నా అసలు పేరు అది కాదు…….

నా అసలు పేరు అది కాదు.
* ‘పవన్’ పేరు వెనుక ఉన్న కథ ఇదే: పవన్‌ కల్యాణ్‌.
* బారసాల నాటి పేరును బయటపెట్టిన ఏపీ ఉపముఖ్యమంత్రి.
* మార్షల్ ఆర్ట్స్ గురువే ఆ పేరు పెట్టారంటూ ఆసక్తికర విషయాల వెల్లడి.
హైదరాబాద్, మహా.
తెలుగు చలనచిత్ర పరిశ్రమలో ‘పవర్ స్టార్’ అనే పేరు ఒక సంచలనం. ఆయన నడక, నటన, పలికే డైలాగులు.. ఇలా ప్రతి ఒక్కటీ అభిమానుల్లో పూనకాలు తెప్పిస్తాయి. ఆయనే టాలీవుడ్ అగ్ర కథానాయకుడు, ఆంధ్రప్రదేశ్ ఉపముఖ్యమంత్రి పవన్ కల్యాణ్. అయితే, ఆయన అసలు పేరు పవన్ కల్యాణ్ కాదు అనే విషయం చాలా మందికి తెలిసినప్పటికీ, ఆ పేరు వెనుక ఉన్న అసలు కథేంటో, అది ఎలా వచ్చిందో ఇటీవల ఒక ఇంటర్వ్యూలో పవన్ స్వయంగా పంచుకున్నారు. ఈ ఆసక్తికరమైన విశేషాలు ఇప్పుడు సామాజిక మాధ్యమాల్లో విపరీతంగా ట్రెండ్ అవుతున్నాయి.
పవన్ కల్యాణ్ తన చిన్ననాటి జ్ఞాపకాలను గుర్తుచేసుకుంటూ.. “నేను పుట్టినప్పుడు మా ఇంట్లో బారసాల రోజున నాకు పెట్టిన అసలు పేరు ‘శ్రీ కల్యాణ్ కుమార్’. కానీ, ఆ తర్వాత స్కూల్ రికార్డుల్లో చేర్చే సమయానికి ఆ ‘శ్రీ’ అనే పదాన్ని తొలగించి, కేవలం ‘కె. కల్యాణ్ కుమార్’ అని రిజిస్టర్ చేశారు” అని వెల్లడించారు. గతంలో ఆయన తల్లి అంజనా దేవి కూడా ఒక ఇంటర్వ్యూలో తన కుమారుడి అసలు పేరు కల్యాణ్ కుమార్ అని స్పష్టం చేసిన విషయం తెలిసిందే.
మరి కల్యాణ్ కుమార్ కాస్తా ‘పవన్ కల్యాణ్’గా ఎలా మారారనే దానికి ఆయన ఒక పవర్‌ఫుల్ ఫ్లాష్‌బ్యాక్ చెప్పారు. “నాకు చిన్నప్పటి నుంచి మార్షల్ ఆర్ట్స్ అంటే విపరీతమైన పిచ్చి, ఆసక్తి ఉండేది. శిక్షణ తీసుకునే రోజుల్లో నేను కఠినమైన విన్యాసాలు చేసేవాడిని. నా ఛాతీపై వందల కిలోల బరువున్న బండరాళ్లను పెట్టుకుని, వాటిని సుత్తితో పగలగొట్టించేవాడిని. నా శారీరక దృఢత్వాన్ని, విద్యపై నాకున్న అంకితభావాన్ని చూసి.. నా మార్షల్ ఆర్ట్స్ గురువు నా పేరుకు ముందు ‘పవన్’ అనే పదాన్ని చేర్చారు” అని తెలిపారు. అలా గురువు ఆశీస్సులతో లభించిన ‘పవన్’ అనే పేరును ఆయన తన స్క్రీన్ నేమ్‌గా మార్చుకున్నారు. అదే పేరు కాలక్రమేణా టాలీవుడ్‌లో ఒక పెను తుపాను సృష్టించింది. ఆ తర్వాత అభిమానులు ఆయనకు ఇచ్చిన ‘పవర్ స్టార్’ అనే బిరుదు ఆయన వ్యక్తిత్వానికి కేరాఫ్ అడ్రస్‌గా మారిపోయింది.
మెగాస్టార్ చిరంజీవి తమ్ముడిగా చలనచిత్ర పరిశ్రమలోకి అడుగుపెట్టినప్పటికీ.. కేవలం నటుడిగానే కాకుండా రైటర్, సింగర్, స్టంట్ డిజైనర్, డైరెక్టర్.. ఇలా మల్టీ టాలెంటెడ్‌గా తనకంటూ ఒక ప్రత్యేకమైన సామ్రాజ్యాన్ని సృష్టించుకున్నారు. ప్రస్తుతం ఆయన ఆంధ్రప్రదేశ్ డిప్యూటీ సీఎంగా ప్రజాసేవలో బిజీగా గడుపుతున్నారు. తన పేరు వెనుక ఉన్న ఈ రియల్ స్టోరీని పవన్ స్వయంగా బయటపెట్టడంతో మెగా అభిమానులు ఫుల్ ఖుషీ అవుతున్నారు.