బెంగళూరు,మహా.
దేశంలోనే అత్యంత సంపన్న ముఖ్యమంత్రిగా కర్ణాటక కాంగ్రెస్ కీలక నేత, ప్రస్తుత ఉప ముఖ్యమంత్రి దొడ్డాలహళ్లి కెంపెగౌడ (డీకే) శివకుమార్ సరికొత్త రికార్డు సృష్టించనున్నారు. జూన్ 3వ తేదీన బెంగళూరులోని లోక్ భవన్ గ్లాస్ హౌస్ వేదికగా ఆయన కర్ణాటక రాష్ట్ర 18వ ముఖ్యమంత్రిగా ప్రమాణ స్వీకారం చేయనున్నారు. ఈ నేపథ్యంలో ఆయన ఆస్తుల వివరాలపై దేశవ్యాప్తంగా తీవ్ర చర్చ సాగుతోంది. అసోసియేషన్ ఫర్ డెమోక్రటిక్ రిఫార్మ్స్ (ఏడీఆర్) నివేదిక ప్రకారం డీకే శివకుమార్ ప్రకటించిన మొత్తం ఆస్తుల విలువ ఏకంగా రూ. 1,413 కోట్లు కావడం గమనార్హం. దీంతో ఆయన దేశంలోనే అత్యధిక ఆస్తులు కలిగిన ముఖ్యమంత్రిగా రికార్డులకెక్కనున్నారు.
గత 2023 కర్ణాటక అసెంబ్లీ ఎన్నికల సమయంలో ఎన్నికల సంఘానికి సమర్పించిన అఫిడవిట్ ఆధారంగా ఏడీఆర్ ఈ నివేదికను రూపొందించింది. ఆ నివేదికలోని కచ్చితమైన డేటా ప్రకారం.. డీకే శివకుమార్ పేరిట రూ. 1,140 కోట్ల మేర స్థిరాస్తులు, రూ. 273 కోట్ల చరాస్తులు ఉన్నాయి. అదే సమయంలో ఆయనకు సుమారు రూ. 265 కోట్ల అప్పులు కూడా ఉన్నట్లు అఫిడవిట్లో పేర్కొన్నారు. 2008 ఎన్నికల నాటికి కేవలం రూ. 75.5 కోట్లుగా ఉన్న ఆయన ఆస్తుల విలువ.. 2013 నాటికి రూ. 251 కోట్లకు, 2018 నాటికి రూ. 840 కోట్లకు, ఇక 2023 నాటికి ఏకంగా రూ. 1,413 కోట్లకు చేరాయి. బెంగళూరు, మైసూరు, కనకపుర, ఢిల్లీ తదితర ప్రాంతాల్లో ఆయనకు పలు నివాస, వాణిజ్య సముదాయాలు (మాల్స్), భారీ ఎత్తున వ్యవసాయ భూములు ఉన్నట్లు స్పష్టమవుతోంది. తాతముత్తాతల నుంచి సంక్రమించిన భూముల విలువ గత రెండు దశాబ్దాల్లో విపరీతంగా పెరగడం, రియల్ ఎస్టేట్, విద్య, క్వారీ (గ్రానైట్) వ్యాపారాల్లో ఆయన చేసిన భారీ పెట్టుబడుల ద్వారానే ఈ స్థాయి సంపద సమకూరినట్లు తెలుస్తోంది.
డీకే శివకుమార్ నూతన ముఖ్యమంత్రిగా బాధ్యతలు చేపడితే, దేశంలో అత్యంత సంపన్న ముఖ్యమంత్రుల జాబితాలో తొలి మూడు స్థానాలు దక్షిణాది రాష్ట్రాల వారికే దక్కడం మరో ఆసక్తికరమైన అంశం. ఏడీఆర్ తాజా గణాంకాల ప్రకారం.. రూ. 1,413 కోట్లతో కర్ణాటక సీఎం డీకే శివకుమార్ తొలి స్థానంలో నిలవనుండగా, రూ. 931 కోట్ల ఆస్తులతో ఆంధ్రప్రదేశ్ ముఖ్యమంత్రి నారా చంద్రబాబు నాయుడు రెండో స్థానంలో ఉన్నారు. అలాగే ఇటీవల తమిళనాడు ముఖ్యమంత్రిగా బాధ్యతలు చేపట్టిన ప్రముఖ సినీ నటుడు, దళపతి విజయ్ (సీ జోసెఫ్ విజయ్) రూ. 648 కోట్ల ఆస్తులతో మూడో స్థానంలో నిలిచారు. దేశంలోని చాలా మంది రాజకీయ నాయకులు సాదాసీదా దుస్తులతో నిరాడంబరంగా కనిపించేందుకు ప్రయత్నిస్తుండగా.. డీకే శివకుమార్ మాత్రం రోలెక్స్ వాచీలు, లూయీ విట్టన్, ప్రాడా, గూచీ వంటి ఖరీదైన బ్రాండ్ల వస్త్రాలు, స్కార్ఫ్లు ధరిస్తూ తన విలాసవంతమైన జీవనశైలిని ఎక్కడా దాచుకోకుండా బహిరంగంగానే ప్రదర్శిస్తుంటారు. ఏది ఏమైనప్పటికీ, ఏళ్లుగా పార్టీ కోసం కష్టపడుతున్న ఆయన ఎట్టకేలకు కర్ణాటక ముఖ్యమంత్రి పీఠాన్ని అధిరోహించనుండటంతో రాజకీయ వర్గాల్లో ఈ పరిణామం హాట్ టాపిక్గా మారింది.
