నీట్ పేపర్ లీక్ కేసులో విస్తుపోయే నిజాలు…..

నీట్ పేపర్ లీక్ కేసులో విస్తుపోయే నిజాలు.
* నకిలీ డాక్టర్ గుట్టురట్టు.
* ఒక్కొక్కరి నుంచి రూ. 5 లక్షల వసూలు.
* రూ. 10 లక్షలకు కొని, రూ. 15 లక్షలకు బేరం.
* సీబీఐ దర్యాప్తులో సంచలనాలు.
* క్లాస్‌కు వెళ్లలేదు, పరీక్ష రాయలేదు కానీ బోర్డుపై ‘డాక్టర్’.
* రాజస్థాన్ లింకులు బట్టబయలు
హైదరాబాద్, మహా.

దేశవ్యాప్తంగా తీవ్ర సంచలనం సృష్టించిన నీట్-యూజీ 2026 పేపర్ లీక్ కేసును సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) లోతుగా దర్యాప్తు చేస్తున్న కొద్దీ విస్తుపోయే నిజాలు వెలుగులోకి వస్తున్నాయి. వైద్య విద్యను అభ్యసించాలన్న విద్యార్థుల కలలతో కొందరు బ్రోకర్లు, నకిలీ డాక్టర్లు ఎలా ఆడుకున్నారో ఆధారాలతో సహా బయటపడుతోంది. లీకైన నీట్ ప్రశ్నపత్రాన్ని ముందస్తుగా పొందేందుకు ఒక్కో విద్యార్థి నుంచి దళారులు ఏకంగా రెండు లక్షల నుంచి ఐదు లక్షల రూపాయల వరకు వసూలు చేశారని సీబీఐ పక్కాగా గుర్తించింది. ఈ కేసులో విచారణను వేగవంతం చేసిన దర్యాప్తు సంస్థ.. కోచింగ్ ఇన్‌స్టిట్యూట్‌ల యజమానులను, సిబ్బందిని కూడా సుదీర్ఘంగా ప్రశ్నించింది. లీకైన పేపర్‌ను చూసేందుకు తాము రెండు లక్షల నుంచి ఐదు లక్షల వరకు చెల్లించినట్లు పలువురు విద్యార్థులు దర్యాప్తు అధికారుల ముందు అంగీకరించినట్లు విశ్వసనీయ వర్గాల సమాచారం.
**క్లాస్ కు వెళ్లలేదు.. కానీ పేరు ముందు డాక్టర్!**
ఈ పేపర్ లీక్ కుంభకోణంలో మహారాష్ట్రలోని నాసిక్‌కు చెందిన ‘డాక్టర్‌’ శుభం ఖైర్నార్‌ అత్యంత కీలక పాత్ర పోషించినట్లు సీబీఐ తేల్చింది. నాసిక్ పోలీసులు అతడిని అరెస్ట్ చేయగా, దర్యాప్తులో అతడి గురించి కళ్లు చెదిరే వాస్తవాలు వెలుగుచూశాయి. శుభం స్వస్థలం మహారాష్ట్రలోని నందగావ్. నాసిక్‌లో అత్యంత రద్దీగా ఉండే కోచింగ్ కారిడార్‌లో అతడు ‘ఎస్‌ఆర్ ఎడ్యుకేషన్ కన్సల్టెన్సీ’ అనే సంస్థను నిర్వహిస్తున్నాడు. స్థానికంగా అందరికీ డాక్టర్‌గానే పరిచయం చేసుకున్న అతడు, తన కన్సల్టెన్సీ నేమ్ బోర్డుపై కూడా తన పేరు ముందు ‘డాక్టర్’ అని దర్జాగా రాయించుకున్నాడు. ఎంబీబీఎస్, బీహెచ్‌ఎంఎస్, బీడీఎస్ తదితర మెడికల్ కోర్సుల్లో అడ్మిషన్ల కోసం ప్రయత్నించే అమాయక విద్యార్థులకు గైడెన్స్ ఇస్తుంటాడు. అయితే దర్యాప్తులో అతడొక నకిలీ డాక్టర్ అని తేలిపోయింది. 2021లో మధ్యప్రదేశ్ రాజధాని భోపాల్ సమీపంలోని శ్రీ సత్యసాయి యూనివర్సిటీలో బ్యాచిలర్ ఆఫ్ ఆయుర్వేదిక్ మెడిసిన్ అండ్ సర్జరీ కోర్సు కోసం శుభం రిజిస్టర్ చేసుకున్నాడు. దీనిపై సీబీఐ అధికారులు ఆ యూనివర్సిటీ వైస్ ఛాన్సలర్‌ను సంప్రదించగా.. శుభం కేవలం అడ్మిషన్ సమయంలో మాత్రమే యూనివర్సిటీకి వచ్చాడని, ఆ తర్వాత ఒక్కరోజు కూడా క్లాసులకు హాజరుకాలేదని స్పష్టం చేశారు. కనీసం పరీక్షలు కూడా రాయలేదని, ఒక్కరోజు కూడా వైద్య కళాశాలకు వెళ్లని వ్యక్తి డాక్టర్‌గా చలామణి అవుతున్నాడని వెల్లడించారు.
