కాళేశ్వరంలో త్రివేణి సంగమ శోభ.
* వైభవంగా సరస్వతీ అంత్య పుష్కరాలు.
* కంచి పీఠాధిపతి విజయేంద్ర సరస్వతి తొలి స్నానం.
* 40 లక్షల మంది రాక అంచనా.
* రూ.30 కోట్లతో సర్కారు భారీ ఏర్పాట్లు.
కాళేశ్వరం,మహా.
భారతదేశ ఆధ్యాత్మిక చరిత్రలో అత్యంత విశిష్టత కలిగిన జయశంకర్ భూపాలపల్లి జిల్లాలోని కాళేశ్వరం పుణ్యక్షేత్రం భక్తజన సంద్రంగా మారింది. ప్రయాగ్రాజ్ తర్వాత దేశంలో అంతటి ప్రాధాన్యం ఉన్న ఈ పవిత్ర త్రివేణి సంగమ తీరం (గోదావరి, ప్రాణహిత, అంతర్వాహిని సరస్వతీ నదుల కలయిక) సరస్వతీ అంత్య పుష్కరాలకు వేదికైంది. గురువారం (మే 21) ఉదయం అత్యంత వైభవంగా ప్రారంభమైన ఈ పుష్కరాలు జూన్ 1వ తేదీ వరకు పన్నెండు రోజుల పాటు అట్టహాసంగా సాగనున్నాయి. తెలంగాణ చరిత్రలో తొలిసారిగా జరుగుతున్న ఈ విశేష ఉత్సవాలను చూసేందుకు, పుణ్యస్నానాలు ఆచరించేందుకు వివిధ రాష్ట్రాల నుండి భక్తులు భారీగా తరలిరావడంతో కాళేశ్వరమంతా ఆధ్యాత్మిక నాదంతో మార్మోగుతోంది.
పుష్కరాల ప్రారంభం సందర్భంగా కంచి కామకోటి పీఠాధిపతి జగద్గురు శ్రీ శంకర విజయేంద్ర సరస్వతి స్వామిజీ ఉదయం 5:43 గంటలకు పవిత్ర సంగమంలో తొలి పుణ్యస్నానం ఆచరించి ఈ ఉత్సవాలను శాస్త్రోక్తంగా ప్రారంభించారు. ఈ పుణ్య ఘట్టంలో రాష్ట్ర దేవాదాయ, అటవీ శాఖ మంత్రి కొండా సురేఖ, ఐటీ శాఖ మంత్రి దుద్దిళ్ల శ్రీధర్ బాబు దంపతులు కూడా పాల్గొని విశేష పూజలు చేశారు. మరోవైపు రాష్ట్ర గవర్నర్ శివప్రతాప్ శుక్లా తొలి రోజే ప్రత్యేక హెలికాప్టర్లో కాళేశ్వరం చేరుకోనున్నారు. ఆయన శ్రీ కాళేశ్వర ముక్తీశ్వర స్వామి ఆలయంలో ప్రత్యేక పూజలు నిర్వహించిన అనంతరం, సరస్వతీ ఘాట్ వద్ద ప్రతిరోజూ అత్యంత కన్నులపండువగా జరిగే గోదావరి మహా హారతి, తెప్పోత్సవం కార్యక్రమాల్లో పాల్గొంటారు. జ్ఞానానికి ప్రతీక అయిన సరస్వతీ నదిలో ఈ సమయంలో స్నానం చేయడం వల్ల విద్యాబుద్ధులు వికసిస్తాయని, పాపాలు తొలగిపోయి మానసిక ప్రశాంతత చేకూరుతుందని భక్తులు ప్రగాఢంగా విశ్వసిస్తారు.
ఈ పన్నెండు రోజుల వేడుకలకు సుమారు ముప్పై నుండి నలభై లక్షల మంది భక్తులు వస్తారని అంచనా వేస్తున్న ప్రభుత్వం, అందుకు తగ్గట్లుగా రూ.30.63 కోట్ల భారీ నిధులతో కనీవినీ ఎరుగని రీతిలో మౌలిక వసతులు కల్పించింది. త్రివేణి సంగమ తీరంలో ప్రత్యేకంగా ఏర్పాటు చేసిన సరస్వతి అమ్మవారి మండపం, విద్యుత్ దీపాలతో అలంకరించిన భారీ బాహుబలి సెట్ భక్తులను విశేషంగా ఆకర్షిస్తున్నాయి. అంతేకాకుండా మే 21న మహా గణపతి హోమంతో మొదలైన ఈ క్రతువులో హయగ్రీవ, నవగ్రహ, మహామృత్యుంజయ, ధన్వంతరి హోమాలను ఘనంగా నిర్వహించి, జూన్ 1న లఘు చండి మహా పూర్ణాహుతితో ముగింపు పలుకుతారు. దేవాదాయ శాఖ ఆధ్వర్యంలో కోటి ఇరవై లక్షల రూపాయలతో ఏర్పాటు చేసిన ప్రత్యేక మ్యూజియం, పునర్నిర్మించిన నాగేంద్ర స్వామి ఆలయం భక్తుల సందర్శనార్థం ముస్తాబయ్యాయి. భక్తుల రవాణా కోసం రాష్ట్ర నలుమూలల నుంచి 3,360 ప్రత్యేక బస్సులను, ఘాట్ల వద్ద 90 షటిల్ బస్సులను, 23 వాహన పార్కింగ్ కేంద్రాలను అధికారులు సిద్ధం చేశారు.
పవిత్ర సరస్వతి అంత్య పుష్కర మహోత్సవం సందర్భంగా ముఖ్యమంత్రి రేవంత్ రెడ్డి రాష్ట్ర ప్రజలకు, భక్తులకు హృదయపూర్వక శుభాకాంక్షలు తెలియజేశారు. భక్తులందరూ కాళేశ్వర క్షేత్రంలోని త్రివేణి సంగమం వద్ద పుణ్యస్నానాలు ఆచరించి దైవానుగ్రహం పొందాలని ఆయన ఆకాంక్షించారు. ముఖ్యమంత్రి ఆదేశాల మేరకు జిల్లా కలెక్టర్ రాహుల్ శర్మ పర్యవేక్షణలో యంత్రాంగం పకడ్బందీ చర్యలు చేపట్టింది. ఎండల తీవ్రతను దృష్టిలో ఉంచుకుని క్యూలైన్ల వెంబడి చలువ పందిళ్లు, నడిచేందుకు మ్యాట్లు, ఎక్కడికక్కడ ఓఆర్ఎస్ ప్యాకెట్లు, రెండు భారీ ఓవర్హెడ్ ట్యాంకుల ద్వారా తాగునీటి సౌకర్యం కల్పించారు. అత్యవసర వైద్య సేవల కోసం 23 జోన్లలో ప్రత్యేక క్యాంపులు ఏర్పాటు చేసి 300 మంది వైద్య సిబ్బందిని, అంబులెన్సులను అందుబాటులో ఉంచారు. మహాదేవపూర్ పీహెచ్సీని రెఫరల్ ఆసుపత్రిగా మార్చారు. స్నాన ఘట్టాల వద్ద ఎలాంటి అవాంఛనీయ ఘటనలు జరగకుండా రెస్క్యూ బృందాలతో పాటు సుశిక్షితులైన గజ ఈతగాళ్లను మోహరించి భద్రతను కట్టుదిట్టం చేశారు.
