యువ కెరటానికి బీసీసీఐ బంపరాఫర్.
*వైభవ్ తల్లిదండ్రులకూ విదేశీ పర్యటనకు గ్రీన్ సిగ్నల్!
* పదిహేనేళ్లకే టీమిండియాలో చోటు దక్కించుకున్న కుర్రాడికి అండగా నిలిచిన బోర్డు.
* ఖర్చులన్నీ తమవేనని ప్రకటన.. వైభవ్ ఆటతీరుపై ప్రశంసల వర్షం కురిపించిన చీఫ్ సెలక్టర్ అగార్కర్.
ఢిల్లీ, మహా.
ఆడుకునే వయసులో అద్భుతాలు సృష్టిస్తూ అంతర్జాతీయ క్రికెట్లోకి అడుగుపెట్టిన పదిహేనేళ్ల యువ సంచలనం వైభవ్ సూర్యవంశీకి భారత క్రికెట్ నియంత్రణ మండలి (బీసీసీఐ) అండగా నిలిచింది. ఐపీఎల్లో తన అసాధారణ ఆటతీరుతో ఏకంగా జాతీయ జట్టులో చోటు దక్కించుకున్న ఈ యువ బ్యాటర్కు అరుదైన అవకాశం కల్పించింది. రాబోయే ఐర్లాండ్, ఇంగ్లండ్ పర్యటనల్లో విదేశీ వాతావరణంలో అతను ఇబ్బంది పడకుండా ఉండేందుకు అతని తల్లిదండ్రులను కూడా వెంట తీసుకెళ్లేందుకు బోర్డు అనుమతినిచ్చింది. అంతేకాకుండా, వారి ప్రయాణ ఖర్చులన్నింటినీ ఏ మాత్రం భారం పడకుండా తామే స్వయంగా భరిస్తామని ప్రకటించడం విశేషం.
**ఒత్తిడి జయించేందుకే ఆ నిర్ణయం..**
అంతర్జాతీయ స్థాయిలో క్రికెట్ ఆడటం అనేది తీవ్రమైన ఒత్తిడితో కూడుకున్నదని, కొత్త వాతావరణాన్ని తట్టుకుని నిలబడటానికి కుటుంబ సభ్యుల తోడు వైభవ్కు ఎంతో అవసరమని బీసీసీఐ భావిస్తోంది. ఈ మేరకు ప్రముఖ క్రీడా పత్రిక ‘స్పోర్ట్స్టార్’ ఒక ప్రత్యేక కథనం ప్రచురించింది. “అతను ఇంకా చిన్నపిల్లవాడు కావడంతో విదేశాల్లోని కొత్త వాతావరణంలో త్వరగా, సులభంగా సర్దుకుపోవడానికి అతని తల్లిదండ్రులను కూడా వెంట తీసుకెళ్లేందుకు మేం అనుమతించాం. వారి ప్రయాణానికి అయ్యే ఖర్చులన్నీ బోర్డే భరిస్తుంది” అని బీసీసీఐ కార్యదర్శి దేవజిత్ సైకియా వెల్లడించినట్లు ఆ కథనంలో పేర్కొన్నారు. కాగా, ప్రస్తుతం వైభవ్ సూర్యవంశీ.. ఇండియా-ఏ జట్టుతో కలిసి ట్రై-నేషన్ సిరీస్ ఆడేందుకు శ్రీలంక పర్యటనలో బిజీగా ఉన్నాడు.
**ఐపీఎల్లో పరుగుల వరద.. రికార్డుల మోత**
ఈ ఏడాది (2026) జరిగిన ఐపీఎల్ సీజన్లో రాజస్థాన్ రాయల్స్ తరఫున బరిలోకి దిగిన వైభవ్ సూర్యవంశీ తన సుడిగాలి ఇన్నింగ్స్లతో యావత్ క్రికెట్ ప్రపంచం దృష్టిని ఆకర్షించాడు. ఈ టోర్నీలో మొత్తం 776 పరుగులు సాధించి, అత్యధిక పరుగులు చేసిన ఆటగాడిగా ‘ఆరెంజ్ క్యాప్’ సొంతం చేసుకున్నాడు. అతని ఇన్నింగ్స్లలో ఒక సెంచరీ,ఐదు అర్ధ శతకాలు ఉండటం అతని నిలకడైన బ్యాటింగ్కు అద్దం పడుతోంది. కేవలం పరుగులే కాకుండా, అత్యుత్తమ ఆటతీరుకు గాను ‘మోస్ట్ వాల్యుబుల్ ప్లేయర్’, ‘ఎమర్జింగ్ ప్లేయర్’ వంటి ప్రతిష్టాత్మక అవార్డులను సైతం దక్కించుకున్నాడు. ఈ అద్భుతమైన ప్రదర్శనతోనే ఐర్లాండ్, ఇంగ్లండ్ పర్యటనలతో పాటు ఆసియా క్రీడల కోసం ఎంపిక చేసిన టీమిండియా టీ20 జట్టులో ఏకగ్రీవంగా చోటు సంపాదించాడు.
**తనను తానే ఎంపిక చేసుకున్నాడు: అగార్కర్**
ఈ అద్భుత యువ ప్రతిభపై బీసీసీఐ చీఫ్ సెలక్టర్ అజిత్ అగార్కర్ ప్రశంసల వర్షం కురిపించారు. వైభవ్ అద్భుతమైన ఆటతీరు చూసి, అతడు తనను తానే జట్టులోకి ఎంపిక చేసుకున్నాడని, అతని ప్రతిభ గురించి తాము ప్రత్యేకంగా చెప్పాల్సిన అవసరం లేదని కొనియాడారు. రాజస్థాన్ రాయల్స్ను ప్లేఆఫ్స్లో దాదాపు ఒంటిచేత్తో నడిపించాడని, తీవ్రమైన పోటీ, ఒత్తిడి ఉండే ఐపీఎల్ లాంటి టోర్నీలో ఒక యువ ఆటగాడు ఈ స్థాయిలో చెలరేగడం అసాధారణమని పేర్కొన్నారు. మ్యాచ్ గమనాన్ని క్షణాల్లో మార్చగల సత్తా అతనికి ఉందని, అందుకే వైభవ్పై తాము భారీ అంచనాలు పెట్టుకున్నట్లు అగార్కర్ స్పష్టం చేశారు.