**రూ. 10 లక్షలకు కొని.. రూ. 15 లక్షలకు వాట్సాప్‌లో అమ్మకం**
ఈ నీట్ లీకేజీ వ్యవహారం తొలుత రాజస్థాన్‌లో బయటపడినప్పటికీ, మూలాలు మాత్రం నాసిక్‌లో ఉన్నట్లు దర్యాప్తు అధికారులు గుర్తించారు. శుభం తనకు తెలిసిన ఒక గుర్తుతెలియని వ్యక్తి నుంచి నీట్ పేపర్‌ను ఏకంగా రూ. 10 లక్షలకు కొనుగోలు చేసినట్లు వెల్లడైంది. కొరియర్ ద్వారా తనకు చేరిన ఆ హార్డ్ కాపీ ప్రశ్నపత్రాన్ని శుభం వెంటనే పీడీఎఫ్ రూపంలోకి మార్చాడు. ఆ పీడీఎఫ్‌ను గురుగ్రామ్‌లో ఉన్న తన ఏజెంట్‌కు వాట్సాప్ ద్వారా పంపి, రూ. 15 లక్షలకు విక్రయించినట్లు దర్యాప్తులో అధికారులు తేల్చారు. గురుగ్రామ్ నుంచి ఆ పేపర్ రాజస్థాన్, బీహార్, జమ్మూకశ్మీర్, కేరళ తదితర రాష్ట్రాలకు క్షణాల్లో చేరినట్లు వివరించారు.
**రాజస్థాన్ లింకులు.. ప్రశ్నపత్రంపై చేతిరాతలు**
ఈ కేసు దర్యాప్తులో యశ్ యాదవ్ అనే మరో నిందితుడి పాత్ర అత్యంత కీలకంగా మారింది. గురుగ్రామ్ మీదుగా లీకైన ప్రశ్నపత్రం యశ్ యాదవ్ ద్వారానే రాజస్థాన్‌కు చేరిందని సీబీఐ తేల్చింది. ఆయుర్వేదిక్ మెడికల్ సైన్సెస్ పట్టభద్రుడైన యశ్ యాదవ్ స్వయంగా పరీక్షలో ఉత్తీర్ణత సాధించలేకపోవడం గమనార్హం. యశ్‌కు మరో నిందితుడైన వికాస్ బీవాల్‌తో ముందు నుంచే పరిచయం ఉంది. వికాస్ తండ్రి దినేష్ బీవాల్ వద్దకు నీట్-యూజీ ప్రశ్నపత్రం హార్డ్ కాపీ చేరగా, ఆయన దాన్ని స్కాన్ చేసి పీడీఎఫ్ ఫైల్స్‌గా మార్చారని విచారణలో వెల్లడైంది. రాజస్థాన్‌లోని సికార్ జిల్లాలో ఉన్న వివిధ కోచింగ్ సెంటర్లలో చదువుతున్న విద్యార్థులకు ఈ పీడీఎఫ్‌లను పంపిణీ చేయడానికి ముందే, నిందితులు ఆ ప్రశ్నపత్రంపై చేతితో కొన్ని వివరాలను రాసినట్లు వర్గాలు తెలిపాయి.
**గుండు గీయించుకుని తిరిగిన నకిలీ డాక్టర్**
రాజస్థాన్‌లో నీట్ పేపర్ లీక్ వ్యవహారం బయటపడగానే అక్కడి పోలీసులు మహారాష్ట్ర అధికారులకు శుభం గురించిన పక్కా సమాచారాన్ని అందించారు. దీనిని పసిగట్టిన శుభం పోలీసుల కళ్లుగప్పి తప్పించుకునేందుకు విఫలయత్నం చేశాడు. తనను ఎవరూ గుర్తుపట్టకుండా ఉండేందుకు ఏకంగా గుండు చేయించుకుని మారువేషంలో తిరిగాడు. అయినప్పటికీ పక్కాగా డిజిటల్ ఆధారాలను సేకరించిన పోలీసులు మంగళవారం నాడు నాసిక్‌లో శుభంను అదుపులోకి తీసుకున్నారు. అనంతరం అతడిని సీబీఐ స్పెషల్ టాస్క్‌ఫోర్స్‌కు అప్పగించారు. శుభంతో పాటు ఈ నెట్‌వర్క్‌లో భాగస్వామ్యం ఉన్న అతడి సోదరుడిని కూడా సీబీఐ అదుపులోకి తీసుకుని విచారిస్తోంది.
ప్రస్తుతం ఈ పేపర్ లీక్ మొదటగా ఎక్కడ జరిగింది? సీల్డ్ కవర్లలో ఉండాల్సిన ప్రశ్నపత్రం నిందితుడికి కొరియర్‌లో ఎలా చేరింది? ఆ తర్వాత అది కోచింగ్ సెంటర్ల విద్యార్థులకు ఎలా లభించింది? అనే కోణాల్లో సీబీఐ ముమ్మరంగా దర్యాప్తు చేస్తోంది. నిందితులతో పాటు ప్రయోజనం పొందిన విద్యార్థుల వాంగ్మూలాలను నమోదు చేస్తోంది. ప్రధానంగా ఈ పేపర్ లీక్ నెట్‌వర్క్ వెనుక జరిగిన కోట్లాది రూపాయల ఆర్థిక లావాదేవీల మార్గాలపై (మనీ ట్రైల్) దర్యాప్తు అధికారులు ఇప్పుడు పూర్తిస్థాయిలో దృష్టి సారించారు. ముందుముందు ఈ విచారణలో ఇంకెంతమంది పెద్దల పేర్లు బయటకు వస్తాయోనన్న ఉత్కంఠ సర్వత్రా నెలకొంది.