పెద్దల సభకు లింగమనేని రమేశ్.
*జనసేన రాజ్యసభ అభ్యర్థిగా పేరు దాదాపు ఖరారు.
* నేడు అధికారిక ప్రకటన వెలువడే అవకాశం.
* ఆశావహుల జాబితాలో నాగబాబు, బండారు పేర్లు సైతం.
* ఏపీ రాజకీయాల్లో ఉత్కంఠ రేపుతున్న రాజ్యసభ స్థానాల భర్తీ.
అమరావతి, మహా.
ఆంధ్రప్రదేశ్ రాష్ట్రంలో నాలుగు రాజ్యసభ స్థానాల భర్తీకి ఎన్నికల సంఘం నోటిఫికేషన్ విడుదల చేయనున్న నేపథ్యంలో అధికార ఎన్డీయే కూటమిలో రాజకీయ సమీకరణాలు వేగంగా మారుతున్నాయి. ముఖ్యంగా పవన్ కల్యాణ్ నేతృత్వంలోని జనసేన పార్టీకి దక్కనున్న ఒక రాజ్యసభ స్థానానికి అభ్యర్థి ఎవరన్న దానిపై సర్వత్రా ఆసక్తి నెలకొంది. కూటమి ఒప్పందంలో భాగంగా జనసేన ఖాతాలోకి వెళ్లనున్న ఈ ఏకైక స్థానానికి ప్రముఖ పారిశ్రామికవేత్త, వ్యాపారవేత్త లింగమనేని రమేశ్ పేరు దాదాపు ఖరారైనట్లు రాజకీయ వర్గాల్లో విస్తృత చర్చ జరుగుతోంది. ఈ మేరకు నేడు సాయంత్రం జనసేనాని పవన్ కల్యాణ్ స్వయంగా ఆయన పేరును అధికారికంగా ప్రకటించే అవకాశం ఉన్నట్లు సమాచారం. దీంతో రాష్ట్ర రాజకీయాల్లో జనసేన తరఫున ఎగువ సభకు వెళ్లే నేత ఎవరన్న ఉత్కంఠకు దాదాపుగా తెరపడనుంది.
గత పదేళ్లుగా జనసేన పార్టీకి, పవన్ కల్యాణ్కు లింగమనేని రమేశ్ అత్యంత ఆప్తుడిగా కొనసాగుతున్నారు. పార్టీ కష్టకాలంలో ఉన్నప్పుడు సైతం ఆయన వెన్నంటి నిలిచారు. ఇటీవలే ఒక బహిరంగ వేదికపై పవన్ కల్యాణ్ సైతం ఈ విషయాన్ని ప్రస్తావిస్తూ లింగమనేని సేవలను బహిరంగంగానే కొనియాడారు. అటు ముఖ్యమంత్రి నారా చంద్రబాబు నాయుడికి కూడా ఆయన అత్యంత సన్నిహితుడు కావడం గమనార్హం. సంస్థాగత వ్యవహారాల్లో ఆయనకున్న అనుభవం, కూటమి నేతలతో ఉన్న సత్సంబంధాల నేపథ్యంలో.. ఆయన అభ్యర్థిత్వానికి కూటమి పెద్దల నుంచి కూడా పూర్తి మద్దతు లభించినట్లు తెలుస్తోంది. సుదీర్ఘకాలంగా రాజకీయ తెరవెనుక వ్యూహాల్లో పాలుపంచుకుంటున్న ఆయనకు రాజ్యసభ అవకాశం కల్పించడం ద్వారా పార్టీ అధిష్ఠానం ఒక బలమైన సందేశాన్ని ఇవ్వాలని భావిస్తోంది.
మరోవైపు, జనసేనకు దక్కిన ఈ స్థానంపై పార్టీ అంతర్గత వర్గాల్లో, ముఖ్యంగా సామాజిక సమీకరణాల కోణంలో తీవ్రమైన చర్చే జరుగుతోంది. ఈ పదవిని కాపు సామాజిక వర్గానికి చెందిన నేతలకు కేటాయించాలనే డిమాండ్ కూడా బలంగా వినిపిస్తోంది. ఈ రేసులో ఆంధ్ర క్రికెట్ అసోసియేషన్ ఉపాధ్యక్షుడు, గుంటూరుకు చెందిన ప్రముఖ పారిశ్రామికవేత్త బండారు నరసింహారావు, అలాగే జనసేన సీనియర్ నేత, పవన్ కల్యాణ్ సోదరుడు కొణిదెల నాగబాబు పేర్లు కూడా ప్రముఖంగా వినిపిస్తున్నాయి. ప్రస్తుతం ఎమ్మెల్సీగా ఉన్న నాగబాబుకు జాతీయ స్థాయిలో గుర్తింపునిచ్చేలా ఎగువ సభకు పంపితే ఎలా ఉంటుందన్న కోణంలో కూడా పార్టీలో ఒక వర్గం యోచించినట్లు సమాచారం.
ఎన్డీయే కూటమికి ఉన్న శాసనసభ్యుల భారీ సంఖ్యాబలం దృష్ట్యా ఈ రాజ్యసభ ఎన్నికలు లాంఛనమే కానున్నాయి. కాగా, తెలుగుదేశం పార్టీ సైతం తన ఖాతాలోని స్థానాలకు అభ్యర్థుల ఎంపికలో కుల, సామాజిక, ప్రాంతీయ సమీకరణాలను బేరీజు వేసుకుంటూ వ్యూహాత్మకంగా అడుగులు వేస్తోంది. ఏది ఏమైనప్పటికీ ఆశావహుల సంఖ్య ఎక్కువగా ఉండటం, ప్రతిష్టాత్మక పదవి కోసం పలువురు నేతలు ముమ్మర ప్రయత్నాలు సాగిస్తుండటంతో.. పవన్ కల్యాణ్ తుది నిర్ణయం తీసుకుని అధికారిక ప్రకటన చేసే వరకు ఈ ఉత్కంఠ కొనసాగే అవకాశం ఉంది.
