రైతన్న చేతికే వాతావరణ సమాచారం..
* వాట్సాప్లో ముందస్తు హెచ్చరికలు.
* వ్యవసాయ శాఖ మంత్రి తుమ్మల అద్భుత శ్రీకారం.
* డీఐఎల్ సంస్థతో రాష్ట్ర ప్రభుత్వ చారిత్రక ఒప్పందం.
* తెలంగాణ రైతాంగం కోసం సర్కారు వినూత్న ప్రయోగం!
హైదరాబాద్, మహా.
ప్రకృతి కన్నెర్ర చేస్తే అన్నదాత ఆరుగాలం పడ్డ కష్టం క్షణాల్లో నేలపాలవుతుంది. అకాల వర్షాలు, ఊహించని వడగాల్పులు, వాతావరణంలో ఆకస్మిక మార్పుల కారణంగా రైతాంగం ఏటా తీవ్రస్థాయిలో నష్టపోతోంది. ఈ విషాద పరిస్థితులకు శాశ్వత చెక్ పెడుతూ, వ్యవసాయ రంగాన్ని సాంకేతికతతో అనుసంధానం చేసే దిశగా తెలంగాణ ప్రభుత్వం ఓ బృహత్తర కార్యక్రమానికి శ్రీకారం చుట్టింది. ఇకపై వాతావరణంలో జరిగే ప్రతి మార్పును ఎప్పటికప్పుడు పసిగట్టి, ఆ సమాచారాన్ని నేరుగా రైతుల అరచేతిలోకి (మొబైల్ ఫోన్లకే) చేరవేసే అద్భుతమైన వ్యవస్థను అందుబాటులోకి తీసుకువస్తోంది. స్మార్ట్ ఫోన్లలో ప్రతి ఒక్కరూ విరివిగా ఉపయోగించే ‘వాట్సాప్’ వేదికగా ముందస్తు వాతావరణ హెచ్చరికలను రైతులకు పంపేందుకు రాష్ట్ర వ్యవసాయ శాఖ సన్నద్ధమైంది. ఈ విప్లవాత్మక అడుగుతో తెలంగాణ వ్యవసాయ రంగంలో సరికొత్త అధ్యాయం ప్రారంభం కానుందని వ్యవసాయ శాఖ మంత్రి తుమ్మల నాగేశ్వరరావు స్పష్టం చేశారు.
వాతావరణ మార్పుల వల్ల తెలంగాణ రైతులు తీవ్రంగా నష్టపోతున్నారని, సరైన సమయంలో వాతావరణ సమాచారం రైతులకు అందుబాటులో ఉంటే పంట నష్టాలను భారీగా నివారించవచ్చని మంత్రి తుమ్మల నాగేశ్వరరావు ఈ సందర్భంగా ఉద్ఘాటించారు. రైతుల కష్టాలను తీర్చేందుకు రాష్ట్ర ప్రభుత్వం ప్రతిష్టాత్మక అడుగు వేసిందని, అందులో భాగంగానే ప్రఖ్యాత ‘డెవలప్మెంట్ ఇన్నోవేషన్ ల్యాబ్ ఇండియా ఎవిడెన్స్’ సంస్థతో తెలంగాణ ప్రభుత్వం కీలక అవగాహన ఒప్పందం కుదుర్చుకుంటోందని ఆయన వెల్లడించారు. ప్రపంచవ్యాప్తంగా అందుబాటులో ఉన్న అత్యుత్తమ టెక్నాలజీని సామాన్య రైతు గడప వద్దకు చేర్చడమే ప్రభుత్వ లక్ష్యమని, ప్రస్తుతం ఉన్న సాంకేతికతను మరింత మెరుగుపరిచి అత్యంత కచ్చితత్వంతో కూడిన వాతావరణ సమాచారాన్ని అందించేలా అధికారులకు, సాంకేతిక నిపుణులకు మంత్రి కీలక సూచనలు చేశారు.
ఈ సరికొత్త వ్యవస్థ ద్వారా జిల్లా, మండల స్థాయిల్లోనే కాకుండా, గ్రామ స్థాయిలో కూడా వాతావరణ అంచనాలను అత్యంత కచ్చితత్వంతో లెక్కగట్టనున్నారు. భారత వాతావరణ విభాగం అందించే శాస్త్రీయ డేటాను, డెవలప్మెంట్ ఇన్నోవేషన్ ల్యాబ్ వారి అత్యాధునిక సాంకేతికతతో క్రోడీకరించి నేరుగా వాట్సాప్ సందేశాల రూపంలో రైతుల మొబైల్స్ కు పంపుతారు. వర్షాలు ఎప్పుడు పడతాయి? ఈదురు గాలుల తీవ్రత ఎలా ఉండబోతోంది? పగటి ఉష్ణోగ్రతలు ఎంత మేర నమోదు కానున్నాయి? అనే కీలక సమాచారాన్ని రోజుల ముందే పసిగట్టి రైతులను అప్రమత్తం చేస్తారు. దీనివల్ల విత్తనాలు చల్లే సమయం నుంచి, ఎరువులు వేయడం, పంట కోతలు కోసి ధాన్యాన్ని మార్కెట్ కు తరలించే వరకు ప్రతి దశలోనూ రైతులు సరైన నిర్ణయాలు తీసుకునే వెసులుబాటు కలుగుతుంది.
కోట్లాది రూపాయల పంట నష్టాన్ని నివారించడంలో ఈ ‘వాట్సాప్ అలెర్ట్’ సిస్టమ్ ఒక బ్రహ్మాస్త్రంలా పనిచేస్తుందని వ్యవసాయ నిపుణులు హర్షం వ్యక్తం చేస్తున్నారు. చేతికొచ్చిన పంట అకాల వర్షాలకు తడిసిపోకుండా ముందు జాగ్రత్తలు తీసుకోవడానికి, వడగాల్పుల నుంచి పంటలను కాపాడుకోవడానికి ఈ ముందస్తు హెచ్చరికలు సంజీవనిలా ఉపయోగపడతాయి. కేవలం ప్రభుత్వ కార్యాలయాలకే పరిమితమైన వాతావరణ నివేదికలను, సాగు చేసే ప్రతి కర్షకుడి స్మార్ట్ ఫోన్ కు చేరవేస్తూ తెలంగాణ సర్కారు తీసుకున్న ఈ నిర్ణయం యావత్ దేశానికే ఆదర్శంగా నిలవబోతోంది. అధునాతన సాంకేతికత, ఐఎండీ సహకారం, ప్రభుత్వ చిత్తశుద్ధి ఏకమవుతున్న ఈ తరుణంలో.. తెలంగాణ రైతన్న ఇక ప్రకృతి పగబట్టినా, ధీమాగా తన పంటను రక్షించుకునే సుదినాలు రాబోతున్నాయి.
