అన్నాడీఎంకేలో భగ్గుమన్న వర్గపోరు….

అన్నాడీఎంకేలో భగ్గుమన్న వర్గపోరు.
* నిలువునా చీలిన ప్రతిపక్షం.
* శాసనసభాపక్ష నేతగా ఎస్.పి. వేలుమణి.
* ఏకంగా 30కి పైగా ఎమ్మెల్యేల మద్దతు.
* కేవలం 17 మందికే పరిమితమైన మాజీ ముఖ్యమంత్రి ఈపీఎస్ వర్గం.
* అసెంబ్లీ కార్యదర్శికి ఇరు వర్గాల పోటాపోటీ లేఖల సమర్పణ.
* కొత్త స్పీకర్ ఎన్నిక తర్వాతే అసలైన అన్నాడీఎంకే ఎవరిదో తేలనున్న వైనం.
హైదరాబాద్, మహా.
తమిళనాడు రాజకీయాల్లో అనూహ్య పరిణామాలు చోటుచేసుకుంటున్నాయి. రాష్ట్రంలో కొత్త ప్రభుత్వం కొలువుదీరుతున్న వేళ, ప్రతిపక్ష శిబిరంలో తీవ్ర కలకలం రేగుతోంది. దశాబ్దాల పాటు తమిళ రాజకీయాలను శాసించి, బలమైన క్యాడర్ కలిగిన పార్టీగా గుర్తింపు పొందిన అన్నాడీఎంకే నిలువునా రెండుగా చీలిపోయింది. శాసనసభాపక్ష నాయకుడి ఎన్నిక వ్యవహారం పార్టీలో అంతర్గతంగా రగులుతున్న ఆధిపత్య పోరును బట్టబయలు చేసింది. సీనియర్ నేత ఎస్.పి. వేలుమణి, మాజీ ముఖ్యమంత్రి ఎడప్పాడి పళనిస్వామి (ఈపీఎస్) వర్గాలుగా పార్టీ ఎమ్మెల్యేలు విడిపోవడంతో తమిళ నాట తీవ్ర ఉత్కంఠ నెలకొంది.
పార్టీ శాసనసభాపక్ష నేత ఎంపిక కోసం జరిగిన అంతర్గత పరిణామాల్లో ఎస్.పి. వేలుమణి వర్గం అనూహ్యంగా పైచేయి సాధించింది. వేలుమణిని తమ నాయకుడిగా ఎన్నుకుంటూ ఏకంగా 30కి పైగా అన్నాడీఎంకే ఎమ్మెల్యేలు మద్దతు పలకడం రాజకీయ వర్గాలను విస్మయానికి గురిచేసింది. పార్టీలో ట్రబుల్ షూటర్‌గా, బలమైన నేతగా ఉన్న వేలుమణికి ఇంతటి భారీ మద్దతు లభించడం రాజకీయ సమీకరణాల మార్పునకు సంకేతంగా విశ్లేషకులు భావిస్తున్నారు. మరోవైపు, పార్టీపై తనదే పూర్తి ఆధిపత్యం అని భావించిన మాజీ సీఎం ఈపీఎస్‌కు ఊహించని ఎదురుదెబ్బ తగిలింది. ఆయనను తమ నాయకుడిగా కేవలం 17 మంది ఎమ్మెల్యేలు మాత్రమే ఎన్నుకోవడం ఆయన రాజకీయ ప్రాబల్యానికి గండిపడిందనడానికి నిదర్శనంగా నిలుస్తోంది. ఎవరికి వారు తామే మెజారిటీ వర్గమని, అసలైన అన్నాడీఎంకే తమదేనని వాదిస్తూ.. ఇరు వర్గాల నేతలు శాసనసభ సెక్రటేరియట్‌లో అసెంబ్లీ కార్యదర్శికి తమ మద్దతుదారుల సంతకాలతో కూడిన లేఖలను అధికారికంగా సమర్పించారు.
ఒకే పార్టీ నుంచి ఇద్దరు నేతలు శాసనసభాపక్ష నేత హోదా కోసం పోటీ పడుతూ పోటాపోటీగా లేఖలు ఇవ్వడంతో ఇప్పుడు బంతి శాసనసభ స్పీకర్ కోర్టులోకి చేరింది. అసెంబ్లీ నిబంధనల ప్రకారం, చట్టపరంగా ఏ వర్గాన్ని అధికారిక అన్నాడీఎంకే శాసనసభాపక్షంగా గుర్తించాలనేది పూర్తిగా స్పీకర్ విచక్షణాధికారంపై ఆధారపడి ఉంటుంది. ప్రస్తుతం కొత్త స్పీకర్ ఎన్నిక ప్రక్రియ జరగాల్సి ఉంది. స్పీకర్ ఎన్నిక పూర్తయి, నూతన స్పీకర్ బాధ్యతలు స్వీకరించిన తర్వాతే అసెంబ్లీలో ఏ వర్గానికి అసలైన గుర్తింపు దక్కుతుందనే దానిపై స్పష్టత రానుంది. అప్పటివరకు అన్నాడీఎంకే వర్గపోరు చట్టపరమైన, రాజ్యాంగపరమైన సవాళ్ల మధ్య సాగడం ఖాయంగా కనిపిస్తోంది. ఒకప్పటి అధికార పార్టీలో నెలకొన్న ఈ సంక్షోభం తమిళనాడు రాజకీయ ముఖచిత్రాన్ని ఏ మలుపు తిప్పుతుందోనన్న ఆసక్తి సర్వత్రా నెలకొంది.