎల్జేకే పార్టీని పెట్టి, వ్యూహాత్మకంగా బీజేపీ, ఏఐఎన్ఆర్సీ పార్టీలతో కూడిన ‘ఎన్డీఏ’ కూటమిలో భాగస్వామి అయ్యారు. ఆ కూటమి అండతోనే కామరాజ్ నగర్ సీటును దక్కించుకుని విజయతీరాలకు చేరుకున్నారు.
**ఆర్థిక బలంతో చట్టసభల్లోకి.. అల్టిమేట్ పొలిటికల్ మాస్టర్ ప్లాన్**
కోయంబత్తూరుకు చెందిన ఈ కుటుంబం తమిళనాడు నుంచి పుదుచ్చేరి వరకు తమ రాజకీయ సామ్రాజ్యాన్ని విస్తరించడం చూసి రాజకీయ పండితులు సైతం విస్మయానికి గురవుతున్నారు. “పుదుచ్చేరిని సింగపూర్లా మారుస్తా.. రాజకీయాలను ప్రభావితం చేసే ఆలోచన మాకు లేదు” అని జోస్ ఛార్లెస్ చెబుతున్నప్పటికీ.. తెరవెనుక జరుగుతున్న రాజకీయం వేరు. అధికారంలోకి వస్తున్న కొత్త పార్టీ (టీవీకే)లో అల్లుడు, బలమైన ప్రతిపక్షం (అన్నాడీఎంకే)లో భార్య, కేంద్రంలో అధికారంలో ఉన్న ఎన్డీఏ కూటమిలో కొడుకు.. ఇలా మూడు ప్రధాన స్తంభాలను తమ గుప్పిట్లో పెట్టుకుని లాటరీ కింగ్ వేసిన ఈ పొలిటికల్ మాస్టర్ ప్లాన్, తమ వేల కోట్ల వ్యాపార సామ్రాజ్యానికి రాజకీయ రక్షణ కవచంగా నిలుస్తుందనడంలో ఎలాంటి సందేహం లేదు.
